Европа
Европските лидери едногласни: „Русија ќе одговара за војната против Украина“

Лидерите на многубројни европски земји, главно од ЕУ, ветија на самитот на Советот на Европа (СЕ) во Исланд дека Русија ќе одговара за војната против Украина попатно откривајќи го механизмот со кој ќе се следат загубите и штетата предизвикана за време на руските напади, објави „Ројтерс“.
На самитот се обрати и претседателот на Украина, Володимир Зеленски, кој се приклучи преку видеоврска.
„Пред една година не можевме да ги собориме повеќето терористички ракети, особено балистичките. И сега прашувам едно. Ако сме способни да го направиме тоа денес, има ли нешто што не можеме да направиме?“, рече Зеленски.
Русија негира дека намерно гаѓала цивили за време на бомбардирањето на украинските градови.
На состанокот се разговарало и за решавање други прашања, вклучително и за наводното отстранување илјадници деца од Украина во Русија, што Киев и неговите сојузници го нарекуваат нелегална депортација.
„Сега е моментот да возвратиме. Демократиите како нашата мора да создадат отпор за да можеме да ги совладаме оние што воведуваат нестабилност. Ќе ја сметаме Русија одговорна за страшните воени злосторства што беа извршени и мора да ги научиме лекциите од оваа војна – со тоа што ќе бидеме подготвени да се соочиме со заканите за нашето општество пред тие да станат преголеми“, рече британскиот премиер Риши Сунак.
Германскиот канцелар Олаф Шолц изјави дека Советот на Европа е важен и дека мора „да ги казни воените злосторства на руските окупатори и да бара одговорност за големата штета што Русија ѝ ја нанесува на Украина од ден на ден“.
Кабинетот на францускиот претседател Емануел Макрон соопшти дека Банката за развој на Советот на Европа (ЦЕБ) може да им излезе во пресрет и да им помогне на Украинците што се во неволја.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
(Видео) Украинците објавија снимка: „Со беспилотно летало уништивме моќен руски дрон во лет“

Украинските сили соборија руски повеќенаменски дрон Zala Kub со помош на беспилотно летало FPV, а снимката од акцијата беше споделена на социјалните мрежи од украинскиот волонтер Серхи Стерненко, пренесува „Милитарњи“.
„Таквото летало можеше да предизвика голема штета, па затоа е одлично што беше уништен во воздух“, рече Стерненко.
Zala Kub е дизајниран за прецизни удари на копнени цели – кога ќе ги открие, вертикално навлегува и исфрла експлозивен товар на горниот дел од возилото, каде што тенковите и оклопните возила се најранливи поради нивниот потенок оклопен слој.
Ова беспилотно летало е развиено од рускиот концерн „Калашников“, а првпат беше прикажано во 2019 година на меѓународната воена изложба IDEX во Обединетите Арапски Емирати.
Украина долго време користи беспилотни летала FPV како пресретнувачи за уништување руски летала. Ваквите дронови, во зависност од опремата, како дневни и термални камери, чинат меѓу 1.600 и 2.500 долари. Тие може да летаат со брзина до 160 километри на час, да имаат дострел до 35 километри и да останат во воздухот до еден час.
Европа
Судот ќе ја изрече пресудата за Депардје во мај

Кривичниот суд во Париз во четвртокот објави дека на 13 мај ќе ја изрече пресудата за актерот Жерар Депардје за сексуално вознемирување две жени за време на снимањето филм во 2021 година.
Француското Обвинителство во четвртокот побара 18-месечна условна казна и глоба од 20.000 евра за Депардје, објави весникот „Ле Паризиен“ и другите медиуми.
Седумдесет и шестгодишниот Депардје, истакната личност во француската кинематографија, е обвинет за сексуално вознемирување две жени за време на снимањето филм од 2021 година. Ова е првпат актерот, кој се соочува со многубројни обвинувања за сексуално вознемирување во текот на годините, да биде изведен пред суд.
Депардје призна дека ја фатил една од жените за бутот, но негира дека тоа е напад. Неговиот адвокат рече дека наводите против клиентот се лажни и дека истражителите биле пристрасни.
Европа
(Видео) Нереални снимки од протестот: Пикачу ги поддржа граѓаните во Турција

Надреално видео од Покемон кој наводно бега од полицијата за време на протестите во Турција стана вирална. Имено, некој облечен како Пикачу е снимен како бега од полицијата која брка демонстранти. Снимката наводно е направена во Анталија.
Виралното видео, кое нашироко се споделува на социјалните мрежи, се чини дека потекнува од турскиот фоторепортер Исмаил Коцероглу.
Исмаил во четвртокот објави видео на својот Инстаграм профил, на кое се гледа како костимиран демонстрант бега со толпа граѓани.
Дали е автентична снимката на која Пикачу бега од полицијата не е потврдено.
Сепак, Исмаил продолжи да поставува видеа од овој маскиран демонстрант. Синоќа, тој повторно објави видео од Пикачу како шета низ улиците на Анталија, наведувајќи дека Пикачу „се приклучил на осмиот ден од демонстрациите“.