Министерството за надворешни работи на Брунеи соопшти дека воведувањето на шеријатските закони има цел да превенира, а не да казнува, по острите критики од светот поради воведувањето на строгите исламски закони.

Според новите закони, прељубата и сексот помеѓу двајца мажи се казнува со каменување до смрт. Брунеи соопшти дека во рамките на законот ќе има висок праг за докази, што укажува дека казната ќе биде ретка.

Оттаму велат дека шеријатот не криминализира врз основа на сексуална ориентација или верување вклучувајќи ги и истите полови односи.

Криминализацијата на прељуба и содомија е да се заштити светоста на семејната лоза и бракот на индивидуалните муслимани, особено на жените, се наведува во соопштението.

Ова оправдување на законот следува кога ОН ги нарече казните сурови и нечовечки.

Нафтеното исламско кралство Брунеи минатата недела најави дека ќе почне со примена на нов кодекс на однесување, кој предвидува и казни со каменување за неверство и содомија и им овозможува на судовите да ги казнат крадците со сечење на нивната десна рака како одраз на конзервативното влијание во исламската Југоисточна Азија.

На оние што ќе бидат фатени како крадат вторпат, ќе им биде отсечено левото стапало, се наведува во дел од исламските закони објавени на веб-страницата на владата во Брунеи. Тие исто така ја одобруваат смртната казна за изведување одредени видови црна магија.