Свет
Екстремната десница може да победи на изборите во Шпанија

Очите на Европа утре ќе бидат насочени кон Шпанија, каде што многу е очекувана победа на десницата на вонредните избори. Тоа може дополнително да ја консолидира доминацијата на конзервативните партии како блок.
Предвремените избори што ги распиша социјалистичкиот премиер Педро Санчез, откако левицата беше поразена на локалните избори на 28 мај, може да доживеат екстремната десница да заземе дел од власта за прв пат по завршувањето на диктатурата во Шпанија во 1975 година.
Анкетите покажуваат дека следната шпанска влада ќе биде коалиција на десничарската Народна партија и екстремно десничарскиот Вокс.
Доколку анкетите се покажат како точни, тоа би го потврдило „постепеното воспоставување на крајната десница на европско ниво“, вели Стивен Форти, професор на Автономниот универзитет во Барселона.
За Санчез, кој е на власт од 2018 година и ја предводи левичарската коалиција со левичарскиот Подемос, влогот е голем.
Според Ројтерс, гласачите низ целата земја главно не се расположени за ниту една партија и размислуваат да гласаат за најмалку лошиот избор.
Ова се огледува и во анкетите, според кои околу 12,5 отсто од луѓето кои планираат да гласаат, се уште се неопределени.
Изборите ќе имаат последици и за европската левица.
„Јасно е дека има поместување (надесно) и Шпанија е многу важен бастион против оваа регресивна и реакционерна струја“, изјави министерката за екологија Тереза Рибера за весникот Ла Вангардија.
По триумфот на Народната партија на 28 мај, партијата на Алберто Нуњез Фејо се чини дека оди кон чиста победа на специјалните избори на 23 јули.
Но, анкетите покажаа дека дури и да победи Народната партија, таа ќе го загуби апсолутното мнозинство од 176 пратенички места во 350-члениот парламент, што значи дека ќе ѝ треба поддршка од Вокс за да владее.
Ултранационалистите се и еврофобични. Вокс се појави во 2013 година како производ од расколот во Народната партија, за да влезе во парламентот во 2019 година како трета по големина партија во Шпанија.
Импулсот на десницата сепак забави додека Народната партија и Вокс преговараа за владеење во неколку региони кои беа „освоени“ од левицата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Жерар Депардје прогласен за виновен за сексуален напад

Суд во Париз го прогласи францускиот актер Жерар Депардје за виновен за сексуален напад врз две жени на филмски сет во 2021 година, во еден од најзначајните случаи на #MeToo што се појавиле пред судовите во Франција, објави Си-ен-ен.
Депардје, истакната личност во француското кино, постојано негираше каква било вина за време на судењето, а неговиот адвокат побара отфрлање на обвиненијата.
На судењето, тој изјави дека медиумите ги искористиле обвинувањата за да му го нарушат угледот. Тој го критикуваше движењето #MeToo.
„Ова движење ќе се претвори во терор“, рече тој.
Сепак, судијата Тиери Донард го сметаше објаснувањето на Депардје, за инцидентот, неубедливо.
Државното обвинителство побара од судот да му изрече условна казна затвор од 18 месеци на 76-годишниот Депардје и парична казна од 20.000 евра.
Судењето на Жерар Депардје се смета за пресвртница за француската филмска индустрија, која со години беше обвинувана дека е бавна – па дури и отпорна – на обвинувањата за злоупотреба од страна на жените.
Во извештајот на францускиот парламент објавен минатиот месец се заклучува дека сексуалното насилство и сексуалното вознемирување остануваат „ендемски“ во француската забавна индустрија и дека жените и децата сè уште се редовно изложени на предаторско однесување.
Свет
Франција, Велика Британија и Германија не сакаат да го запрат конфликтот во Украина, оценува Русија

Франција, Велика Британија и Германија не сакаат да го запрат конфликтот во Украина, туку се обидуваат да го пролонгираат, изјави за ТАС рускиот заменик-министер за надворешни работи Александар Грушко.
„Очигледно е дека овие земји се обидуваат да го продолжат конфликтот. Ако го отстраниме вербалното пакување во кое ги презентираат своите политички потези, нивната главна цел е пораз на Русија на бојното поле, меѓународна изолација, економско задушување и промена на режимот. Во сите овие области тие доживеаа целосен неуспех, но тоа не ја намалува нивната решителност да ги постигнат своите цели“, рече Грушко.
Тој додаде дека овие три земји имаат намера да извршат притисок врз Русија во врска со предлогот на претседателот Владимир Путин за преговори во Истанбул. Тој исто така рече дека е тешко да се коментираат ставовите на европските политичари, бидејќи, според него, „тие се менуваат брзо и често“.
„Пред три недели тие го кажаа сосема спротивното. Ќе ве потсетам дека францускиот претседател Емануел Макрон рече дека Франција не поддржува кревко примирје. 30 дневно примирје, не е ли тоа кревко? Значи, денес велат едно, утре друго“, рече Грушко, пренесува Танјуг.
Според него, европските земји во голема мера го следат политичкиот правец што доаѓа од Соединетите Американски Држави.
„Бродот на Европската Унија сега плови под едрата што ги движат ветровите од Запад“, рече тој. Сепак, Грушко истакна дека „гласовите на разумот“ се слушаат сè повеќе и повеќе во Европа. „Тоа можевме да го забележиме за време на одбележувањето на 80-годишнината од Големата победа. Верувам дека ќе има сè повеќе и повеќе такви гласови“, заклучи тој.
Европа
Пожар избувна во куќата на британскиот премиер, уапсен е млад човек

Дваесет и едногодишен маж е уапсен под сомнение дека го запалил домот на британскиот премиер Кир Стармер во северен Лондон. Полицијата се сомнева дека пожарот бил подметнат со „намера за загрозување на животот“. Метрополитенската полиција потврди дека осомничениот е уапсен во раните утрински часови и е во притвор.
Апсењето е поврзано со три одделни пожари што се случија во северен Лондон во текот на изминатата недела: пожар на приватна адреса во Кентиш Таун, запалено возило и уште еден пожар на влезот во друга зграда.
Полицијата соопшти дека бидејќи куќата била поврзана со добро позната јавна личност, истрагата ја презел одделот за борба против тероризмот на Метрополитенската полиција. „Во тек е истрага за да се утврди што го предизвикало пожарот“, соопшти полицијата. „Сите три пожари во овој момент се третираат како сомнителни.“
Иако Кир Стармер живее на Даунинг стрит како британски премиер, тој сè уште ја одржува својата приватна адреса во северен Лондон. Влезот во куќата беше оштетен, но немаше повредени.
Еден од жителите на улицата рече дека слушнал силен тресок што звучел „како молотов коктел“.
Портпаролот на Лондонската противпожарна бригада потврди дека биле повикани поради мал пожар пред куќа во Кентиш Таун во понеделник наутро. На местото на настанот беа испратени две противпожарни возила од локалната станица.
Кабинетот на премиерот соопшти дека Стармер е благодарен на службите за итни случаи за нивниот брз одговор, но дека поради истрагата, која е сè уште активна, не може да даде дополнителни коментари.