Полскиот претседател Карол Навроцки денеска му рече на својот украински колега Володимир Зеленски дека Украинците недоволно ја ценат полската помош во војната против Русија.

Обвинувањето, изнесено на заедничка прес-конференција во Варшава, потсетува на драматичниот судир меѓу Зеленски и американскиот претседател Доналд Трамп во Белата куќа во февруари, кога американскиот потпретседател Џ. Д. Венс го обвини украинскиот лидер за непочитување и неблагодарност за американската помош.

Полска прими повеќе од еден милион украински бегалци од почетокот на руската инвазија во 2022 година и е меѓу главните снабдувачи на Украина со оружје. Таа е и главна рута за испраќање западна воена и хуманитарна помош во земјата зафатена од војна.

„Полјаците чувствуваат дека нашиот напор, повеќекратната помош за Украина од почетокот на инвазијата од целосен обем, не е доволно ценета или разбрана“, рече полскиот претседател.

Тој додаде дека тоа му го пренел на Зеленски во „одлучен и искрен, но и срдечен разговор“.

Зеленски нагласи дека „Украина секогаш ѝ била благодарна на Полска и така ќе остане“. Тој изјави дека Украина „ја брани Европа“ од Русија, по цена на многу човечки жртви.

„Русија сака раздор, сака да уништи силен сојуз… сојуз на две нации, низ многу генерации. Нема да им го дозволиме тоа“, рече Зеленски.

Навроцки претходно побара и подобра соработка во врска со масакрот на речиси 100.000 Полјаци во Волин, регион во северозападна Украина, извршен од украински националисти од 1943 до 1945 година. Навроцки тврди дека станува збор за геноцид и го обвинува Киев дека не сака да ја признае одговорноста.

Варшава, исто така, го обвинува Киев дека одолговлекува со ексхумацијата на жртвите.

Зеленски во четвртокот изрази добра волја во однос на овие прашања.

„Полската страна сака да го забрза тој процес, а украинската страна е подготвена да направи чекор кон тоа. Тоа не се само зборови, туку конкретни мерки“, рече тој.

Зеленски во објава на платформата „Икс“ по средбата го поздрави „новиот почеток“ во односите со Полска.

„Лоши вести за Путин“, додаде тој.

Фото: Depositphotos

Вработените во Музејот Лувр во Париз гласаа за прекин на штрајкот што започна поради платите и условите за работа, иако нивните барања остануваат, изјавија претставници на синдикатот.

„На општ состанок одржан денес, вработените во Музејот Лувр едногласно одлучија да го прекинат штрајкот за да му се овозможи на музејот да се отвори и да прима посетители“, се вели во соопштението на синдикатот CFDT-Culture.

Музејот беше целосно затворен во понеделникот бидејќи вработените започнаа штрајк, а делумно е повторно отворен од средата. Музејот во вторник и онака не работи.

Синдикатите изјавија дека го осудуваат „недостатокот на конкретни одговори во врска со безбедносниот план на музејот и иднината на институцијата, во клима на влошување на инфраструктурата и влошување на условите за работа“.

Тие, исто така, изразија жалење за „молчењето на директорот на музејот, кој ниту се сретнал со вработените, ниту дал изјава“.

Закажан е нов состанок за 5 јануари за продолжување на започнатиот притисок, доколку не пристигнат очекуваните одговори.

Данските власти објавија извештај на воената разузнавачка служба, во кој се наведува дека Русија извршила сајбер-напади врз инфраструктура и веб-страници во таа земја во текот на 2024 и 2025 година, а се откриваат и нови случаи, кои претходно не биле пријавени, објавува денес „Асошиетед прес“.

Според извештајот, Москва е одговорна за деструктивните сајбер-напади врз данската компанија за вода во 2024 година, како и за серија напади врз данските веб-страници пред регионалните и локалните избори минатиот месец.

Данската разузнавачка служба додаде дека овие напади се дел од хибридната војна на Русија против Западот и претставуваат обид за предизвикување нестабилност.

Се вели дека сајбер-нападите на Москва се дел од поширока кампања за заканување и казнување на земјите што ја поддржуваат Украина.

Западните претставници наведуваат дека има сè повеќе инциденти во рамките на саботажната кампања во цела Европа зад која стои Русија.

Според „Асошиетед прес“, документирани се 147 вакви инциденти, вклучувајќи два случаја пријавени од Данска оваа недела.

„Руската држава користи и групи и поединци како инструменти на хибридна војна против Западот, а целта е да предизвика нестабилност и да ги таргетира земјите што ја поддржуваат Украина“, се вели во извештајот на данската разузнавачка служба.

Германските власти го повикаа рускиот амбасадор во Берлин на 12 декември откога Министерството за надворешни работи на земјата ја обвини Москва за саботажа, сајбер-напади и мешање во изборите, потсетува „Асошиетед прес“.

Како што изјави портпаролот на Министерството, Мартин Гизе, меѓу овие напади е и нападот врз германската контрола на воздушниот сообраќај во текот на 2024 година.

Фото: депозитфотос