Свет
Фановите се простија од кралицата на рокенролот, палеа свеќи и оставаа цвеќиња
Во Швајцарија, пред куќата на познатата пејачка Тина Тарнер, која почина вчера по долго боледување, обожавателите синоќа оставаа цвеќе и свеќи.
Пред портите на домот на Тина во Куснахт кај Цирих, обожавателите со часови доаѓаа да се простат од „кралицата на рокенролот“, која почина на 83-годишна возраст.
Тина Тарнер е родена во 1939 година како Ана Меј Булок во малото гратче Браунсвил во државата Тенеси. Таа ја започна својата меѓународна кариера настапувајќи во 1960-тите со нејзиниот тогашен сопруг Ајк Тарнер, од кого претрпе насилство. Тина се разведе од Ајк во 1978 година и продолжи да постигнува уште поголеми успеси како солист.
Таа често се присетуваше на траумите кои ги претрпела за време на бракот со Ајк и на малтретирањето на кое секојдневно била изложена.
„Тој го користеше мојот нос како вреќа за бокс, толку многу пати што можев да ја вкусам крвта што ми тече низ грлото додека пеев“, напиша таа во своите мемоари.
За време на нејзината брилијантна соло кариера, Тина Тарнер ги скрши бариерите за идните генерации црнки во светот на професионалната музика. Таа беше првата Афроамериканска уметница која се појави на насловната страница на списанието „Ролинг Стоун“ и беше наречена „Кралица на рокенролот“ затоа што ја плени публиката ширум светот со своите енергични сценски изведби и моќен, уникатен глас.
Тина Тарнер освои осум Греми награди и беше примена во Рокенрол Куќата на славните во 2021 година како соло изведувач.
Таа пред нашата публика настапи три пати – првиот пат во 1974 година, потоа во 1978 година, а последен пат гостуваше во Белград во 1990 година.
Среќата во приватниот живот успеа да ја најде со вториот сопруг, германскиот музички продуцент Ервин Бак, со кој се омажи во 2013 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Загинаа две лица, а пет се водат како исчезнати по судар на чамец и крузер во Дунав кај Будимпешта
Две лица го загубија животот доцна синоќа, а пет се водат за исчезнати во судар на мал моторен чамец и крузер на реката Дунав северно од Будимпешта, соопшти денеска унгарската полиција.
Телата на возрасен маж и жена се пронајдени северно од главниот град, а властите се уште трагаат по пет исчезнати лица.
Сома Чечи, портпарол на полицијата во Будимпешта, на прес-конференција рече дека, според досегашните сознанија, во чамецот имало вкупно осум возрасни лица и потврди дека две лица загинале, а пет се водат како исчезнати. Тројца мажи и две жени моментално се бараат со глисери и дронови, јавуваат унгарските медиуми.
Полицијата соопшти и дека во градот Комаром бил запрен поголем брод, а од увидот било откриено дека му е оштетен страничниот дел. Се врши увид и во тек е истрага за опасноста по водениот пат и смртта на неколку лица.
Регион
По обидот за атентат словачкиот премиер Фицо е надвор од животна опасност
Словачкиот премиер Роберт Фицо е надвор од животна опасност по обидот за атентат, изјави денеска министерот за одбрана и вицепремиер Роберт Калинак за словачката новинска агенција ТАСР.
Состојбата на Фицо се подобрува, а лекарската комисија утре треба да одлучи дали тој ќе биде префрлен. Фицо моментално се опоравува во универзитетската болница во Банска Бистрица.
Фицо беше тешко повреден на 15 мај, по седницата на Владата во градот Хандлова, кога 71-годишниот писател Јурај Цинтула, од непосредна близина неколку пати пукаше со пиштол во него. Специјалниот кривичен суд во словачкиот град Пезинок, со силно полициско обезбедување вчера му одреди притвор на Цинтула.
Свет
Девојка од Чикаго на 17 години стана доктор на науки
Дороти Џин Тилман од Чикаго стана најмладата личност, на 17 години, што успеа да се здобие со докторска диплома за интегрирано бихевиорално здравје во Аризона.
„Ова е прекрасна прослава и се надеваме дека Дороти Џин ќе инспирира повеќе студенти. Но, ова е нешто многу ретко и уникатно“, вели вонредниот професор Лесли Менсон.
Кога повеќето ученици се обидуваат да се адаптираат во средно училиште, Дороти веќе беше запишана на колеџот во Лејк Каунти во северен Илиноис, каде што дипломира психологија.
Во 2018 година таа дипломира на отсекот хуманитарни науки на колеџот „Екселсиор“ во Њујорк. Две години подоцна, магистрира на колеџот „Јунити“ во Мејн пред да биде примена на Програмата за бихевиорално управување.
Поголемиот дел од нејзиното образование го реализира на далечина, преку онлајн настава.
Како што вели таа, најголема заслуга за целото нејзино образование има нејзината баба, како и нејзината мајка, на која е благодарна за помошта и насочувањето. Секако, целиот образовен процес не бил без жртва.
„Немав секојдневна училишна работа, немав училишно фотографирање или работи кои создаваат единство меѓу врсниците “, вели таа.