Европа
Пожари во Франција, температури до 47 степени
Пожарите во Франција, Грција, Португалија, Шпанија и Хрватска уништија илјадници хектари земја и принудија илјадници жители и туристи да се евакуираат. Ова е втор топлотен бран што погоди делови од Европа во изминатите неколку недели.
Научниците ги обвинуваат климатските промени и предвидуваат почести и поинтензивни епизоди на екстремни временски услови како топлотни бранови и суша.
Франција се подготвува за врвот на топлотниот бран што ја зафати земјата овој понеделник, додека шумските пожари продолжуваат да беснеат низ Стариот Континент. Синоптичарите издадоа највисока тревога за екстремни температури во дури 15 делови во Франција, вклучително и Жиронд на југозапад, каде што пожарите веќе направија хаос.
Во Франција, во шумата Ландес во регионот Аквитанија, температурите беа над 42 степени Целзиусови, според синоптичарот Оливие Пруст. А Бретања, која до неодамна ги избегнуваше најлошите горештини, може да забележи температура од 40 степени Целзиусови, велат експертите, што би било рекорд за регионот.
Во неделата пожарите во Жиронд, кои беснеат од вторникот, веќе уништија 13.000 хектари земја. Тие беа предизвикани од силните ветрови и принудија на евакуација 16.200 туристи, соопштија пожарникарите.
„Ќе има апокалиптична топлина во одредени области на југозапад“, изјави за AFP синоптичарот Франсоа Гуран од Метео-Франко. Температурите низ земјава се очекува да бидат над 30 Целзиусови степени, а во западната половина од земјава од 38 до 40 степени.
Официјални лица во неколку региони оттогаш исто така издадоа предупредувања за загадување поради високите концентрации на озон.
Во Шпанија, властите известија за околу 20 шумски пожари кои сè уште беснеат во различни делови на земјата, од југ до Галиција на крајниот северозапад, каде што пожарот уништи околу 4.500 хектари земја.
Во пожарите веќе загинаа неколку лица за брза помош од минатата недела, пренесуваат агенциите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Британска компанија ги тужи „Фајзер“ и „Бионтек“: Ја украдоа нашата технологија за вакцина против Ковид
Британската фармацевтска компанија GlaxoSmithKline (GSK) денеска поднесе тужба пред федералниот суд во Делавер против американскиот Pfizer и германскиот BioNTech, тврдејќи дека тие ги прекршиле нејзините патенти за технологијата на гласник РНК (mRNA) во нивните вакцини против Ковид-19.
Вакцините Comirnaty на Pfizer и BioNTech ги прекршуваат иновациите на GSK заштитени со патент во mRNA вакцините, развиени „повеќе од десет години пред“ пандемијата на ковид-19, се вели во тужбата.
Патентите ја покриваат технологијата за пренос на нестабилна гласничка РНК во човечки клетки, која научниците почнаа да ја развиваат во 2008 година, а GSK стана сопственик кога го купи бизнисот со вакцини на Novartis во 2015 година, се додава.
Британската компанија бара парична отштета од Pfizer и BioNTech, вклучително и такси за патент, без да наведе износ.
Портпаролката на Pfizer во соопштението нагласи дека компанијата е „сигурна во својата позиција во однос на интелектуалната сопственост поврзана со Comirnaty“ и дека има намера „енергично да се брани“ од тврдењата на GSK. Портпаролот на BioNTech одби да ја коментира тужбата.
Портпаролот на GSK рече дека компанијата верува дека нејзините патенти „ја обезбедуваат основната технологија што се користи во mRNA вакцините на Pfizer и BioNTech против ковид-19“. GSK е „подготвен да ги лиценцира овие патенти под комерцијално разумни услови за да обезбеди пристап“ до вакцините.
Европа
(Видео) 19-годишна девојка во Украина се обидела да го продаде синот, барала 23.500 евра
Во украинскиот град Днипро, 19-годишна девојка се обидела да го продаде сопствениот двегодишен син, соопшти локалната полиција, пренесоа украинските медиуми.
Девојката наводно побарала еден милион гривни, што е околу 23.500 евра за своето дете. 19-годишната девојка наводно му го понудила детето на својот познаник и договорила средба со него. Во вторникот полицијата приведе маж додека носел пари на договорена локација.
Девојката наводно рекла дека не сака да се грижи за својот син, па решила да го продаде. Со парите што ги добила планирала да отвори сопствен бизнис.
Детето е земено во полиција и предадено на надлежните органи. Против неговата мајка е подигнато обвинение за трговија со луѓе.
Европа
Уапсени тројца мажи во истрагата за бруталното убиство на Хрват во Даблин
Уапсени се тројца мажи осомничени за убиството на 31-годишен Хрват, Јосип Штрок во Даблин минатиот месец, пишуваат ирските медиуми.
Тие се осомничени дека ги претепале Штрок, кој живеел и работел во Даблин, и неговиот пријател. Штрок почина од повредите на 3 април.
Неговиот пријател за хрватските медиуми изјавил дека биле во продавница и планирале да се дружат, кога група луѓе им кажала да почнат да зборуваат англиски.
„Немате почит кон нашата земја, ова е Ирска…“, изјави тој за Јутарњи. Тие влегле во автобусот и не забележале дека напаѓачите ги следат и биле нападнати одзади.
„Прво ме удрија со нешто, не знам дали беше шипка или палка. Ги прашав полицајците за деталите што ги виделе на видеото, а кои наводно ги имаат“, рече тој, додавајќи дека следното нешто се сеќава е кога се разбудил во болница.