Европа
(Видео) Меркел одржа говор за коронавирусот: Германија не може да успее ако не успее Европа
Германската канцеларка Ангела Меркел одржа говор во Бундестагот, при што зборуваше за борбата против пандемијата на коронавирус и строгите мерки што се воведени во Германија.
„Денешните 80-годишници и 90-годишници ја изградија оваа земја и ги поставија темелите на благосостојба во кои денеска живееме“, рече Меркел во својот говор.
Таа додаде дека смета оти вакцината би требало да биде достапна во целиот свет.
„Во оваа ситуација на борба против коронавирусот уверена сум дека мораме да покажеме голема дисциплина за подоцна да можеме што поуспешно да ја подигнеме економијата и да одржиме прифатлива здравствена ситуација. Воведувањето на мерките за ограничување на почетокот на пандемијата значеше и значи можност ширењето на вирусот да го ставиме под контрола и со тоа се водев при одлучувањето“, порача Меркел.
„Нашиот федерален поредок е силен, тоа мора да се нагласи. Но, не смееме да се препуштиме на лажната надеж и сега да го пропуштиме она што досега го постигнавме. Да бидеме мудри и внимателни во следната фаза од пандемијата. Ова е трка на долги патеки и мораме да внимаваме да не останеме без здив“, вели канцеларката.
Според неа, Германија не може да успее ако не успее Европа.
„За затворање на општеството во оваа ситуација се потребни и сила и желба за да се воведе нов начин на однесување. Во овој момент не можеме да кажеме како ќе закрепне нашата економија, која ќе биде загрозена сè додека трае пандемијата. Затоа е многу важно да ги поддржиме и економијата и нашите работници. Но, сите наши мерки на национално ниво нема да дадт плод ако не дојде до закрепнување на европско ниво. Германија не може да успее ако Европа не успее“, нагласи таа.
Меркел истакна дека денеска во Европскиот совет ќе расправаат како Европа може брзо да реагира за да помогне на европската економија. Европската програма за инвестиции во следните две години би можела повторно да ја подигне економијата, објасни Меркел и додаде дека таквата програма треба да биде во согласност со заедничкиот европски буџет.
„Мора да се прашаме кои стратешки способности во иднина треба да ги има ЕУ. Европа не е Европа ако не си помогнеме едни на други во овие вонредни времиња и под закана на долгови“, канцеларката на Германија го заврши говорот, кој бил повеќепати прекинат со аплауз.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.