NULL

Единаесет тинејџери се ранети во пукотници, во дворот на училиште во Шкотска, а двајца тинејџери се уапсени под сомнение дека стрелале врз учениците, соопшти полицијата во шкотскиот округот на Стратклајд. „Полицијата од Стратклајд може да потврди дека единаесет студенти се полесно ранети од истрели од пневматско оружје на улицата „Чрч“ во градот Охинлек во близина на училиштето  „Auchinleck Academy“ во средата попладне. Полицијата е на местото на настанот и спроведува интензивна истрага за инцидентот“, се наведува во соопштението на полицијата  што го цитира „BBC“. Во времето на инцидентот учениците биле на пауза. Според нивни изјави, врз нив било стрелано од зад блиските грмушки. Жртвите со полесни повреди биле пренесени во градската болница, каде што добиле медицинска помош, а еден ученик бил задржан заради натамошна нега.Полицијата, исто така, соопштува дека привела двајца тинејџери, на 18. и на 15-годишна возраст,  кои биле испрашувани во врска со инцидентот. Градскиот совет веднаш, во координација со полицијата, докторите и училишната управува, побарал да им биде обезбедена потребната поддршка на учениците и нивните родители. За разлика од другите земји во Европа, Азија, а особено во САД, масовни инциденти на стрелање врз цивили, а особено врз училишта се многу ретки за Шкотска. Последниот голем сличен инцидент се случи речиси пред 15 години, на 13-ти март 1996 г. кога невработениот, Томас Хамилтон со два пиштоли застрелал шеснаесет ученици и еден наставник во основното училиште во шкотскиот град Данблејн. Тогаш Хамилтон, кој некогаш бил водач на извидниците во истото училиште, извршил самоубиство. Меѓу учениците во училиштето во Данблејн за време на нападот, но за среќа останал неповреден,  бил и Енди Мареј, сегашниот прв рекет на Велика Британија. Инцидентот во училиштето во Данблејн, доведе до драстично заострување на правилата за носење и поседување огнено оружје во Велика Британија. /крај/ббц/сн