Нов скандал избувна во Австралија откога многу патници се пожалија дека обезбедувањето на аеродромот без објаснување им ги одзело мобилните телефони и побарале шифри за нив.

Еден од патниците за „Гардијан“ рекол дека морал да го предаде мобилниот телефон и да ја напише шифрата на хартија, штом пристигнал во Австралија по десетдневен престој на Фиџи.

Весникот наведува дека обезбедувањето ги носи одземените телефони во службените простории, каде што се чуваат околу половина час. Причината за ваквото однесување е непозната.

„Не сме информирани зошто сакаат да ни ги проверат мобилните телефони. Ништо не ни кажале. Ова е страшно нарушување на приватноста. Којзнае што виделе. Кога имаат мобилни телефони и лозинки, имаат пристап до сè, историја на е-пошта, зачувани лозинки, банкарски сметки, здравствено осигурување“, вели еден патник.

Се утврди дека австралиската гранична служба може легално да одземе мобилен телефон на секој што ќе влезе во земјата, без разлика дали се Австралијци или не.

Портпаролот на граничните власти објасни дека се работи за заштита на австралиската заедница и дека информациите собрани на овој начин резултирале со успешни операции против нелегални активности.

Новинарите и активистите за човекови права ја осудија оваа практика нарекувајќи ја одвратна и силеџиска, а владата диктаторска.

„Ова е навистина загрижувачки, тоа не треба да се случува во Австралија“, вели активистката Софи Мекнил.

Новинарите особено имаат проблем со оваа практика бидејќи мораат да ги заштитат своите извори и другите доверливи информации.

Австралија во последните денови е во центарот на вниманието поради неколкудневното малтретирање на најдобриот светски тенисер Новак Ѓоковиќ.