Свет
Филипини: Во заложништво дваесетина туристи од Хонгконг
Киднапер на туристичкиот автобус во Манила ослободил седум заложници по три часа откако го извршил грабнување на автобусот, пренесе агенцијата Синхуа, повикувајќи се на локалните медиуми.
Киднапер на туристичкиот автобус во Манила ослободил седум заложници по три часа откако го извршил грабнување на автобусот, пренесе агенцијата Синхуа, повикувајќи се на локалните медиуми. Во понеделник наутро полицаец кој добил отказ идентификуван како Роландо Мендоза вооружен со автомат М-16 киднапирал туристички автобус во центарот на главниот град на Филипини, барајќи да биде вратен во службата. Во автобусот имало 21 турист од Хонгконг, потврдила за кинеската агенција, компанијата Хонгтаи Травел (Hongthai Travel) – туроператорот кој го организирал туристичкото патување на кинеските граѓани на Филипините, меѓу кои најмногу се жители на Хонгконг. Според последните податоци од филипинската полиција, грабнувачот ослободил седум заложници, три деца, водичот и три возрасни лица. Според агенцијата Синхуа, операцијата за ослободување на заложниците е следена и од претставници на амбасадата на Кина во Манила. Ова бил последен ден од престојот на кинеските туристи во Манила, чија возраст се движи од четири до 72 години, и тие во понеделник навечер требало да отпатуваат за Хонгконг. Според началникот на полицијата во Манила, Леокадио Сантијаго, се уште траат преговорите со грабнувачот. Тој во 1986 г. бил одликуван како еден од десетмината најдобри полицајци на Филипините, а во јануари годинава добил отказ откако бил осомничен дека помагал во изнуда и фалсификување докази. Инаку ова не е прво масовно киднапирање во филипинската престолнина. Во март 2007 г., сопственик на интернат од сиромашно предградие на Манила, Армандо Дукат грабна автобус со повеќе од 30 од неговите воспитаници сакајќи да го привлече вниманието на јавноста врз проблемите во образованието и сместувањето, како и на корупцијата на Филипините. Заложниците тогаш беа ослободени истата вечер, откако властите ветија дека ќе обезбедат бесплатно образование за сите ученици на Дукат. Две седмици пред овој инцидент, група припадници на специјалната филипинска полиција извршија упад во судот во предградие на Манила, ослободувајќи група заложници. За време на операцијата, беа убиени грабнувачот каскадерот Алмар Виљегас и неговата девојка, додека заложниците биел ослободени без жртви. Причина за таа заложничка драма беше долгогодишното нерешавање на имотно-правен спор за сопственост врз земјиште./крај/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.