Европа
Германија одби да ѝ ги испорача моќните крстосувачки ракети „Таурус“ на Украина, тоа е само почеток на проблемот
Германската министерка за надворешни работи Аналена Баербок во петокот ги отфрли повиците за разговори со рускиот претседател Владимир Путин за ставање крај на конфликтот во Украина, и тоа истата недела кога германскиот парламент одби да ѝ испорача крстосувачки ракети „Таурус“ на Украина.
Германската министерка во Советот за безбедност на Обединетите нации во Њујорк во петокот (23 февруари), меѓу другото, рече: „Русија, постојана членка на Советот, сака суверена држава да се откаже од своето право да постои. Каде ќе бевме ако овој принцип преовладуваше. Кој од нас би бил следниот што ќе биде нападнат од безмилосен сосед? Кога би попуштиле, тоа би бил крај за Повелбата на Обединетите нации“, па заклучи: „Затоа нема да ја прекинеме нашата поддршка за Украина, ниту сега ниту утре. Ние стоиме покрај Украина“.
Затоа министерката Баербок отфрли секаква можност за преговори со Путин.
Во саботата (24 февруари) министерката Баербок ја посети Одеса, Украина. Во придружба на украинскиот колега Дмитри Кулеба, Баербок се обиде да ги оправда истовремените повици до Украинците да продолжат со борбите и одбивањето на нејзината коалиција да им ги испорача крстосувачките ракети „Таурус“ на Украинците велејќи дека прашањето е сè уште отворено. Тоа е слаба утеха за Украинците, на кои им снемува сè, па и оружје и муниција.
Аналена Баербок не е само министер за надворешни работи, туку е и истакнат член на Зелените, една од трите партии што ја сочинуваат коалицијата „Семафор“. Другите две се социјалдемократите и либералите. До 22 јануари 2022 година таа беше копретседател на Зелените со Роберт Хабек (актуелен вицеканцелар и министер за економија). И покрај отказот, и двајцата задржаа силно влијание во партијата.
Иако надворешната политика не беше приоритет за германските „зелени“ до последните парламентарни избори, Баербок сепак се согласи да биде министер за надворешни работи. Без речиси никакво искуство во оваа област, таа стана министерка на 8 декември 2022 година. Помалку од три месеци подоцна, Русија почна масовна агресија против Украина. И оттогаш им траат маките на министерката Баербок и коалицијата „Семафор“ што да ѝ се даде на Украина?
Берлин секогаш може да се осврне на фактот дека, по САД, тие обезбедија најмногу воена помош за Украина. Според пресметката на Килскиот институт за светска економија, Германија до 16 февруари оваа година ѝ дала на Украина оружје, муниција и друга воена опрема во вредност од 17,7 милијарди евра. Неодамна вети дека ќе испрати уште 7,1 милијарди евра оваа година, вклучувајќи 36 самоодни хаубици, 120.000 гранати од 155 мм, две батерии од противвоздушниот артилериски систем „Скајнекс“ (првенствено наменети за уништување дронови „камикаѕе“ и крстосувачки ракети) и дополнителни проектили за ракетниот систем ПЗО ИРИС-Т.
Засега на списокот нема тенкови или борбени возила на пешадијата. Не така одамна на Украина ѝ беа ветени 300 „Леопард 2“. Таа доби 105. Наместо „Леопард 2“, украинската армија мораше да се задоволи со 200 одамна застарени „Леопард 1А5“. Ако е вистина дека украинската армија ги изгубила речиси сите „Леопард 2“, какви се шансите да ги преживее многу помалку заштитените „Леопард 1“?
Неодлучната политика на Германија кон Украина е само одраз на нејзината внатрешна безбедносна политика. Додека министерот за одбрана Борис Писториус се бори за зголемување на трошоците за одбрана и враќање на воениот рок, другите негови владини колеги, вклучително и канцеларот Олаф Шолц, прават се за да го забават тоа.
Соочени со суровата реалност дека германските вооружени сили во нивната сегашна состојба не се способни да ја бранат татковината или сојузниците во НАТО, Писториус до неодамна се залагаше за зголемување на распределбите на 2 % од БДП, само првпат да ја спомене во Минхен на безбедносната конференција неопходноста од зголемување на 3 или дури 3,5 % од БДП. Германија одвои 1,57 % од БДП за Бундесверот (официјално име на германските вооружени сили) во 2023 година, а со 68,58 милијарди евра во годинешниот буџет за распределба би достигнал 2,1 % од БДП.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Премиерот Фицо уште е во животна опасност, напаѓачот призна вина
Осомничениот за нападот врз словенечкиот премиер Јурај Цинтула денеска пред Специјализираниот кривичен суд во градот Пежинок призна вина. Состојбата на премиерот Фицо и понатаму е сериозна.
Обвинителството вчера побара притвор за 71-годишниот Цинтула поради евентуално бегство или повторување на кривичното дело. Напаѓачот беше спроведен под силно полициско обезбедување, а ниту на новинарите им беше дозволен влез во Судот.
Премиерот на Словачка, Роберт Фицо на 15 мај беше застрелан во градот Хандалова додека се поздравуваше со насобраниот народ. Цинтула веднаш по нападот е приведен.
Тој се соочува со обвинение за обид за убиство од одмазда, за што е предвидена казна од 25 години до доживотен затвор.
Словачките политичари изјавија дека нападот врз Фицо не е политички мотивиран.
Европа
Професорка во Британија осудена за сексуална експлоатација на ученици, забременила со еден од нив
Професорка е прогласена за виновна за сексуално искористување на двајца тинејџери на кои им предавала во нивното средно училиште во Велика Британија. 30-годишната Ребека Џојнс ја дочека пресудата на слобода, но беше суспендирана од работа во училиштето.
Британските медиуми јавуваат дека Џојнс веќе била суспендирана и пуштена со кауција поради секс со 15-годишен ученик, идентификуван во пресудата како Момче А, кога почнала да има секс со друг ученик, момче Б, со кој подоцна останала бремена, пишува „Independent“.
На судот му било кажано дека и двете момчиња и праќале флертувачки пораки на „Snapchat“ пред таа да ги покани во нејзиниот стан.
Во случајот со првото момче, таа му го дала телефонскиот број, а како вежба за решавање проблеми, тој морал да ја погоди последната цифра. После тоа се поврзале на Снепчет и тој и праќал пораки во кои парот се договарал да се сретнат тајно.
Таа потоа го однела на шопинг и му купила скап појас. Полицијата подоцна ја пронашла неговата сперма во нејзината постелнина. Второто момчпе кажало дека врската со професорката започнала со бакнежи кога имал 15 години и со сексуални односи кога наполнил 16 години.
Џојнс пред судот се бранеше дека доживеала „нервно растројство“ кога била суспендирана од работа, по полициската истрага, и се вратила кај нејзините родители.
Џојнс на суд тврдеше дека никогаш немало сексуална активност со првото момче и дека врската со второто момче се развила додека таа била суспендирана од работа.
Таа плачела додека им кажувала на поротниците дека бебето што го родила и е одземено неколку часа по раѓањето и сега ѝ е дозволено да го гледа детето само три пати неделно. Таа беше прогласена за виновна по шест точки од обвинението за сексуална експлоатација на малолетници.
Европа
Словачкиот министер за одбрана: Премиерот опериран по втор пат, пациентот е стабилен, земјата е стабилна
Словачкиот премиер Роберт Фицо беше опериран по втор пат по атентатот во средата, кога се здоби со прострелни рани во стомакот и „е во стабилна состојба со навестувања за напредок, исто како што Словачка е стабилна“, изјави вицепремиерот и министер за одбрана, Роберт Калињак.
„Земјата е стабилна, пациентот е стабилен денеска. Можеме да ги направиме сите работи што треба да ги направиме како влада. А ние имаме свој премиер и тоа на сите ни е јасно“, изјави Калињак за новинарите во болницата каде што е Фицо.
Мирјам Лапуњикова, директорка на болницата Рузвелт во тој град во централна Словачка, најблиската добро опремена болница до Хандлова, каде што 71-годишен Словак во средата испука пет истрели кон премиерот, рече дека денешната операција траела два часа за отстранување некротично ткиво, што е вообичаена постапка при за такви повреди.
„Премиерот останува на интензивна нега, а неговата состојба се уште е многу сериозна. Лекарите се среќаваат и се консултираат секое утро и затоа денеска не можат да кажат дали ќе бидат потребни дополнителни операции“, рече Лапуњикова.
Лекарскиот совет в понеделник ќе одлучи дали и кога ќе можат да го превезат премиерот во Братислава.
Вицепремиерот Калињак се заблагодари за сите понуди за лекување на Фицо во странство и истакна дека Владата има целосна доверба во лекарите во Банска Бистрица.
„Ќе бидат потребни уште неколку дена додека не биде јасно како ќе се развива здравјето на премиерот. Порасположен сум бидејќи гледам напредок. При денешната интервенција се покажа дека главната операција била успешна“, рече Калињак.
Министерот за внатрешни работи Матуш Шутај Ешток денеска изјави дека во 40 случаи полицијата ги открила и гонела оние кои им се заканувале на политичарите со атентат и со говор на омраза на социјалните мрежи.
Лидерот на десноцентристичката опозициска партија Прогресивна Словачка, Михал Шимечка денеска поднесе кривична пријава поради драстични закани кон него и неговото семејство.
„Ги има повеќе. За жал, ова не е ништо ново. Слични закани доби и претседателот на Словачка, а слични закани денеска добиваат и мнозинството политичари, новинари и јавни личности кои го искажуваат својот став. Омразата раѓа омраза“, рече Шимечка.
Лидерот на опозицијата го повтори повикот до сите на словачката политичка сцена да се договорат, барем 100 дена да не се напаѓаат и за тоа време да се договорат за нови правила на политичка комуникација.
Надлежниот обвинител денеска побара притвор за осомничениот за атентатот, обвинет за обид за убиство на заштитено лице мотивирано од одмазда, за што му се заканува казна од 25 години или доживотен затвор.
Судот во сабота ќе го сослуша Јурај Цинтула и ќе одлучи за притворот.