Европа
Сестрата на последниот шеф на Коза Ностра осудена на 14 години затвор
Сестрата на починатиот сицилијански мафијашки бос, Матео Месина Денаро, е осудена на 14 години затвор за мафијашко здружување, објавија италијанските медиуми. Росалија Месина Денаро беше уапсена во 2023 година под сомнение дека играла клучна улога во мафијата предводена од брат ѝ.
69-годишната жена, исто така сопруга на затворениот мафијаш Филипо Гутадауро, ненамерно ѝ помогнала на полицијата да го најде брат ѝ во бегство благодарение на чкртаницата што ја скрила во ногарката на алуминиумското столче во својот дом. Полицијата ја пронашла додека таму се обидувале да скријат уред за прислушкување. Белешката открива дека брат ѝ боледува од рак, објави Би-би-си.

Матео Месина Денаро беше еден од најсуровите шефови на Коза Ностра. Исчезна во летото 1993 година, а следните 30 години ги помина во бегство. Инспекторите го бараа со години прислушувајќи ги членовите на неговото семејство и неговите пријатели, а неговата одлука да побара третман за ракот доведе до негово апсење во јануари 2023 година кога ја посети здравствената клиника во Палермо. По неколку месеци, тој починал во затворскиот оддел во болницата во Аквила.
Розалија, доверливата и алтер-его на Денаро, беше единствениот член на семејството што знаеше за дијагнозата на рак на свпојот брат пред да умре. Инспекторите веруваа дека токму таа играла голема оперативна улога во Коза Ностра, особено во последните неколку години од бегството на брат ѝ.
Таа е осомничена дека управувала со финансиите на мафијата и таканаречената мрежа на pizzini – шифрирани пораки исцртани на парчиња хартија за да се обезбеди комуникација меѓу шефовите и членовите на бандата. Росалија е мајка на Лоренца Гутадауро, адвокатка што го бранеше вујко ѝ, мафијашкиот бос, по неговото апсење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Белгиски министер: Ќе ја срамниме Москва со земја ако го нападнат Брисел
Белгискиот министер за одбрана, Тео Франкен, тврди дека НАТО ќе ја „срамни со земја Москва“ доколку Русија некогаш го нападне Брисел. Во опширно интервју, Франкен се осврна на низа итни стратешки прашања, вклучувајќи ја војната во Украина, европската одбрана и нуклеарното одвраќање, објави „The Brussels Times“.
Кога директно го прашаа дали се плаши дека рускиот претседател Владимир Путин може да започне конвенционален ракетен напад врз Брисел, неговиот одговор беше недвосмислен: „Не, бидејќи тогаш тој би го погодил срцето на НАТО, а потоа ние би ја срамниле Москва со земја“.
Франкен изрази силна поддршка за американското лидерство во рамките на НАТО и ја повтори својата доверба во Член 5, клаузулата за заемна одбрана што е основа на Алијансата.
На прашањето дали американскиот претседател Доналд Трамп би го почитувал Член 5, Франкен одговори потврдно. „Секако дека би го сторил тоа. Во Европа има многу предрасуди против американската влада. Зошто не би го почитувал Член 5?“

Франкен рече дека е повеќе загрижен за употребата на хибридно војување од страна на Русија отколку за заканата од конвенционален напад. „Крстосувачки проектил врз Брисел? Јасно е дека тоа би го активирало Член 5, без разлика која дефиниција ја користите. Путин нема да го стори тоа“, рече тој.
„Повеќе сум склон кон сценарио со сива зона: ‘мали зелени луѓе’ кои го поттикнуваат рускојазичното малцинство во Естонија против „нацистичкиот режим“. Пред да се свестите, тие анексираа дел од Естонија“, објасни министерот.
Министерот за одбрана не покажа ентузијазам за идејата за заедничка европска армија. Тој ги критикуваше поголемите европски земји за „максимизирање на сопствените пазари“ и праша како земјите кои во моментов не можат ниту да соработуваат во набавката на одбранбена опрема би можеле да ги интегрираат своите национални армии.
„Секој што верува во европска армија продава магла“, рече тој. „За среќа, го имаме НАТО, кој повторно ја докажа својата ефикасност со воздушната одбрана во Полска и Естонија“.
фото: принтскрин
Европа
(Видео) Руски дрон се упати кон новинарска екипа, украински војник го собори со пушка
Во украинскиот град Константинивка руски ФПВ-дрон се обиде да нападне новинарска екипа, но бргу беше запрен од портпаролот на 24. бригада, објави украинската војска.
Инцидентот се случил додека новинар на холандскиот весник „Хет Недерландс Дагблад“ ги снимал урнатините на црквата „Успение на Пресвета Богородица“, оштетена во претходните руски напади.
Додека екипата ја документирала штетата, руски дрон одеднаш се упатил кон нив. Портпаролот на 24. бригада, Олег Петрасјук, ја забележал заканата и пукал од својата пушка. По неколку истрели, тој успеал да го собори дронот.
Целиот инцидент е снимен и на видео, кое го прикажува моментот кога Петрасјук го забележува и го соборува дронот до оштетената црква.
фото: принтскрин
Европа
Зеленски даде наредба: Украина почнува да извезува оружје
Украинскиот претседател Володимир Зеленски му нареди на украинското Министерство за одбрана да започне „контролиран извоз“ на украинско оружје во странство почнувајќи од ноември.
„Украинскиот министер за одбрана Денис Шмихал мора до крајот на годината да обезбеди целосно завршување на задачите за производство и испорака на беспилотни летала – FPV дронови, дронови-пресретнувачи и дронови за мисии за длабински удари – . Програмата за контролиран извоз на нашето оружје треба да започне следниот месец“, рече Зеленски.
На 21 јуни, Зеленски објави дека Киев наскоро ќе започне со извоз на одбранбени технологии и отворање линии за производство на оружје во земјите партнери како дел од пошироките напори за интернационализација на производството на оружје во земјата, бидејќи капацитетот за производство на беспилотни летала во Украина ги надминува нејзините средства за финансирање.
Одбранбениот сектор на Украина, а особено нејзината индустрија за беспилотни летала, брзо растеше од почетокот на руската инвазија во 2022 година. Се појавија повеќе од 200 компании за беспилотни летала, од кои многу произведуваат евтини, прилагодливи системи кои го преобликуваа модерното војување.
Во последните месеци, Зеленски покажа подготвеност да го либерализира процесот на извоз на домашно оружје, кој во моментов е строго ограничен и бара тешко добиени дозволи од Државната служба за извоз. Во мај, украинските производители на одбрана испратија отворено писмо до Зеленски, барајќи од него да ги укине ограничувањата за извоз на домашна воена опрема, особено беспилотни летала.
Според предложениот систем, Украина ќе извезува вишок воена опрема, а профитот ќе го троши на итно потребно оружје, како што се беспилотни летала-пресретнувачи. Украина има намера да потпише договори за извоз во Соединетите Држави, Европа, Блискиот Исток и Африка, претходно изјави Зеленски.
фото: принтскрин

