Свет
(Видео) Kафеава мечка нападна и касна скијач на Алјаска, тој реши да се преправа дека е мртов

Скијач бил нападнат и каснат од кафеава мечка на Алјаска. Човекот бил дел од група која се искачувала на планина во близина на Хаинс, Алјаска, и за време на нападот се здобил со повреди на главата и раката.
Одделот за риби и дивеч на Алјаска соопшти дека жртвата ненамерно разбудила кафеава мечка во дувло, мајка која веројатно го штитела своето младенче. Нападнатиот човек се преправал дека е мртов, со што успеал да се спаси. Хеликоптер за спасување го пронашол него и уште двајца скијачи на околу 10 километри северозападно од Хаинс на надморска височина од околу 490 метри.
Кога пристигнале спасувачите, жртвата сè уште била свесна. Двајца други скијачи му укажале прва помош и контактирале со крајбрежната стража.
„Користејќи го нивниот сателитски комуникациски уред, утврдивме прецизни GPS-координати и надморска височина. Исто така, и што е важно, скијачите имаа светло обоена крпа за да го сигнализираат пилотот на хеликоптерот. Тоа беше апсолутно клучно за да се најдат навреме”, рече пилот поручникот Вил Сирокман.
На другите двајца скијачи не им била потребна помош и сами се спуштија по планината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Москва се заканува со последици ако ЕУ го искористи рускиот имот за финансирање на кредит за Украина

Русија денес изјави дека идејата за користење на нејзините замрзнати средства за кредитирање на Украина, за која дискутираат лидерите на ЕУ, е неразумна и би предизвикала многу остра реакција од Москва, додека белгискиот премиер повика на споделена одговорност меѓу земјите-членки во случај на таков план.
Манипулирањето со руските средства би претставувало кршење на меѓународното право, а Москва има богат арсенал на економски и политички средства за соодветно да одговори, изјави портпаролката на Министерството за надворешни работи, Марија Захарова.
Русија сака да ги потсети владите на ЕУ, а особено Белгија, каде што се наоѓаат повеќето од замрзнатите средства на Русија, да ги почитуваат своите меѓународни обврски, предупреди таа.
На вчерашниот самит во Копенхаген, лидерите на ЕУ изразија широка поддршка за идејата за користење на руски средства замрзнати на Запад за да се обезбеди заем од 140 милијарди евра на Украина без конфискација на средствата.
ЕУ сè уште треба да ги среди сложените правни и финансиски аспекти, а меѓу предлозите е враќање на средствата ако и кога Украина ќе добие репарации од Русија според мировен договор.
„Не сакам ни да дискутирам за овој концепт, толку е неразумен. Но, зборот репарации ми го привлече вниманието… За какви исплати на репарации зборува Урсула фон дер Лајен?“, се подбиваше Захарова.
Русија ја добива војната против Украина, а репарациите ги плаќаат губитниците, тврди таа.
Свет
Напад во синагога: има загинати и повредени во Мачестер

Напад со нож се случи во синагогата Крамсал во Манчестер, а полицијата потврди дека две лица се убиени и дека „уште три граѓани се во сериозна состојба“.
Градоначалникот на Манчестер, Енди Бернам, го нарече нападот „сериозен инцидент“ и ги повика луѓето да ја избегнуваат областа.
Би-Би-Си, исто така, објави дека „се чини дека непосредната закана поминала“. Полицијата реагираше брзо и е на местото на настанот, а истрагата е во тек.
Полицијата соопшти дека добила пријава во 9:31 часот по локално време од граѓанин кој видел автомобил како се движи со брзина кон луѓе пред синагогата на хебрејската конгрегација Хитон Парк на патот Мидлтон, Крамсал, и дека еден човек бил избоден со нож.
Во полициското соопштение се наведува дека се верува дека напаѓачот, кон кого пукале припадници на полицијата, исто така е убиен, но дека ова „не може да се потврди во моментов поради безбедносни проблеми“ во врска со сомнителните предмети на неговото тело, објави Би-Би-Си.
Според изјавите на очевидци и објавите на социјалните мрежи, полицијата се сомнева дека напаѓачот поседувал бомба. Оваа информација не е официјално потврдена од членовите на полицијата на Манчестер.
Градоначалникот на Манчестер, Енди Бернам, за Би-Би-Си Радио Манчестер изјави дека се верува дека напаѓачот е „мртов“, но нагласи дека тоа „сè уште не е потврдено“.
Фото: принтскрин
Свет
Силен земјотрес ја погоди Турција

Земјотрес со магнитуда од 5,0 степени ја погоди денес западна Турција, со епицентар во Мраморното Море, на 39 километри оддалеченост од покраината Текирдаг, соопшти Европско-медитеранскиот сеизмолошки центар (EMSC).
Земјотресот беше почувствуван и во Истанбул, кој е оддалечен околу 100 километри од епицентарот на земјотресот, објавија медиумите.
Според соопштението на EMSC, епицентарот на земјотресот бил на длабочина од девет километри.