Голем дел досиеја на македонските кодоши на поранешните ОЗНА, УДБ-а и КОС се уништени и запалени, но основните документи што можат да ја обелоденат тајната структура на политичари, бизнисмени, судии и новинари се зачувани, тврдат високи полициски извори.

ЌЕ СЕ ОБЕЛОДЕНАТ ЛИ МАКЕДОНСКИТЕ КОДОШИ?

Голем дел досиеја на македонските кодоши на поранешните ОЗНА, УДБ-а и КОС се уништени и запалени, но основните документи што можат да ја обелоденат тајната структура на политичари, бизнисмени, судии и новинари се зачувани, тврдат високи полициски извори.

Според изворите, во последниве десетина години преку партиски структури во МВР биле бришени голем дел од имињата, но во тајните архиви се уште се зачувани главните податоци за соработниците на тајните служби.

Меѓу соработниците има имиња на поранешни и актуелни политичари, новинари, сегашни бизнисмени, а поранешни надворешнотрговски претставници во странство, како и имиња на судии и на други функционери и вработени во државната администрација.

Во јавноста веќе подолго време се врти идејата за обелоденување на имињата на соработниците на тајните полициски и разузнавачки служби. Истата идеја неодамна ја промовираше и пратеникот Стојан Андов. Тој најави дека ќе поднесе и иницијатива за формирање комисија на вистината, која ќе има задача да ги отвори тајните досиеја на македонските кодоши, кои според него, се уште функционираат исто како и во времето на поранешниот комунистички систем. Андов во интервју за неделникот „Фокус“ дури и обвини дека зад тие структури стои лично претседателот Бранко Црвенковски и дека тие се најголема причина за криминалот и корупцијата во земјата.

Од кабинетот на Црвенковски изјавија дека „немаат намера да коментираат апсурдни невистини, шпекулации и бесмислици“.

Претставници од политичките партии, пак, најавија дека ќе ја поддржат идејата за обелоденување на соработниците на тајните служби, но засега ниту една партија официјално не расправала за тоа.

Летото 2000 година владата на тогашниот премиер Љубчо Георгиевски донесе, а Собранието го изгласа Законот за постапување со досиеја за лица водени од службата за државна безбедност.

Законот беше во сила само една година, а на граѓаните им овозможуваше увид во личните досија што за нив ги правеле тајните служби. Законот не дозволуваше при увидот да се видат имињата на кодошите врз основа на чии информации биле правени досиејата и при дозволен увид истите биле пречкртувани со мастило. Во членот 4 од тој Закон се предвидуваше и уништување на личните досиеја, микрофилмуваниот материјал и електронски обработените податоци од досиејата само ако така оценеше тогашната комисија за контрола на законитоста за преземените активности во постапката со личните досиеја.

Е. З.