Свет
Загина рускиот пејач што го критикува Путин

Основачот на поп-групата чија песна стана химна за време на антивоените протести во Русија почина во неделата на 34-годишна возраст, пишува „Њузвик“.
Пејачот Дима Нова, чие вистинско име е Дмитриј Свиргунов, ја основа популарната група Cream Soda, која во песната „Аква диско“ ја критикува наводната палата на рускиот претседател Владимир Путин вредна 1,3 милијарда долари.
Споменатата песна често се пееше на протестите пред и во раните денови на руската воена инвазија на Украина, а протестите бргу станаа познати како „Аква диско забава“.
Свиргунов паднал во мраз додека ја минувал реката Волга во регионот Јарослав, пишува „Медуза“. Во моментот на несреќата тој бил во друштво со својот брат и уште двајца пријатели. Веста за неговата смрт ја потврдија во понеделникот од групата Cream Soda на „Инстаграм“.
„Синоќа, се случи трагедија. Нашиот Дима Нова се движеше по Волга во друштво на пријатели и падна во мразот. Министерството за вонредни состојби сè уште трага по неговиот брат Рома и пријателот Гоша Киселев. Аристарх, нашиот пријател кој исто така падна во мразот, беше пронајден, но немаше начин да го спаси. Веднаш штом ќе имаме информација од Министерството за вонредни состојби, ќе ве информираме“, напишаа од групата.
Членовите на групата станаа икони на антивоеното движење кога рускиот комичар Александар Гудков искористи една од нивните песни за да се потсмева на Путин, кој е обвинет за изградба на раскошна палата во близина на градот Геленџик, вредна 1,3 милијарда долари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Авион кружел во воздухот, а потоа се вратил на местото на полетување во САД

Авион на американска авиокомпанија на лет од Портланд до Лас Вегас бил принуден да се врати на меѓународниот аеродром во Портланд бидејќи по полетувањето биле забележани чад и необични мириси во пилотската и патничката кабина, соопштија локалните власти.
Авионот полетал во 9 часот и 10 минути и бил во воздух околу 40 минути додека не се пренасочил назад кон аеродромот во Портланд за евакуација, покажуваат официјалните документи за овој лет, кои ги објави локалната телевизија „Коин канал 6“.
„Авионот слета безбедно и немаше пожар или друга непосредна закана за безбедноста. Во тек се медицински контроли на екипажот и патниците“, се наведува во официјалното соопштение на аеродромот во Портланд.
Потврдено е дека нема повредени и дека се проверува авионот, пренесуваат светските медиуми.
Регион
Маж се разнесе со бомба пред продавница во Хрватска

Денес, нешто пред 18 часот, маж се разнел со бомба пред локална продавница во Дарда.
Порталот „СиБ“ пишува дека на случката сведочеле минувачите и вработените во продавницата. Во близина немало деца кои го посетуваат училиштето, кое е оддалечено помалку од еден километар од местото на настанот.
Жител на Дарда за „СиБ“ изјавил дека станува збор за маж кој заедно со друго лице често поминувал време пред продавницата.
„И двајцата постојано седеа пред продавница и пиеја. Тие се во тешка социјална ситуација, очигледно се психички нестабилни и би рекла дека тоа е негрижа за овие луѓе“, вели жителка на ова место и додава дека наставниците ги чувале децата во училиштето.
Според СиБ, работничките во продавницата не се повредени.
Во тек е полициска истрага.
Свет
Британски милијардер: Трамп има неколку часа да ја исправи огромната грешка со царините

Ричард Бренсон, британскиот милијардер и сопственик на авиокомпанијата „Вирџин Атлантик“, остро ја критикуваше американската влада за ненадејното воведување нови царини, истакнувајќи дека пазарната реакција на тој потег била „и предвидлива и можела да се спречи“.
Во низа објави на социјалната мрежа Икс тој предупреди на сериозните последици за американската и светската економија.
„Дури и да се согласувате со основната идеја на овие царини, требаше да се направи се за да им се овозможи на американските компании да имаат доволно време да се приспособат“, напиша Бренсон.
Тој вели дека пазарите реагирале панично, а последиците се веќе видливи.
„Финансиските пазари ширум светот сега се во слободен пад, со катастрофални последици за обичните Американци и остатокот од светот. Пензионерските заштеди на Американците масовно ќе исчезнат“, рече Бренсон.
Како што доларот слабее, додава тој, се очекува зголемување на цените за американските потрошувачи. Во исто време, многу мали и средни компании веќе банкротираат или се на тој пат.
„Ова не е победничка стратегија на долг рок. Владата на САД сè уште може да ги промени работите, но мора да дејствува во следните неколку часа“, нагласи Бренсон.