По писмото на началникот на здружената команда на силите на САД, адмиралот Мајкл Мален кој го повика Сенатот да го ратификува Договорот за ограничување на стратешкото вооружување со Русија, поддржувачите на ратификацијата успеваат да придобијат се повеќе гласови од републиканците, пишуваат американските медиуми денеска.Писмото на адмиралот Мален всушност е прекор за републиканците кои бараа расправата за ратификацијата на ткн. новиот СТАРТ да се одложи за почетокот на идната година и на договорот да се додадат амандмани кои ќе овозможат повеќе инспекции и поголем број стратешки бомбардери и интерконтинентални проектили. Во писмото на Мален што го цитираат американските медиуми, се наведува дека побрзата ратификација на договорот е клучна за националната безбедност на САД, и наведувајќи дека бил директно вклучен во преговорите со руската страна, нагласува дека „воените перспективи биле темелно разгледани“. Како што сметаат американските аналитичари, писмото на адмиралот ќе го зголеми притисокот врз колебливите републикански сенатори кои ќе бидат ставени во незавидна ситуација да го одбијат советот од армијата по прашањето на американската национална безбедност за што инаку имаат секогаш поддршка. Со писмото на Мален се интензивираат напорите на двете страни да се придобијат доволно сенаторски гласови за потребното двотретинско мнозинство од 67 гласови. Мнозинските демократи во Сенатот сега имаат обезбедено 58 гласови, а седум републикански сенатори веќе ја изразија својата поддршка, па потребни се само уште два гласа. Според некои предвидувања, гласањето би можело да се одржи уште денеска. Водачите на републиканското малцинство во Сенатот кои сакаат да расправаат за ратификацијата во февруари, затоа што тогаш во Сенатот ќе имаат 48 места, предупредуваат на брзоплетост во ратификацијата што би можело да им наштети на американските интереси./крај/ро/сн