Речиси сите европски лидери одлучија да ја бојкотираат кинеската воена парада по повод Денот на победата во Пекинг, со исклучок само на двајца лидери чие присуство предизвика бројни контроверзии, пишува „Би-би-си“.

Тоа се словачкиот премиер Роберт Фицо и српскиот претседател Александар Вучиќ, кои со тоа повторно се најдоа во центарот на вниманието. И двајцата присуствуваа на руската парада за Денот на победата во Москва во мај и, исто како и тогаш, и сега во Пекинг се сретнаа со рускиот претседател Владимир Путин.

Иако двајцата пристигнаа во Пекинг, нивните мотиви се разликуваат. Србија, иако е кандидат за членство во ЕУ, има блиски економски односи со Кина и се обидува да одржи неутрален став кон Русија, и покрај осудите на војната во Украина.

Од друга страна, позицијата на Роберт Фицо е многу посложена. Неговата Словачка е членка и на ЕУ и на НАТО, но Фицо отворено повикува на нормализација на односите со Русија.

Додека Брисел планира да го прекине увозот на руска нафта и гас до крајот на 2027 година, словачкиот премиер сака да го зголеми снабдувањето на својата земја со руски енергетски производи, и покрај напорите на Украина да го прекине гасоводот.

Остра порака од Брисел

Додека Путин го фали Фицо за неговата „независна надворешна политика“, европските сојузници го гледаат тоа сосема поинаку.

На прашањето дали словачкиот премиер ја претставува Европската Унија во Пекинг, портпаролката на Европската комисија даде краток и јасен одговор „не“. Таа нагласи дека Кина е „клучен поддржувач“ на Русија во војната против Украина.

Политичките противници на Фицо во Словачка го обвинуваат дека служи на руската пропаганда и деја ги предал интересите на сопствената земја. Самиот Фицо го оправдува своето доаѓање со тоа што наведува дека е во Пекинг „додека се формира новиот светски поредок“.

По разговорот со Путин, тој рече дека дошол до неколку заклучоци и дека има „сериозна порака“ за украинскиот претседател Зеленски, со кого треба да се сретне во петок.

Фото: ЕПА

Српскиот претседател Александар Вучиќ денес објави дека Кина отсекогаш била покрај Србија, особено во тешките моменти.

„Благодарен на претседателот Шји и кинескиот народ за нивното искрено пријателство кон нашата Србија. Кина отсекогаш била покрај Србија, особено во тешките моменти. Србија и српскиот народ никогаш нема да го заборават тоа“, напиша Вучиќ на Инстаграм.

На воена парада во Кина беа претставени неколку нови ракетни и одбранбени системи, покажувајќи колку брзо земјата го развива својот стратешки арсенал.

Една од најзначајните беше Донгфенг-5Ц (ДФ-5Ц), нова варијанта на кинеската интерконтинентална балистичка ракета способна за нуклеарно оружје. Аналитичарот за одбрана Александар Нил забележа дека ДФ-5Ц има поголем дострел и може да носи до 12 боеви глави на една ракета.

Станува збор за двостепена ракета на течно гориво, напојувана од две последователни ракетни фази, секоја со свој мотор. Сместена е во подземни силоси и служи како стратешко средство за одвраќање.

🇨🇳☢️ China showcased its DF-5C intercontinental ballistic missile (ICBM) at the Beijing parade. With a global strike radius, the DF-5C is capable of carrying multiple nuclear warheads and reaching any point on Earth. pic.twitter.com/h2T3K0B453

— DD Geopolitics (@DD_Geopolitics) September 3, 2025

Според Нил, „Донгфенг-5“ е дизајниран да биде лансиран од кинеските силос полиња на северот од земјата, од каде што може да погоди цели во континенталниот дел на САД. Центарот за стратешки и меѓународни студии вели дека ракетата може да носи големи нуклеарни боеви глави и да достигне цели во САД и Западна Европа.

На парадата беше претставен и Донгфенг-61 (ДФ-61), долгоочекувана ракета дизајнирана да влезе во делумна орбита и да испорача хиперсонично оружје. Станува збор за мобилна ракета на патна база, што ѝ дава голема мобилност. Во комбинација со мобилен фрлач (TEL), може лесно да се скрие, брзо да се наполни со гориво и да се распореди на различни локации, држејќи го противникот во неизвесност.

Д-р Сидхарт Каушал, водечки експерт за ракети во лондонскиот тинк-тенк RUSI, истакна уште два нови хиперсонични системи – YJ-17, хиперсонично летало за едрење и YJ-19, хиперсонична крстосувачка ракета.

Кина, исто така, инвестира многу во развој на вештачка интелигенција и автономно оружје. Пример за ова е AJX002, џиновски подводен дрон долг 18 метри, способен да носи нуклеарно оружје.

Покрај ракетните системи, беше прикажано и ласерско оружје монтирано на осумтркален оклопен камион HZ-155. Според Александар Нил, ова е исклучително моќен систем кој може да ги онеспособи или запали електронските уреди, па дури и да ги заслепи пилотите.

Shipborne laser #weapons revolutionize #naval #warfare.#Vdaymilitaryparade #China #navalwarfare pic.twitter.com/fcDxHO9c2X

— Beijing Daily (@DailyBeijing) September 3, 2025

Нуклеарниот арсенал на Кина моментално се проценува на стотици ракети, значително помал од арсеналите на Русија и САД, кои се мерат во илјадници. Но, тој брзо расте, а Кина развива иновативни начини за паралелно испорачување на своите боеви глави.

фото: принтскрин