Свет
Разузнавањето на САД и во Сенатот тврди дека Русија стои зад хакерските напади
Само челниците на руската влада можеле да дадат наредби за вмешување во американските избори, се наведува во пишаниот исказ на разузнавачката заедница на САД за сослушувањето во четвртокот во Сенатот, потпишано заеднички од директорот на националната разузнавачка заедница Џејмс Клепер, заменикот министер за одбрана за разузнавање Марсел Летр и челникот на Агенцијата за национална безбедност и Кибернетичката команда на вооружените сили, адмиралот Мајкл Роџерс.
„Оценуваме дека само највисоките руски функционери можеле да ја одобрат таквата неодамнешна кражба и објавување на податоците поврзани со американските избори“, се наведува во изјавата во која се додава и дека таквите мислења произлегуваат од „големината и важноста на објектите на нападот“.,
Оценуваат и дека „Русија користела информатички постапки и методи за да влијае врз јавното мислење во Европа и во Евроазија“.
Истиот ваков заклучок американските разузнавачки служби го соопштија и во октомври минатата година. Во Русија, ваквите тврдења на Вашингтон досега повеќепати беа отфрлени, потсетува Associated Press и додава дека податоците од извештајот веќе му бил предаден на претседателот Барак Обама,
Директорот на американската разузнавачка служба Џејмс Клапер, кој ги координира 19-те разузнавачки агенции на САД, оцени во усниот исказ дека Русија „јасно заземала поагресивен став на информатичкото подрачје објавувајќи ги собраните податоци и удирајќи на клучните инфраструктурни мрежи“, пренесува AFP.
Разузнавачките служби ги разоткриле руските активности кои одат до тоа да ја „поткопаат довербата на јавноста во институциите и довербата во информирањето, службите и установите“, додаде Клапер.
Најави дека извештајот на разузнавањето за хакерските напади „ќе биде дистрибуиран на почетокот од следната седмица“. Според Клапер, при дистрибуцијата на извештајот на американското разузнавање „ќе го посвети должното внимание на заштитата на изворите и методите“, односно извештајот намерно нема да биде целосен.
Потврдил дека Централната разузнавачка агенција (CIA), Федерално биро за истраги (FBI) и на Националната агенција за безбедност (NSA) учествувале во подготовката на целосниот извештај на американската разузнавачка служба за хакерските напади кој ја опфаќа и Кина. Истакна дека сите тие агенции го споделуваат мислењето за наводната вмешаност на Русија, не само во компјутерските упади, туку и во ширењето преку интернет на лажните информации.
Клапер, исто така, изјави дека оцената за наводните мотиви на ваквите активности на Русија ќе бидат содржани во наредниот извештај.
„Да, ние ќе укажеме на одредена мотивираност“, одговори додавајќи дека не сакал натаму да навлегува во содржината на извештајот до неговото објавување.
На дополнителното прашање за тоа „како да се обесхрабри Русија во вмешувањето“ во политичките процеси во САД, Клапер одговори дека за тоа ќе стане збор во друг извештај. Самиот извештај ќе даде одговор на прашањата во однос на странските мешања во изборните во САД во последните неколку изборни циклуси, поставени од претседателот на заминување Барак Обама, додаде првиот човек на американската разузнавачка заедница, пренесува ТАСС.
Клапер истовремено рече и дека Кина и натаму „успешно води“ активности во рамките на информатичката шпионажа против американските интереси, иако разузнавачките агенции и приватните експерти „забележале извесно намалување на кинеските активности“, рече.
САД жестоко реагираа на кинеските кибернетички упади и во 2014 година подигнаа судски тужби за наводни хакирања и стопанска шпионажа против пет кинески воени функционери. Кинескиот претседател Кси Џинпинг во текот на официјалната посета на Вашингтон во септември 2015 година се договори со Барак Обама за соработка меѓу двете земји во борбата против информатичките напади./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Лавров: Европа се подготвува за војна
Рускиот министер за надворешни работи Сергеј Лавров ја оцени состојбата на безбедносната архитектура во Евроазија на Меѓународната конференција за евроазиска безбедност во Минск, зборувајќи за „агресивните планови на Западот“, проширувањето на НАТО, перспективата за решение на конфликтот во Украина и односите со Вашингтон.
Лавров предупреди дека Русија нема да дозволи Евроазија да стане „феуд на НАТО“, обвинувајќи ги западните земји дека „се подготвуваат за нова голема војна“, објави РИА Новости.
Тој оцени дека Алијансата „ги проширува своите активности кон Арктикот и Тихиот Океан“ со цел да ја ограничи Кина и да ја изолира Русија.
„Многу пати сме рекле дека никогаш немавме, ниту имаме намера да нападнеме која било моментална членка на НАТО или ЕУ. Подготвени сме да ја вклучиме оваа позиција во идните безбедносни гаранции за овој дел од Евроазија, но лидерите на ЕУ избегнуваат да ги разгледуваат овие идни гаранции на вистински колективна основа“, рече Лавров, наведувајќи ги договорите меѓу Франција и Велика Британија за координација на нуклеарните сили и договорот меѓу Лондон и Берлин за воена соработка како доказ за милитаризацијата на Европа.
Зборувајќи за новата безбедносна архитектура на Евроазија, Лавров повика на создавање „панконтинентална структура отворена за сите земји од регионот“, заснована на принципите на суверена еднаквост и неделивост на безбедноста.
„За разлика од Западот, Русија и нашите партнери – Кина, Индија, Иран, земјите од ЗНД – се убедени дека стабилноста и просперитетот бараат еднакви права за сите земји, а не доминација на привилегираните“, рече Лавров.
Осврнувајќи се на конфликтот во Украина, рускиот министер ги обвини европските членки на НАТО за продолжување на војната со „пумпање оружје и пари за режимот во Киев“.
„Европските лидери прават сè за да го убедат Вашингтон да се откаже од решавањето на конфликтот на преговарачка маса“, рече Лавров.
Тој додаде дека Москва ги полага своите надежи на договорите постигнати меѓу претседателите на Русија и САД, Владимир Путин и Доналд Трамп на самитот во Алјаска, велејќи дека Русија очекува САД да останат посветени на тие принципи.
Зборувајќи за билатералните односи со Вашингтон, Лавров рече дека Русија предложила враќање на директниот воздушен сообраќај, но дека „американската страна не му дава приоритет“.
Тој исто така истакна дека Москва очекува одговор од САД на нејзиниот предлог за нов договор за намалување на стратешкото оружје, како и на тестирањето на руските крстосувачки ракети „Буревестник“.
„Не слушнав никаков одговор преку дипломатски канали. Сите молчеа“, заклучи Лавров, пренесува Танјуг.
Фотот: принтскрин
Свет
Пожар на крузер на Нил, евакуирани 60 италијански туристи
Денес избувна пожар на туристичкиот крузер „Емпрес“ што плови по Нил во близина на Луксор во Египет. На бродот имало околу 60 италијански државјани, но никој не е повреден и сите патници се безбедни, потврди италијанското Министерство за надворешни работи Фарнезина, објавува „Ил Месаџеро“.
Фарнезина соопшти дека внимателно ја следат ситуацијата заедно со амбасадата во Каиро и дека министерот Антонио Тајани е информиран за сè. За какви било итни случаи, италијанските граѓани ги имаат на располагање броевите на амбасадата во Каиро и на Кризната единица.
Сите патници се згрижени
Евакуираните туристи веднаш беа згрижени од туристичките оператори Corsini Viaggi и Travco Tours.
Пожар предизвикан од краток спој
Според првичната истрага, пожарот избувнал во кујната на бродот додека бил закотвен во пристаништето на селото Асфун. Причината бил електричен краток спој во еден од кујнските апарати. Пожарникарите брзо го изгаснале пламенот пред да се прошири на остатокот од крузерот, а во инцидентот нема повредени туристи или членови на екипажот.
Истрагата е во тек
Сите патници се префрлени на други бродови од безбедносни причини, додека властите започнаа со инспекција на бродот за да ја утврдат точната причина за пожарот. За инцидентот е известено и државното обвинителство, кое ќе спроведе официјална истрага.
Фото: принтскрин
Свет
Белорусија ќе распореди руски ракетни системи „Орешник“ на своја територија
Белорусија ќе распореди руски ракетни системи „Орешник“ на своја територија во декември, објави денес кабинетот на белорускиот претседател Александар Лукашенко.
Се вели дека подготовките за распоредување на ракетите се при крај, објавува Ројтерс.
Лукашенко изјави дека распоредувањето на хиперсоничните балистички ракети „Орешник“ е одговор на ескалацијата од Западот.
Ракетите „Орешник“ беа вклучени во заеднички маневри меѓу Русија и Белорусија минатиот месец.
Фото: принтскрин

