Свет
Селмани проневерил милиони на сметка на болните
За бубрежно болен пациент од Тетово државата годишно плаќа пет илјади денари, а пациент со истата дијагноза во Кочани државата ја чини 64 илјади денари.
Мери Јордановска
За бубрежно болен пациент од Тетово државата годишно плаќа пет илјади денари, а пациент со истата дијагноза во Кочани државата ја чини 64 илјади денари.
На вакви нелогичности наишле државните ревизори при финансиската контрола во Министерството за здравство за 2004 година, чиј извештај беше објавен вчера. Во тој период прв човек на Министерството бил Реџеп Селмани, а неколку дена пред крајот на годината на оваа функција дојде сегашниот министер Владо Димов. Ревизорите утврдиле дека со владината програма за дијализа, Селмани паушално си префрлал пари во медицинските центри. Така, во Здравствената станица во Железара за 138 пациенти Министерството префрлало 2,3 милиони денари, колку што биле префрлани и во прилепскиот медицински центар, но за двојно помалку пациенти.
Според Државниот завод за ревизија, министерот Селмани незаконски потрошил повеќе од пет милиони денари од парите предвидени со владините програми за лекување болести. Од програмата за задолжителна имунизација на населението биле исплатени околу пет милиони денари за вакцини, шприцеви, гази, алкохол, и покрај тоа што вакцините веќе биле набавени од Министерството, а помошните материјали не биле предвидени со програмата.
И двајцата министри за здравство, поранешниот Селмани и сегашниот Димов, давале пари за специјализација на вработените во Министерството без да се утврди критериумот за тоа кој се може да специјализира. Во 2004 година за оваа намена биле потрошени 708 илјади денари.
„Овој нетранспарентен начин на избор на вработените чии специјализации ги финансира Министерството без пишан критериум ја доведува во прашање објективноста на постапката и ги доведува во нерамноправна положба другите вработени“, утврдиле ревизорите.
Според нив, Селмани проневерил повеќе од три милиони денари со тоа што парите за земање и за испраќање мостри за лабораториски испитувања при увоз на храна легнувале директно на сметката на Министерството, наместо во буџетот. Дел од уплатите, во согласност со правилникот, увозникот требало да ги плаќа на сметка на буџетот, но тие по грешка оделе на сметката на Министерството. Трите милиони денари никогаш не биле вратени во државниот буџет.
Кон крајот на 2004 година Министерството склучило незаконски договор за набавка на автомобили за 3,5 милиони денари. Договорот предвидувал авансирање на парите во вкупна вредност, спротивно на Законот за јавни набавки. Освен тоа, за сервисирање на возилата Министерството потрошило 283 илјади денари, без да спроведе постапка за јавна набавка.
Ревизорите укажуваат дека министерот за здравство мора да го почитува Законот за јавни набавки, пописната комисија да врши попис на парите, а Министерството да донесе акти за да се регулираат расходите.
Бучковски за џабе издавал земјиште до Воената болница
Александра К. Мишовска
Министерството за одбрана во времето на министерувањето на актуелниот премиер Владо Бучковски за 0,2 евра месечно издало 2.000 квадратни метри државно земјиште. Закупецот, скопската фирма „Мирадор“ две години не плаќал кирија, а данокот на додадена вредност го плаќало Министерството, утврдил Државниот завод за ревизија. За возврат „Мирадор“ бил обврзан секој месец за сума што е 20 отсто од закупнината да носи саксии и цвеќиња за Министерството и за Воената болница.
Покрај ова, последниот ревизорски извештај направен за работата на Воената болница покажува дека со дозвола на Бучковски за две години додека беше министер, Јован Манасиевски откако дојде на функцијата и Петре Утковски како управник, во Воена се набавувало во четири очи, се реновирале кабинети, се градело без постапки за тендер.
Надлежните во болницата трошеле буџетски пари за скапи инфузиски раствори и покрај тоа што имале опрема вредна околу еден милион евра. За тоа колку пари се потрошени по оваа основа ревизорите не успеале да утврдат бидејќи надлежните не ги чувале сите фактури. Имено, поради тој проблем целиот ревизорски извештај не содржи точни суми на злоупотребени пари. Управникот на болницата во 2004 година без законска можност наредил дел финансиски документи да се уништат.
Ревизијата констатирала дека Воената болница без тендер и дала на градежната фирма „Адинг“ повеќе од два милиони денари за реновирање на еден кабинет. Министерството и болницата секој месец и префрлале по 37.000 денари на фирмата БПЦ, која требало да го одржува компјутерскиот систем, кој, пак, како што констатирала ревизијата, се уште бил застарен и неефикасен.
Во извештајот на државната ревизија пишува дека Министерството за одбрана и Воената болница не плаќале и данок на додадена вредност, со што го оштетиле државниот буџет.
Хипербарната комора неотпакувана од 2002 година
Министерството за здравство се уште не ја активирало хипербарната комора, која чини околу 25 милиони денари, а била набавена во 2002 година, утврдиле ревизорите.
Тие сметаат дека со нефункционирањето на апаратот, од Фондот постојано се одлеваат пари за надомест на оние што користат такви услуги во странство.
„Освен еден допис упатен од министерот до директорот на Клиничкиот центар со кој бара да преземе мерки да се активира комората, на ревизијата не и беше достапен друг документ од кој може да се види дека се преземаат активности за апаратот да се стави во употреба“, се вели во извештајот на ревизијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Маж нападна полицаец со нож во Париз
Маж вооружен со нож, кој се обиде да нападне полицаец кај Триумфалната капија во Париз, беше ранет од неколку куршуми испукани кон него од друг припадник на безбедносните сили, објави агенцијата Франс прес, повикувајќи се на полициски извор.
Напаѓачот е однесен во болница. Полицијата е присутна кај Триумфалната капија, споменик во центарот на Париз во близина на Шанзелизе, за церемонија на палење факел на Гробот на непознатиот војник.
Националното обвинителство за борба против тероризмот објави дека го презема случајот.
фото/Depositphotos
Свет
Зеленски: Путин не е млад човек, нема многу време
Украинскиот претседател Володимир Зеленски верува дека само САД имаат моќ да ја принудат Русија да склучи мир.
„Да бидеме искрени, денес само Европа ѝ дава пари на Украина и ѝ помага. Само САД можат да го сопрат Путин“, изјави тој за POLITICO.
Сепак, Зеленски изрази загриженост дека Белата куќа можеби не ја разбира суштината на проблемот.
„Од она што го гледам, тие испраќаат повеќе сигнали дека Украина треба да направи компромис, а не Русија“, рече тој.
„Не мислам дека тоа е правилниот став. Секако, така е поедноставно“, додаде тој.
Осврнувајќи се на возраста на Владимир Путин, Зеленски забележа дека рускиот претседател, кој сега има 73 години, повеќе не е млад човек. „Тој нема многу време“, додаде украинскиот претседател. „Дај Боже да нема многу“, заклучи тој.
Свет
Украински министер: Не е реално војната да се заврши без Трамп
Украинскиот министер за надворешни работи, Андриј Сибиха, извести за напредокот на преговорите со Русија за прекин на инвазијата, истакнувајќи дека три од 20-те точки од мировниот план остануваат контроверзни. Тој потврди дека претходните две рунди разговори се одржаа во Абу Даби, а следната ќе се одржи следната недела во Женева.
Сибиха оцени дека преговорите „напредуваат“, пофалувајќи го лидерството на американскиот претседател Доналд Трамп. Тој експлицитно изјави дека „нереално е да се заврши оваа војна без Трамп“. И покрај ова, тој предупреди дека Русија не покажува „никакви знаци на подготвеност за сериозни преговори“.
„Паралелно, мора да продолжиме да вршиме притисок врз Русија и, мора да признаеме, сè уште имаме инструменти на влијание“, рече Сибиха.
Украинскиот министер откри дека сè уште има несогласување за три точки во мировниот план, кој содржи 20 точки. „Имаме изводливи предлози, па затоа во следната рунда навистина се надеваме дека нема да слушаме дополнителни историски предавања. Сега е време за акција, за дела и за конкретни, решителни чекори“, нагласи тој.
На неговите зборови се надоврза и францускиот министер за надворешни работи Жан-Ноел Баро, кој рече дека војната мора да заврши.
„Јасно е дека треба да ја запреме оваа војна, а со нашите сојузници и пријатели сè уште имаме механизми за да го постигнеме тоа“, рече тој.
Тој откри дека Франција и Обединетото Кралство „отишле многу далеку“ за да ги блокираат бродовите на руската „флота во сенка“, додека „користеле воени средства“.
Баро, исто така, ја нагласи важноста на претстојниот, 20-ти пакет санкции на Европската Унија, кој се очекува да биде усвоен на 24 февруари, на четвртата годишнина од почетокот на тоталната агресија. Тој, исто така, ја спомена улогата на таканаречената Коалиција на волјата во обезбедувањето идни безбедносни гаранции за Украина.
фото/Depositphotos

