По последното поскапување на цената на природниот гас, кое го одобри Регулаторната комисија за енергетика, граѓаните и индустријата во земјава плаќаат најскап гас во Европа.

АПСУРД

Слободан Содиќ

По последното поскапување на цената на природниот гас, кое го одобри Регулаторната комисија за енергетика, граѓаните и индустријата во земјава плаќаат најскап гас во Европа. Малопродажната цена на гасот изнесува дури 384 долари за 1.000 кубни метри. Само за споредба, во соседна Бугарија, од каде што, всушност, доаѓа гасот во земјава, малопродажната цена за истото количество е 103,4 долари.

Според експертите, причина за толку високата цена е увозната цена, која во структурата на малопродажната учествува со повеќе од 70 отсто. Според официјалните податоци што ги утврдила РКЕ, набавната цена на гасот за во Македонија изнесува 255,92 долари. Во Бугарија увозната цена изнесува нешто повеќе од 73 долари. Вториот по големина елемент што ја гради малопродажната цена се трошоците за превоз. Додека кај нашите источни соседи тие се движат од 10 до 12 долари, во Македонија, за транспорт на 1.000 кубни метри природен гас на 100 километри, РКЕ утврдила трошоци од 42,5 долари.

Давачките за трговската мрежа изнесуваат дури 47 долари. На ова треба да се додадат и трошоците за даноците, кои вкупно изнесуваат 55,92 долари, и за царина, шпедиција, банкарски гаранции, увозни такси и осигурување, кои во структурата на малопродажната цена изнесуваат 7,65 долари. Дознаваме дека непосредно пред седницата на Регулаторната комисија, на која било одобрено поскапувањето на гасот, од Јавното претпријатие "Гама" побарале само 10 долари за транспорт низ земјава, но биле одбиени. Причината за ова било тоа што "Гама" се уште не го стопанисува гасоводот.

– Ако РКЕ го прифатеше предлогот, малопродажните цени ќе останеа на ниво од 348 долари, односно ќе немаше потреба за нивно менување. Последното поскапување беше по барање на "Макпетрол", кој го образложи со зголемување на увозните цени од "Газпром" од 235,40 на 255,92 долари – велат во "Гама.

Директорот на Јавното претпријатие Владо Петрески тврди дека во последните три месеци, поточно од 25 октомври, кога од РКЕ и официјално ја добија дозволата за пренос на природен гас низ земјава, до денеска загубиле 848.000 евра зашто не го стопанисуваат гасоводот.

– Тоа е загуба за државата, а парите се слеваат во приватна компанија – вели Петрески.

Со последната одлука на РКЕ не се задоволни, пред се, големите потрошувачи, кои велат дека е нелогично што Македонија како најсиромашна држава плаќа најскап гас во Европа. Тие се сомневаат во увозната цена и се надеваат дека по либерализација на пазарот, освен "Макпетрол", ќе се појави уште некој трговец, кој ќе може да купува природен гас.

– Набавната цена што ја прикажува "Макпетрол" ја проверивме со увид во договорот на "Газпром" до "Макпетрол" и преку влезните фактури и царински декларации – тврди Славе Ивановски, прв човек на РКЕ.