Свет
Зеленски: „Ако САД ја прекинат помошта за Украина, Европа нема да успее сама“

Украинскиот претседател Володимир Зеленски верува дека доколку САД ја прекинат помошта за Украина, Европа нема да може сама да ја пополни празнината.
Зеленски наведува дека верува оти тоа нема да се случи.
Зеленски, во интервју за германската телевизија АРД, одговарајќи на прашањето што би се случило доколку САД престанат да ѝ помагаат на Украина и дали Европа би успеала да пополни таква празнина, рече дека верува оти тоа нема да се случи и дека Европа нема да биде оставена сама, пренесува „Унијан“.
Тој наведе дека прашањето е сложено бидејќи Европа сама нема да може да ја пополни празнината и кога станува збор за оружјето и за финансиите, бидејќи, како што објаснува, Европа, доколку е обединета, веројатно би успеала да ѝ даде доволно поддршка на Украина, но САД имаат влијание и кога од нив доаѓаат сигнали кои „не се многу позитивни“, тие го имаат истото влијание врз некои европски лидери.
Според него, ако се случи САД да ја одложат поддршката, тоа ќе влијае на обединета Европа.
Тој смета дека тоа би довело до недостиг на оружје и финансии и дека ќе се изгуби сојузот меѓу Соединетите Американски Држави и Европа.
„Трето, самата Европа ќе разбере дека ова е сигнал, ако Украина не издржи и рускиот претседател Владимир Путин тргне напред, од Соединетите Американски Држави дека Европа ќе остане сама меѓу земјите на НАТО“, оценува Зеленски.
Тој додава дека ќе биде сериозна закана тоа што Путин тоа ќе го искористи сто проценти и дека тоа е исто така сигнал што ќе покаже дека НАТО нема да биде толку силен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.