Свет
Научниците вознемирени од нов вид коронавирус, позаразен и посмртоносен
Новиот вид коронавирус, кој научниците го нарекоа „ѓаволски“, се чини дека е посмртоносен, полесно се шири и вакцините можеби не се доволно ефикасни против него, пишуваат светските агенции.
Научниците го означија овој вид, кој доаѓа од Калифорнија, како „ѓаволски“ по нивните алармантни откритија.
Новиот вид се вика Б.1.427 / Б.1.429 и првпат беше забележан во Калифорнија оваа зима.
Варијантата е пронајдена во Данска, Мексико и Тајван.
Научниците внимателно го проучувале и првите откритија предизвикале загриженост.
Во научните трудови е наведено дека лабораториските истражувања откриле дека варијантата е „барем 40 проценти поефикасна во инфицирање на човечки клетки“ во споредба со претходните соеви.
„Ѓаволот е веќе тука. Посакувам да беше поинаку. Но, науката е наука“, рече д-р Чарлс Чи, вирусолог од Универзитетот во Калифорнија, Сан Франциско.
Тој и неговиот тим откриле дека ризикот од смрт со овој вид коронавирус е поголем.
Лабораториски студии исто така откриле дека антителата во крвта на луѓето кои претходно биле заразени со корона или биле вакцинирани не делувале толку добро за да го убијат калифорнискиот вид на вирусот корона.
Ова може да значи дека варијантата е потенцијално способна да избегне вакцини или да ја направи нивната ефикасност послаба, велат научниците.
Некои истражувачи кои не беа вклучени во новата студија изјавија дека варијантата во Калифорнија сепак не претставува толку голема опасност како другите варијанти на коронавирусите.
„Не е толку голема работа. Јас сум сè поубеден дека овој вид се пренесува повеќе од другите локално. Но, нема докази што сугерираат дека тој е на ист стадион како и видот Б.1.1.7 на Кент“, рече Вилијам Ханаџ, епидемиолог од Харвард.
Откриено е дека видот Кент, кој стана доминантен во Велика Британија, е до 70% побрзо пренослив и помеѓу 30 и 90% повеќе смртоносен од другите видови на коронавирус.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.