Политиката на САД и нивните сојузници од НАТО и ЕУ може да доведе до обоени револуции во Централна Азија, изјави заменик-министерот за надворешни работи на Русија, Михаил Галузин на отворањето на четвртата Централноазиска конференција на меѓународниот клуб за дискусија „Валдај“.

„Соединетите Американски Држави и НАТО се обидуваат да ги вклучат земјите од Централна Азија во таканаречените партнерски програми и обуки, тие не престануваат да навлегуваат на териториите на регионот во рамките на заедничките вежби, како и од распоредувањето на инфраструктурата во нив. Гледаме и дека во Вашингтон и Брисел играат нефер игра за да ја решат главната задача – да добијат пристап до базата на ресурси на регионот и контрола врз транспортните артерии лоцирани до него, како и врз користењето на водата. Тргнуваме од фактот дека по постигнувањето на овие цели, владите на земјите од Централна Азија ќе престанат да бидат придружници на Западот, па, соодветно, и опасноста од обоени револуции, кои, како што е познато, Западот нашироко ги практикува, ќе се манифестира нашироко“, објасни Галузин.

Во тој поглед, тој истакна дека Русија била и продолжува да биде сигурен партнер на земјите од Централна Азија.

Истовремено, тој оцени дека овие земји се свесни за сите ризици и потенцијални штети од зближувањето со Западот и приклучувањето кон антируските санкции.

„Стратешката пресметка на нашите непријатели е очигледна – тие сакаат да предизвикаат раздор меѓу Русија и земјите од Централна Азија. Очигледно е дека во странство и во Брисел наивно веруваат дека земјите од Централна Азија нема да се спротивстават на западната експанзија“, изјави дипломатот, пренесува Спутник.

Американскиот државен секретар Ентони Блинкен денеска во Киев објави дека дел од новиот пакет помош од САД веќе пристигнал во Украина и дека наскоро се очекува да пристигнат уште пратки.

Блинкен ова го изјави на средбата со украинскиот претседател Володимир Зеленски во Киев, каде претходно денеска пристигна во ненајавена посета.

„Помошта ќе направи вистинска разлика во тековната борба против руската агресија на бојното поле“, рече тој.

Зеленски ја пофали „клучната“ помош на САД и посочи дека најголемиот дефицит на украинско оружје е противвоздушната одбрана, пренесува Ројтерс. Тој му истакна на Блинкен дека на Украина и се потребни две батерии за противвоздушна одбрана за североисточниот град Харков, кој е цел на руски воздушни напади.

Блинкен ја прави својата четврта посета на Украина од почетокот на војната во 2022 година, а целта на посетата е да го увери Киев дека ја има американската поддршка додека се бори да се одбрани од сè поинтензивните руски напади. Стејт департментот објави дека Блинкен ќе разговара со украинските претставници за „ситуацијата на првата линија, влијанието на новата безбедносна и економска помош на САД, долгорочните безбедносни и други обврски и охрабрувањето на економското закрепнување на Украина“, пренесува АП.

Комесарот за соседска политика и проширување на Европската Унија (ЕУ), Оливер Вархељ, по средбата со српскиот премиер Милош Вучевиќ во Белград, најави дека денешните клучни одлуки „ќе ги обликуваат следните пет години“.

Вархељ, кој претходно се сретна со српскиот претседател Александар Вучиќ, на X напиша дека се сретнал со Вучевиќ и со членовите на неговиот кабинет.

„Ова е критична година. Следните пет години ќе се обликуваат врз основа на денешните клучни одлуки. Нема време за губење“, напиша Вархељ.

Тој додаде дека детаљно разговарал за отворените прашања од реформската агенда во владата на Србија, кои треба да бидат финализирани во наредните денови.

„Разговаравме и за планот за раст. Диверзификацијата на гасот е најитното прашање. Тоа има значително влијание врз иднината на енергетската безбедност на Србија“, напиша тој.

До изградбата на гасоводот со Бугарија, кој делумно беше финансиран од ЕУ, Србија се потпираше исклучиво на увоз на гас од Русија.

Овој гасовод беше пуштен во пробна работа во декември 2023 година и Србија преку него ќе купува гас од Азербејџан.

Властите во Србија делумно го оправдаа својот став да не воведуваат санкции кон Русија со нивната зависност од рускиот гас.

На прес-конференцијата по средбата со премиерот на Србија, Оливер Вархељ изрази надеж дека новата влада на Србија ќе го забрза патот на земјата кон Европската Унија, јавува Радио-телевизија на Србија (РТС).

Во владата на Србија беше потпишан договор со кој Европската Унија ќе донира десет милиони евра за втората фаза од програмата „Обновливи извори на енергија – развој на пазарот на биомаса во Србија“.

Проектот ќе им овозможи на топланите во неколку локални самоуправи да се префрлат на користење биомаса како извор на енергија, што на нивните граѓани ќе им донесе сигурно снабдување и поздрава животна средина.

Вархељ, како што е најавено, во вторник ќе разговара и со министерот за надворешни работи, Марко Ѓуриќ, и со министерот за внатрешни работи, Ивица Дачиќ.