Владата ќе се откаже од 15 милиони долари, колку што и должи Русија и тоа ќе го компензира со доградбата на гасоводниот прстен за Скопје, дел од гасоводниот систем, што чини 4 милиони долари, тврди раководството на „Макпетрол“.

Никола Стојанов

Владата ќе се откаже од 15 милиони долари, колку што и должи Русија и тоа ќе го компензира со доградбата на гасоводниот прстен за Скопје, дел од гасоводниот систем, што чини 4 милиони долари, тврди раководството на „Макпетрол“.

Таа компанија уште во ноември лани поднела барање до Министерството за транспорт и врски да и даде градежна дозвола за доградба на гасоводниот прстен. Министерството за транспорт досега не одговорило на барањето на „Макпетрол“, кој изработил проект за економската издржаност на проектот и утврдил дека таа инвестиција ќе чини 4 милиони долари. Надлежните од тоа министерство вчера не објаснија зошто не договориле на барањето на „Макпетрол“. Затоа што не добил одговор на барањето „Макпетрол“ се обратил и до Владата од која побарал да добие одговор и дозвола за доградба на гасоводниот прстен. Владата до денеска не одговорила на барањето на „Макпетрол“. Поради ова, правниците на „Макпетрол“ потврдија дека скопската компанија за дистрибуција на нафта најавува дека ќе ја тужи државата.

Како што најавија претставници на Владата неодамна било договорено со претставници на руската компанија за производство и пренос на енергенси „Рос нефт газ строј“ да го довршат гасоводниот прстен, со што ќе се комплетира делот од гасоводот во близината на Скопје. Било договорено Владата да го отпише своето побарување од Русија вредно 15 милиони долари, а руската компанија да ја доврши изградбата на гасоводниот прстен, кој потоа ќе биде во државна сопственост.

Василиј Медведенко, вицепретседател на рускиот гигант „Роснефтгазстрој“ за руската

новинска агенција „ИТАР ТАСС“ изјавил дека очекува македонската влада на јавното претпријатие „ГА-МА“ да му ги даде сите полномоштва за можат да ги почнат преговорите за доградба на гасоводниот прстен. Како што пренесува МИА, Медведенко за „ИТАР ТАСС“ изјавил дека зделката ќе се прави за да се компензираат македонските побарувања вредни 15 милиони долари.

„Време“ вчера не доби одговори од Владата, од која побаравме да објасни дали планира преку „ГА МА“ да склучи договор со „Роснефтгазстрој“ и зошто ќе компензира 15 милиони долари побарување за инвестиција која реално чини 4 милиони долари или 3,5 пати помалку од вредноста на побарувањето што Владата е спремна да го отпише.

Гасоводниот систем осум години практично е во владение на „Макпетрол“, кој го користи и го одржува системот. Владата и оваа компанија не можат да се договорат за заедничко владение, затоа што и двете страни себеси се сметаат да доминантни сопственици на системот. Аналитичарите оценуваат дека по оваа најава Владата покажува дека нема намера да преговара со „Макпетрол“ и дека со таа инвестиција во доградбата на гасоводниот систем и фактички ќе стане доминантен сопственик на капиталот во гасоводниот систем.