Свет
Генетски модифициран свински бубрег и даде нова шанса за живот на жена од Алабама

50-годишна жена од Алабама се чувствува подобро и повеќе не е на дијализа, откако во долга операција минатиот месец и беше трансплантиран генетски модифициран бубрег на свињи, соопшти денеска клиниката Лангон на Универзитетот во Њујорк.
Тована Луна еднаш ѝ донирала бубрег на својата мајка, но во 1999 година се соочила со откажување на преостанатиот бубрег по компликации за време на породувањето и поврзаниот висок крвен притисок.
Клиниката на NYU во соопштението наведе дека помалку од еден процент од донаторите на бубрези имаат проблеми со откажување на бубрезите и дека во такви случаи се ставаат на врвот на приоритетната листа за трансплантација.
Во 2016 година Луна мораше да започне со дијализа, а во 2017 година беше ставена на списокот за трансплантација, но беше невозможно да се најде соодветен донатор поради невообичаено високата пропорција на антитела во нејзината крв, пишуваат медиумите.
По осум години и со сè полоша крвна слика која повеќе не поддржува дијализа, американската ФДА одобри трансплантација на свински црн дроб со десет генетски модификации, која сè уште е во експериментална фаза, поради опасни по живот услови.
Седумчасовната хируршка интервенција беше трета во која свински бубрег беше пресаден во човечко тело, но Луна е единствениот жив човек со овој орган со десет модификации и единствениот жив човек со вграден свински орган, според написите.
Десетте генетски модификации вклучуваа отстранување на три имуногени и отстранување на рецепторот на свинскиот хормон за раст (GHR), како и додавање на шест човечки трансгени, за да се направи бубрегот покомпатибилен и да се намали можноста за отфрлање.
По единаесет дена болничко набљудување, Луна на 6 декември е пуштена дома во Њујорк, но ќе продолжи да доаѓа на редовни прегледи секој ден, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Робот спасил ранет украински војник од бојното поле, објавена снимка

Припадници на 118. механизирана бригада на Оружените сили на Украина објавија снимка која го прикажува евакуирањето на ранет војник од бојното поле со помош на копнен роботски систем. Овој настан уште еднаш ја истакнува растечката улога на современите технологии во спасувањето човечки животи во воени услови, пишува „Украинска правда“.
„Операторите на копнените роботски системи од 2-та чета на 23-та посебна стрелачка баталјонска единица на 118-та механизирана бригада го спасиле ранетиот војник. Војникот бил спасен со помош на борбената копнена платформа“, стои во објавата на бригадата. Иако од бригадата не откриле точна локација или време кога е снимката, истакнале дека јасно прикажува како технологијата спасува животи на првата линија на бојното поле.
Ова не е првпат што беспилотни системи се користат за евакуација. Неодамна, логистичкиот дрон Тор-800, кој припаѓа на 13-та бригада „Хартија“, спасил живот на војник со тешка повреда на ногата. Претходно, истата бригада успешно евакуирала ранет војник користејќи копнен робот кој поминал растојание од 12 километри.
Сепак, употребата на роботи надминува логистички и спасувачки мисии. Припадници на 3-та посебна јуришна бригада првпат користеле копнени роботи за заробување руски војници, додека разузнавачката служба за одбрана на Украина ја демонстрирала борбената способност на овие системи, објавувајќи снимка на робот кој отвора оган од митралез на руски позиции во Сумска област.
Свет
Во Европа нема повеќе место за бегалци од Украина?

Британските власти сè повеќе ги отфрлаат барањата на украинските мигранти за продолжување на нивниот престој, објави Би-Би-Си на руски јазик. Од почетокот на конфликтот во Украина во 2022 година, повеќе од 250.000 Украинци добија визи преку програмата „Домови за Украина“, која неодамна беше затворена, пренесуваат медиумите во регионот.
Властите сега масовно ги отфрлаат барањата за трајна заштита, тврдејќи дека западните делови на Украина се безбедни. Би-Би-Си објавува дека позитивните одлуки станаа исклучок, дури и во случаи на тешко болни луѓе.
Слични извештаи за построгите критериуми беа објавени и во други британски медиуми, како што се Гардијан и Телеграф.
Во други делови од Европа, се преиспитува и ставот кон украинските бегалци. Во Германија е предложено намалување на бенефициите, а во Полска расте незадоволството поради начинот на живот на одредени бегалци.
Фото: принтскрин
Свет
Во ЕУ, на граѓаните им се советува да изградат „кризен бункер“

Поранешниот министер за здравство на Латвија, Петерис Апинис, им даде на своите сограѓани необичен, но сериозен совет – однапред да се подготват за можни кризни ситуации и нестабилност.
Во гостувањето на ТВ24, Апинис препорача секое домаќинство да обезбеди скривалиште на својот имот, со закопување цврсто буре на околу десет метри од куќата. Како што нагласи, садот мора да биде доволно отпорен за да не може да се оштети од глодари или влага.
Според него, во такво засолниште е потребно да се стават основни прехранбени производи со долг рок на траење кои не бараат готвење, како и доволна количина вода за пиење. Апинис, исто така, советуваше да се издвои мала количина готовина, бидејќи во услови на сериозни нарушувања, таканаречениот „час X“, банкарските картички би можеле да станат бескорисни.
Поранешниот министер додаде дека во буре треба да се стават и копии од важни документи, како и семејни реликвии како што е антички накит што се наследува, со цел да се зачуваат најскапоцените работи во случај на вонредна состојба.
– Ваквите мерки можат да обезбедат минимум безбедност и континуитет на животот во услови на нестабилност, порача Апинис.
Фото: ЕПА