Свет
Кина мора да стави крај на затвореничките кампови во Сјинџијанг
Законодавците од власта и опозицијата во Германија ја повикаа Кина да стави крај на репресивната политика што ја води против муслиманите во северозападен Сјинџијанг.
Опозицијата „Зелена партија“ ги обвини властите во Кина за сериозно прекршување на човекови права, присилна политичка доктрина и постојан надзор на регионот.
„Приближно еден милион лица без причина се приведени во затворенички кампови во североисточниот кинески регион Сјинџијанг“, изјави Маргарет Баузе од Зелената партија за време на една парламентарна дебата во врска со ситуацијата нарушување на човековите права во Сјинџијанг.
Баузе упати остри критики до властите кои вршат репресивна политика во однос на верската слобода.
„Молењето е забрането, џамиите демолирани. Целта на овие мерки е системско елиминирање на културата и идентитетот на муслиманското малцинство во Сјинџијанг“, додава таа.
Штефан Либих од опозициската левичарска партија изјави дека приведувањето на еден милион луѓе во затворенички кампови во Сјинџијанг е неприфатливо. Либих додава дека е разбирливо дека Кина стравува за стабилноста на земјата и заканата од тероризам.
„Сепак, тоа не е оправдание за постојан надзор, шпионирање, затворенички кампови и измачување“, посочи Либих.
Михаел Бранд, од партијата Христијанска демократска унија на канцеларката Ангела Меркел, даде ветување дека владата ќе продолжи да работи на прашањето за човековите права.
„Под изговор дека се работи за борба против тероризам, бруталната репресија и нарушувањето на човековите права продолжува во Сјинџијанг“, посочи Бранд.
Бранд упати критика до властите на Кина кои тврдат дека затвореничките кампови се всушност „стручни образовни центри“ и нагласи дека овие објаснувања се далеку од веродостојни.
Коалицискиот партнер на Меркел, СДП, се придружи кон повиците за Кина да ги затвори овие кампови.
„Кога ги читаме извештаите од активистите за човекови права добиваме впечаток дека Сјинџијанг се претвора во затвор на отворено“, вели Франк Швабе од Социјал-демократската партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Русите уапсија двајца нивни војници за грозоморни злосторства
Двајца руски војници се приведени под сомнение дека убиле пет лица во окупираниот дел од областа Херсон. Александар Осипов и Александар Кајгородцев веќе ги признале злосторствата што ги направиле во селата Подо-Калиновка и Абрикосовка, пишува рускиот медиум Ура.ру.
Меѓу жртвите се двајца полицајци и началникот на селото Љубов Тимчак, кој е назначен од Русија. Телото на началникот било пронајдено во средата, а на него биле видливи рани од огнено оружје, оган и експлозивни направи.
Полицијата набрзо добила дојава од заменик началникот на округот Алешински за откривање на уште две изгорени и осакатени тела на маж и жена. Безбедносните сили ги уапсиле осомничените истиот ден, а набрзо се испоставило дека станува збор за руските војници Александар Осипов и Александар Кајгородцев.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.