Свет
Поранешна колумнистка сведочеше против Трамп: „Ме турна во кабина и ме силуваше“

Писателката Е.Џин Керол, која го обвини Доналд Трамп дека ја силувал пред речиси 30 години, сведочеше на нејзиното судење во Њујорк, каде на поротниците им кажа дека поранешниот претседател сексуално ја нападнал, а потоа ја клеветил лажејќи за инцидентот.
„Тука сум затоа што ме силуваше Доналд Трамп. Кога пишував за тоа, тој излажа и рече дека тоа не се случило. Лажеше и ми го уништи угледот. Тука сум да се обидам да си го вратам животот“, рече Керол пред федералниот суд на Менхетен.
Поранешната колумнистка на магазинот „Ел“, бара отштета од Трамп, кој е водечки кандидат за претседателска номинација на Републиканската партија. Висината на обештетувањето се уште не е позната, пишува „Гласот на Америка“.
Керол тврди дека го запознала Трамп во стоковната куќа Бергдорф Гудман на Менхетен кон крајот на 1995 или почетокот на 1996 година, дека тој ја поканил да пазарува женска долна облека со него и дека се задевале меѓусебе нешто заедно да пробаат. Керол вели дека завршиле во една од соблекувалните, каде Трамп ја закачил за ѕид и ја силувал, пред да успее да се ослободи и да побегне.
На прашањето на адвокатот, дали таа му рекла „не“ на Трамп, Керол одговори: „Не се сеќавам дека го кажав тоа. Можеби кажав“.
Керол додала дека тогаш се обвинувала себеси и се плашела дека ќе ја изгуби работата и дека Трамп ќе ѝ се одмазди доколку го пријави. Таа рече дека трпи долгорочни последици бидејќи не може повеќе да биде во „романтична врска“.
Трамп не присуствуваше на судењето, не е ниту обврзан на тоа. Станува збор за граѓански случај, што практично значи дека, без разлика на исходот, Трамп нема да оди во затвор.
Поранешниот претседател продолжи да ја критикува Керол на својата социјална мрежа, што го натера судијата да го предупреди дека може да се соочи со дополнителни правни проблеми ако продолжи да зборува за случајот.
„Дали некој верува дека во тоа време ќе внесе речиси 60-годишна жена која не ја познавав во мало сепаре од влезот на многу фреквентна стоковна куќа (а имајќи предвид дека сум, во најмала рака , многу познат)? Таа не врескаше? Нема сведоци? Никој не го виде тоа? – напиша Трамп.
Обвинувањата на колумнистката ги нарече „измама“ со порака дека се работи за „лажна приказна и лов на вештерки“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Сојузникот на Фицо ја спореди Украина со Хамас: „Ова е ист вид провоциран конфликт“

Тибор Гаспар, заменик-претседател на словачкиот парламент и пратеник од владејачката партија Смер, ја спореди Украина со милитантната група Хамас.
„Роберт Фицо постојано зборуваше за тоа како ги перцепира дејствијата на Русија. Тој верува дека почетокот на војната е кршење на меѓународното право, но… ова е провоцирана агресија“, рече Гаспар.
Пратеникот отиде подалеку, изедначувајќи ја Украина со Хамас и неговиот напад врз Израел на 7 октомври 2023 година. „Ова е ист вид провоциран конфликт како кога терористите од Палестина го нападнаа Израел. Војната се разви на потполно ист начин“, тврдеше тој.
„Киев Индепендент“ пишува дека оваа споредба „ја искривува реалноста со тоа што ја изедначува Украина, суверена држава која се брани од руска инвазија, со Хамас, милитантна група прогласена за терористичка од неколку земји, која масакрирала цивили и земала заложници“.
Откако се врати на власт во 2023 година, Фицо и неговата партија Смер ја прекинаа воената помош за Украина и ги оспорија европските санкции кон Русија. Дополнително, Фицо објави дека ќе го блокира пристапот на Украина во НАТО.
За време на состанокот со Фицо во Пекинг минатата недела, рускиот претседател Владимир Путин го пофали ставот на Братислава како „независна надворешна политика“ која дава „позитивни резултати“. Словачка, заедно со Унгарија под премиерот Виктор Орбан, се соочува со растечки критики од европските сојузници за продлабочување на врските со Москва.
фото: принтскрин
Свет
(Видео) Напаѓачи се качиле во автобус во Ерусалим и почнале да пукаат, петмина убиени

Најмалку пет лица се убиени во пукање во Ерусалим. Околу 15 лица се повредени, од кои седум потешко.
Според првичните извештаи, двајца напаѓачи се качиле во автобус и отвориле оган. Автобусот се движел по пат што води кон еврејските населби во источен Ерусалим. Полицијата извести дека двајцата напаѓачи биле „брзо неутрализирани“.
💥Breaking News💥
Two Palestinian terrorists got on a bus in Jerusalem and sprayed the passengers with bullets.
More that 20 people were shot, 4 were murdered, many in critical condition, including women and children.This is the evil Israel is fighting.
The world wants to… pic.twitter.com/WUE9TueVgd— The Voice Of Truth 🙌 (@thevoicetruth1) September 8, 2025
На снимките објавени на социјалните мрежи се гледаат десетици луѓе како бегаат од автобуската станица за време на утринскиот шпиц.
Болничарите кои пристигнале на местото на настанот ја опишале ситуацијата како хаотична, со простор покриен со скршено стакло, а ранети луѓе лежат во несвест на патот и тротоарот во близина на автобуската станица.
Сè уште не е јасно кој бил мотивот за пукањето или кој стои зад него. Хамас го поздрави нападот, но не ја презеде одговорноста. Војната во Газа доведе до пораст на насилството и на Западниот Брег, кој е окупиран од Израел, и во Израел.
фото: принтскрин
Европа
Сè е подготвено за воената вежба „Запад 2025“; Европа ја очекуваат неколку нервозни денови

Соседите на Русија се подготвуваат за неколку нервозни денови, бидејќи Русија и Белорусија ја одржуваат воената вежба „Запад 2025“, прва по руската инвазија на Украина во февруари 2022 година. Вежбите, што ќе се одржат од 12 до 16 септември, ќе вклучуваат неколку маневри во близина на Полска и Литванија, бидејќи Кремљ вежба за можен судир со силите на НАТО.
„Мораме сериозно да ги сфатиме вежбите во близина на границите на НАТО и ЕУ. И соседните земји и самото НАТО се однесуваат кон нив со најголема сериозност. Литванија и нашите сојузници се подготвени, обединети и внимателно ќе го следат развојот на настаните, подготвени да одговорат доколку е потребно“, рече заменик-министерот за одбрана на Литванија, Томас Годљаускас.
Членките на НАТО организираат свои вежби
Како одговор на воената вежба „Запад 2025“, земјите од НАТО што се граничат со Русија одржуваат свои воени вежби. Во вежбата „Tarassis 25“ учествуваат 10 северноевропски земји од НАТО, додека Литванија ќе одржи своја национална одбранбена вежба „Thunder Strike“.
Полска оваа недела ја одржува својата вежба „Iron Defender-25“, во која учествуваат 30.000 војници. „Полска соодветно ќе одговори на вежбите „Запад 2025“, изјави заменик-министерот за одбрана Чезари Томчик за полската телевизија RMF.
Русија ги одржува вежбите „Запад“ на секои четири години од 1999 година, а загриженоста за нив стана традиција. Иако формално дефанзивна, вежбата од 2009 година симулираше нуклеарен напад врз Варшава, а вежбата од 2021 година доведе до масовно зголемување на силите во Белорусија кои беа искористени месеци подоцна за напад врз Украина, објавува Политико.
„Поради растечката загриженост дека Русија би можела да нападне членка на НАТО, веројатно во Балтикот, НАТО многу внимателно следи дали воената вежба му дава на Западот некаква индикација за идна руска офанзива“, забележа Томас Јанелиунас, професор на Институтот за меѓународни односи и политички науки на Универзитетот во Вилнус.
Белорусија покани набљудувачи од НАТО и ОБСЕ
Западните набљудувачи ќе ги користат вежбите за да ја проценат подготвеноста на руската војска три години откако таа ја нападна Украина. „НАТО многу внимателно ги следи руските воени активности. Не гледаме никаква непосредна воена закана против кој било сојузник на НАТО. Сепак, остануваме будни“, соопшти воениот сојуз.
Организаторите на „Запад“, тврдат дека нивните вежби нема да надминат 13.000 луѓе, а Белорусија соопшти дека поканила набљудувачи од земјите на НАТО, како и од Организацијата за безбедност и соработка во Европа (ОБСЕ).
„Русија, исто така, спроведува три одделни вежби со земјите од Организацијата на договорот за колективна безбедност, прикривајќи ја вистинската големина на вежбите. Се очекува сценаријата на овие вежби да укажуваат на видот на војување за кое Русија се подготвува против Западот“, објави Германскиот совет за надворешни односи.
Помалку војници отколку пред четири години
Вежбата „Запад“ ќе ги опфати руските воени области Москва и Ленинград, енклавата Калининград, арктичкиот регион, Балтичкото и Баренцовото Море и Белорусија.
Некои вежби, во близина на белоруското село Гожа и во Доброволск во Калининград, ќе се одржат само неколку десетици километри од Полска и Литванија. Војници ќе бидат распоредени и од двете страни на превојот Сували, коридор од 70 километри помеѓу Белорусија и Калининград, кој се смета за еден од најранливите одбранбени тесни грла во Европа.
Литванското воено разузнавање очекува до 30.000 војници да учествуваат во вежбата „Запад“, многу помалку отколку во 2021 година, кога учествуваа околу 200.000 војници. „Ова е далеку од она што би му било потребно на Русија за да нападне членка на НАТО, особено затоа што војната во Украина сè уште трае“, тврди Јанелиунас.
фото: принтскрин