Европа
Малта: Уапсен ексшефот на кабинетот на премиерот во врска со убиството на новинарката
Поранешниот шеф на кабинетот на премиерот на Малта, Кит Шембри, е уапсен во рамки на истрагата за убиството на новинарката Дафне Каруана Галиција во 2017 година.
Извори од полицијата навеле дека тој два дена по ред е на сослушување во рамки на истрагата за убиството на новинарката.
Шембри вчера поднесе оставка под притисок од јавноста поради наводни финансиски врски со бизнисменот Јорген Фенех, кој минатата недела, исто така, беше уапсен во врска со убиството на Дафне.
Полицијата не соопштува зошто Шембри е уапсен ниту дали е осомничен во случајот. Засега ниту Шембри нути Фенех јавно не се огласија по апсењата.
Фенех беше задржан во притвор пред една недела откако се обиде да ја напушти Малта со јахта, еден ден откако медиумите во Малта објавија дека е уапсен Мелвин Теума, наводен посредник во убиството, кој, пак, во понеделникот беше помилуван од претседателот во замена за информации за случајот.
Три лица чекаат судење за поставување на бомбата под автомобилот на новинарката, а полициски извори велат дека дошло до голем напредок во истрагата за тоа кој го нарачал убиството.
Дафне Каруана Галиција, една од најпознатите истражувачки новинарки во Малта, беше убиена во експлозија на бомба на 16 октомври 2017 година поставена под нејзиниот автомобил паркиран пред нејзината куќа. Таа на својот блог објавуваше текстови за корупција во која биле вмешани членови на владата на премиерот Џозеф Мускат, меѓу кои и Шембри.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.