Пристигнуваат првите реакции на земјите за системот на реципрочни царини кои вчера вечер ги претстави американскиот претседател Доналд Трамп.

Тој го нарече вчерашниот ден „ден на ослободувањето“, дел од планот „Америка повторно да се збогати“. Веднаш стапија на сила царините од 25 отсто за сите возила произведени надвор од САД.

Австралискиот премиер: Сосема неоправдани

Австралискиот премиер Ентони Албанез изјави дека новите американски царини се „целосно неоправдани“ и ќе ја сменат перцепцијата за односите меѓу САД и Австралија, инаку блиски сојузници. Австралија доби царинска стапка од 10% како дел од мерките на Трамп.

„Овие царини не се неочекувани, но да бидеме јасни – тие се целосно неоправдани“, рече Албанезе.

Австралиската министерка за надворешни работи Пени Вонг, исто така, предупреди да не се потценува влијанието на новите царини врз стратешки важниот индо-пацифички регион, нагласувајќи дека Австралија ќе одговори со сериозност и зрелост.

Ирскиот премиер: Нема оправдување

Ирскиот премиер Мајкл Мартин рече дека „не гледа оправдување“ за царините што ги објави американскиот претседател Доналд Трамп и најави дека Ирска со своите партнери во Европската унија ќе размисли како најдобро да одговори.

Тој порача дека секоја реакција треба да биде „пропорционална“ и насочена кон заштита на интересите на европските компании, работници и граѓани. „Конфликтот никому не му користи“, нагласи Мартин.

Тој додаде дека Ирска ќе биде „силен поборник за решенија кои ќе ги зајакнат постоечките и силни трансатлантски трговски врски“.

Британскиот министер за претпријатија и трговија Џонатан Рејнолдс ја коментираше најавата на Трамп за царини од 10 отсто за увозот од Велика Британија.

„Секогаш ќе дејствуваме во најдобар интерес на британските бизниси и потрошувачи. Затоа во изминатите неколку недели владата беше целосно фокусирана на преговарање за економски договор со Соединетите држави што ги зајакнува нашите постоечки фер и урамнотежени трговски односи“, рече Рејнолдс.

Тој ги повтори изјавите на неговите владини колеги, велејќи дека САД се „најблискиот сојузник на Британија“. „Пристапот треба да остане смирен и посветен на постигнување на овој договор, кој се надеваме дека ќе го ублажи влијанието на она што беше објавено денеска“, истакна тој.

„Имаме низа алатки на располагање и нема да се двоумиме да дејствуваме. Никој не сака трговска војна, а нашата намера останува да обезбедиме договор. Но, ништо не е надвор од масата, а владата ќе направи се што е потребно за да го одбрани националниот интерес на ОК“, најави тој.

Американскиот претседател Доналд Трамп воведе царини од 10% на островите Херд и Мекдоналд.

Тоа е австралиска надворешна територија лоцирана во јужниот дел на Индискиот Океан, на околу две третини од патот од Мадагаскар до Антарктикот.

Островите се едно од најоддалечените места на земјата и немаат постојани жители, но се дом на голем број пингвини, фоки и морски птици. Според податоците на Светска банка, Европската унија веќе применува царини на овие острови.

Иако овој потег изгледа апсурден на прв поглед, наметнувањето царини на ненаселена територија не е нужно бесмислено од правен, политички или економски аспект.

Царините често се наметнуваат автоматски врз основа на класификацијата на земја или царински регион, без разлика дали има физичко население или активна трговија. Ако САД воведат универзални царини на сите странски територии, тогаш избегнуваат исклучување на помалите субјекти.

Иако територијата нема жители, таа е управувана од Австралија, а самата територија има ексклузивна економска зона (ЕЕЗ).

Дополнително, регионите без царински бариери може да станат упориште за офшор производство во иднина. Една компанија може да регистрира складиште и од таму „технички“ да извезува стока за да избегне царина од Австралија или Азија.