Свет
Телекомот и в година монопол
Македонски телекомуникации ќе го задржат монополот во фиксната телефонија и во 2006 година поради задоцнетото спроведување на новиот закон за електронски комуникации, оценуваат експертите.
ЗАГРИЖУВАЧКИ ПРОГНОЗИ НА ЕКСПЕРТИТЕ Македонски телекомуникации ќе го задржат монополот во фиксната телефонија и во 2006 година поради задоцнетото спроведување на новиот закон за електронски комуникации, оценуваат експертите. Иако законот беше донесен во почетокот на годинава, на пазарот се уште не може да се појават нови фиксни оператори. Причината е во недонесувањето на четириесетина подзаконски акти што треба да ја регулираат оваа дејност. Поради тоа, дваесетина компании што се пријавиле во Агенцијата за електронски комуникации за да даваат услуги во фиксната телефонија не можат да почнат со работа. Опозицијата обвинува дека власта свесно го толерира монополското работење на телекомот. – Огромната дивиденда од 44,8 милиони евра, која и беше исплатена на Владата, мора некако да се отплати. Направен е непрецизен закон, кој му овозможува на телекомот да ја користи монополската позиција. Клучните работи за да профункционира телекомуникацискиот пазар се оставени да се уредат со подзаконски акти. За нивно донесување нема никакви рокови, ниту пак е одредено да одговара некој за нивно неприменување. Ваквата состојба само ќе го продолжи монополот на телекомот. Пазарот досега требаше да биде отворен и за други оператори, но не очекувам тоа да се случи ниту до изборите во 2006 година – вели Зоран Трајчевски, претседател на комисијата за електронски комуникации на ВМРО-ДПМНЕ. Либерализацијата на пазарот на фиксна телефонија е обврска преземена и со Спогодбата за стабилизација и асоцијација со Европската Унија и требаше да почне од почетокот на годинава. Затворениот телекомуникациски пазар беше причина и за сериозните критики во мислењето на Европската комисија за кандидатскиот статус на земјава. Европската комисија упати забелешка до Владата да престане да го попречува либерализирањето на телекомуникацискиот бизнис одолговлекувајќи ја целосната примена на Законот за електронски комуникации. Граѓаните нестрпливо ја очекуваат конкуренцијата во телекомуникациите зашто треба да им овозможи избор на поевтина и поквалитетна услуга. Очигледно е дека Владата потфрли во сферата на телекомуникациите ако се знае дека за разлика од кај нас, кандидатите за членство во ЕУ имаат повеќе фиксни оператори, Хрватска има два, Бугарија – четири, а Романија – над 150 оператори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Рјабков: Русија нема доверба во НАТО
Геополитичките проекти со НАТО сега се невозможни, Москва нема доверба во Алијансата и кај нас предизвикува политичка и емотивна одбивност, изјави денеска рускиот заменик министер за надворешни работи Сергеј Рјабков.
„Геополитички дизајн од секаков вид со НАТО е невозможен. НАТО не е пандан способен за преговори, тоа е групација во која не само што немаме ни најмала доверба, туку ни предизвикува политички и, дури би рекол, емотивна одбивност“, рече Рјабков во интервју за ТАСС.
Тој посочи дека Русија ќе работи со оние „кои се подготвени да преговараат на еднаква основа“.
„Големиот евроазиски простор, концептите на евроазиската безбедност, се она што доаѓа во центарот на вниманието на архитектонските проекти во однос на политиката и геополитиката. Според нас, тоа е она на што пред се треба да се фокусираме“, посочи Рјабков.
Свет
Ирански командант: Три европски земји ќе одговараат за помошта кон Израел
Командантот на силите Кудс, Есмаил Кани изјави дека трите европски земји кои ги распоредија своите воени авиони за да го одбранат Израел од одмаздничката операција организирана од Иран ќе одговараат.
– Франција, Германија и Велика Британија не треба да мислат дека распоредувањето на авионите таа ноќ е крај на проблемот. Да, таа ноќ заврши, но ќе одговорат во догледно време – изјави бригадниот генерал Есмаил Кани.
Според него, Соединетите Американски Држави и целата западна воена алијанса на НАТО придонеле со сите свои воени капацитети за одбрана на Израел од иранската операција „Вистинско ветување“, пренесува иранската агенција „Тасним“.
– Седум или осум поморски групи се распоредени во Црното Море за да се спречи (иранската) операција – рече тој, додавајќи дека во таа операција се вклучени и повеќе од 200 авиони.
Кани оцени дека Иран ја покажа својата сила, непоколебливост и моќ на целиот свет при нападот на територијата на Израел.
– Победата на операцијата „Вистинско ветување“ не е ограничена само на бројот на ракети и беспилотни летала кои стигнаа до окупираните територии – рече Кани и ги повика земјите од регионот да учат од, како што наведе, „неспособноста на САД да го заштитат израелскиот режим за време на иранската операција“ и да не се потпираат на Вашингтон.
На 13 април Техеран истрела повеќе од 300 беспилотни летала и проектили кон Израел, како одговор на нападот врз иранскиот конзулат во сирискиот главен град Дамаск на 1 април, кога беа убиени седум членови на Иранската револуционерна гарда.
Иран тврди дека нападот „Вистинско ветување“ предизвикал голема штета на израелските воени бази.
Регион
Изгласана новата влада на Хрватска: Пленковиќ по трет пат стана премиер
Пратениците во хрватскиот Сабор вечерва гласаа за доверба на новата влада на премиерот Андреј Пленковиќ. За доверба на Владата гласаа 79 пратеници, против беа 61 пратеник, а еден беше воздржан.
Претседателот и членовите на Владата потоа дадоа заклетва пред пратениците, со што Андреј Пленковиќ го започна третиот последователен мандат како премиер.
Во Собранието денеска беше претставена четиригодишната програма на новата Влада, која се заснова на „успешна, витална, праведна, одржлива и суверена Хрватска“.
Во новиот мандат, владата на Пленковиќ најавува просечна нето плата од 1.600 евра, минимална бруто плата од 1.250 евра, како и отворање на 125.000 нови работни места.
До крајот на мандатот на новата влада, пензиите треба да се зголемат за најмалку 30 отсто, со што просечната пензија би изнесувала најмалку 750 евра.
Новата влада наместо досегашните 16 ќе има 18 министерства и седум потпретседатели.