Пријавувањето на акциите, колите, становите и куќите стекнати од бизниси на црно, или од неоданочени пари може да се изврши до 30 јуни годинава, но никој се уште не се пријавил да си го легализира капиталот

НИКОЈ НЕ СЕ ФАЌА НА ПРЕДИЗБОРНИОТ ЈАДЕЦ НА СДСМ

Пријавувањето на акциите, колите, становите и куќите стекнати од бизниси на црно, или од неоданочени пари може да се изврши до 30 јуни годинава, но никој се уште не се пријавил да си го легализира капиталот

Имотите, акциите, куќите и становите стекнати од црни пари државата ќе ги контролира наназад 10 години. Тоа значи дека даночните инспектори ќе можат секого да го прашаат од каде му се парите за куќата изградена во 1996 година. И токму на неколку месеци пред избори.

Ова е новото решение во Законот за даночна постапка, што ќе се применува од први април во посебните постапки за оданочување со 70 отсто на непријавените приходи или имот стекнат од нив. Владата го промовираше новиот начин за справување со перењето пари и даночниот криминал на крајот на минатата година, со носењето измени на Законот за персоналец со кои даночниците добија можност да покренат посебна постапка за задолжување со персонален данок на било кој граѓанин за кој ќе утврдат дека има имот или пари поголеми од оданочените или за кои се сомневаат дека воопшто не се оданочени. Според јануарската регулатива, застареност на правото за утврдување на данокот настануваше за пет години по стекнувањето на имотот или парите.

Со новите решенија, граѓаните добија можност од шест месеци, сметајќи од први јануари, сами да го пријават неоданочениот имот или пари, и доколку тоа го направат, немаат да треба да плаќаат казнен данок од 70 отсто, туку по регуларните стапки од 15, 18 и 24 отсто. Пријавувањето на акциите, колите, становите и куќите остварени од приходи од неоданочени пари, што се стекнати од бизниси на црно, или од неоданочени пари од членување во управни одбори или од дивиденди, може да се изврши до 30 јуни годинава. За оваа можност даночните експерти велат дека е обид за амнестија на капиталот. Но, тие се истовремено зачудени зошто власта, ако тоа и била целта, не ја промовира можноста гласно, туку грото од луѓето не ни знаат дека постои ваква постапка.

Извори на "Вест" велат дека не само што досега никој не пријавил, туку и да сакал немал на што – дури деновиве е изготвен правилникот и образецот "Пријава за утврдување на персоналниот данок од доход на неоданочени или недоволно оданочени приходи". Изминативе три месеци биле потребни за да се расчисти дилемата дали во образецот треба да се напише само износот на парите кои се пријавуваат (што било став на Управата за јавни приходи) или и имотот во кој тие пари се претворени, на што инсистирало Министерството за финансии.

Од јули, даночните инспектори би требало да тргнат во специјални истраги, но како тие ќе бидат изорганизирани, дали според постапките предвидени за финансиската полиција или поинаку – уште не се знае. Инспекторите би делувале по пријава, врз основа на укажување на друг орган или доколку во друга контрола се посомневаат во постоење на неоданочени пари или имот. Осомничениот за поседување неоданочен имот сам ќе треба да го докаже потеклото на парите. Оттука и скриената можност за политички подметнувања, токму спроти парламентарните избори.

Уште откако власта ја најави варијантата за зголемено оданочување на непријавените приходи, не стивнаа коментарите дека тоа е уште една предизборна финта со која божем ќе се расчистува со имотот стекнат на црно, а всушност станува збор за веќе еднаш видено сценарио кое не резултираше со ништо. Власта предводена од СДСМ воведе слично решение и во изборната 1998 година, кое предвидуваше 100 отсто поголем данок за поседување неоданочен имот, но никој не плати таков износ. Во 2001, коалицијата предводена од ВМРО ДПМНЕ, ги избриша одредбите од законот. "Интересно ќе биде ако оние што ги донесоа решенијата, треба да ги применуваат и по изборите", коментираат извори на "Вест".