Свет
Сите училишта во Европа и Централна Азија да останат отворени и побезбедни, велат СЗО и УНИЦЕФ

Регионалната канцеларија на СЗО за Европа и регионалната канцеларија на УНИЦЕФ за Европа и Централна Азија повикуваат училиштата да останат отворени и да се направат побезбедни преку донесување мерки за намалување на пренесувањето на вирусот.
Ваквите мерки опфаќаат понуда на вакцина против Ковид-19 за наставниците и другиот училиштен персонал како дел од националните планови за вакцинација, истовремено обезбедувајќи им вакцинација на ранливите популации. Освен тоа, треба да се земе предвид и вакцинација на децата на возраст од 12 и повеќе години со медицински состојби, кои значително им го зголемуваат ризикот од тешка манифестација на Ковид-19; унапредување на училишната средина преку често проветрување на училниците, помали паралелки кога е можно, физичко дистанцирање и редовно тестирање на децата и вработените итн.
„Пандемијата предизвика катастрофално нарушување на образованието во историјата. Затоа, од пресудно значење е учењето со физичко присуство во училница непрекинато да продолжи во европскиот регион. Ова е од исклучителна важност за образованието, менталното здравје и социјалните вештини на децата за да може училиштата да ги оспособат нашите деца да бидат среќни и продуктивни членови на општеството“, објаснува д-р Ханс Хенри П. Клуге, регионален директор на СЗО за Европа.
Тој додава дека ќе помине извесно време пред да ја оставиме пандемијата зад нас, но образованието на децата со безбедно физичко присуство во училиште мора да остане наша примарна цел, па затоа, вели Клуге, не смееме да ги лишиме од можностите што ги заслужуваат.
„Ги охрабруваме сите земји да ги држат училиштата отворени и ги повикуваме сите училишта да воведат мерки за минимизирање на ризикот од Ковид-19 и ширење разни варијанти.
Според Клуге, високопреносливиот делта-сој придонесе за дополнителна загриженост и компликации за отворањето на училиштата оваа година.
Податоците јасно покажуваат дека примањето целосна серија вакцини против Ковид-19 значително го намалува ризикот од тешко заболување и смрт. Затоа, вели Клуге, кога ќе ве повикаат да ја примите вакцината, направете го тоа и погрижете се да ги примите сите дози.
„Вакцинацијата е нашата најдобра одбрана од вирусот, а за да заврши пандемијата, мора бргу да го прошириме вакцинирањето еднакво во сите земји, вклучувајќи и поддршка за производството на вакцини и распределба на дози, со цел насекаде да ги заштитиме најранливите. Исто така, мора да продолжиме да ги следиме јавноздравствените и социјалните мерки за кои знаеме дека функционираат, каде што спаѓаат тестирање, секвенционирање, следење, изолација и карантин“, рече д-р Ханс Хенри П. Клуге.
Заменик-регионалниот директор од УНИЦЕФ за Европа и Централна Азија, Филип Кори, вели дека децата и младите не смее да ризикуваат уште една година со нарушено образование. Вакцинацијата и заштитните мерки, според него, ќе помогнат да се спречи враќање во најмрачните денови од пандемијата кога луѓето мораа да трпат затворања, а децата имаа нарушена настава.
„Децата беа тивки жртви на пандемијата, а најмаргинализираните беа меѓу најтешко погодените. Пред Ковид-19, најранливите деца во регионот веќе беа надвор од училиште или беа на училиште, но не учеа на исто ниво како своите соученици. Училиштето е многу повеќе од зграда. Тоа е место на учење, безбедност и игра во срцето на нашите заедници. Кога училиштата се затворени, децата пропуштаат настава, не се со своите пријатели и оние што живееат во нефункционални семејства може да бидат изложени на насилство во домот. Пандемијата ја влоши и онака неприфатливата ситуација – мора да се погрижиме училиштата да се отворат и да останат безбедно отворени“, нагласи Кори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Најмалку 25 лица загинаа во текот на ноќта во нови напади на израелската армија врз Појасот Газа

Најмалку 25 лица загинаа во текот на ноќта во нови напади на израелската армија врз Појасот Газа, во време кога мировните преговори се во застој.
Според здравствени извори, голем дел од жртвите се убиени додека чекале хуманитарна помош во близина на граничниот премин Зиким со Израел. Меѓу загинатите има и четири лица од иста семејна зграда во градот Газа.
Организацијата на Обединетите нации предупреди на ризик од масовна глад во енклавата, и покрај тврдењата на Израел дека не ги блокира доставите на помош. Според ОН, големиот дел од помошта не може да стигне до населението поради воени блокади и грабежи.
Преговорите за прекин на огнот меѓу Израел и Хамас се прекинати, откако американските и израелските преговарачи се повлекоа од Катар. Израелскиот премиер Бенјамин Нетанјаху најави дека се разгледуваат „алтернативни опции“, додека Хамас смета дека повлекувањето било тактика на притисок.
Свет
Поради пожарите во Турција евакуирани се над 2.600 лица

Турската Дирекција за управување со вонредни ситуации (АФАД) евакуираше 2.619 лица откако оваа недела Турција се соочи со серија интензивни шумски пожари во повеќе провинции, јави весникот „Дејли сабах“.
Пожарите, поттикнати од екстремно високи температури, силен ветер и сушно време, мобилизираа илјадници спасувачи и доброволци кои учествуваат во гаснењето на огнот. Екипите се активни од воздух и копно, а според АФАД, ангажирани се 4.231 лице, 45 летала и 1.236 копнени возила.
Најтрагичниот инцидент се случи во средата, во руралниот дел на провинцијата Ескишехир, каде животот го загубија десет лица – пет шумски работници и пет припадници на организацијата АКУТ за пребарувачко-спасувачки операции, додека се бореле со огнената стихија.
Претседателот на Турција, Реџеп Тајип Ердоган, изјави во петокот дека во гаснењето учествуваат 27 авиони, 105 хеликоптери, 6.000 возила и 25.000 лица. Тој изрази сочувство до семејствата на загинатите.
Свет
Париз, Лондон и Берлин повикаа да престане хуманитарната катастрофа во Газа

Хуманитарната катастрофа во Појасот Газа мора веднаш да престане, повикаа вчера во заедничко соопштение Париз, Лондон и Берлин.
„Хуманитарната катастрофа на која сме сведоци во Газа мора веднаш да престане“, нагласија трите европски земји.
Тие на овој начин одговорија на алармот објавен од ОН и невладините организации дека постои ризик од непосреден и широко распространет глад во Газа. Трите европски престолнини ја повикуваат европската влада веднаш да ги укине ограничувањата за испорака на помош.
Франција, Велика Британија и Германија, исто така, потсетуваат дека Израел мора да ги почитува своите обврски според меѓународното хуманитарно право.
„Дојде моментот да се стави крај на војната во Газа“, додадоа тие и ги повикаа сите страни да го прекинат конфликтот со склучување на договор за моментално прекин на огнот.