Израелските војници во неделата на денот кога Палестинците го одбележуваат со тага создавањето на израелската држава, стрелале врз демонстрантите кои се обидувале да ги минат израелските граници со Сирија, Либан и појасот Газа при што убиле најмалку 13 а раниле повеќе стотини лица

Израелските сили во најжестоките судири во последно време отвориле оган на три различни локации за да ги спречат толпите демонстранти да ја минат граничната линија. Либанската армија соопшти дека на либанската граница загинале десет Палестинци кога израелските војници отвориле оган врз демонстрантите кои фрлале камења врз нив и се обидувале да навлезат на израелската територија.Извори од безбедносните либански служби за странските медиуми изјавиле дека повеќе од стотина демонстранти се ранети во пукањето близу либанското погранично село Мароунал-Рас.Израелската армија, пак, соопшти дека либанските војници употребиле боева муниција во настојувањата да ја задржи толпата која се нафрлила врз граничната ограда. Тел Авив овие инциденти ги припиша на провокациите кои ги поттикнал Иран за да ги исползува палестинските национални чувства кои се засилени со народните бунтови од ткн. „арапска пролет“ и за да го сврти вниманието на меѓународната јавност од големите народни демонстрации во Сирија чиј сојузник е режимот во Техеран.Сириските медиуми информираа дека во израелскиот оган се убиени две лица откако десетици палестински бегалци ја минале израелско-сириската граница на Голанската висорамнина. Сириското министерство за надворешни работи постапката на израелските сили ја оцени како „злосторничка активност“.Во израелската престолнина Тел Авив, се претпоставува дека намерно, Арап со камион се залетал во возила и пешаци при што загинал еден маж а 17 лица се повредени. На Западниот брег кој е под израелска окупација, младите Палестинци и израелските војници со часови се судираа кај Каландија, главниот контролен пункт меѓу Западниот брег и Ерусалим, односно точката којашто ја дели административниот палестински центар Рамал од Ерусалим. Палестинците фрлале камења и палеле автомобилски гуми, додека израелските војници се обидувале да ги растераат со гумени куршуми и со солзавец. Притоа еден Палестинец бил повреден со гумен куршум во главата и се наоѓа во сериозна состојба, рекле од локалната болница во која бил примен.На границата меѓу Израел и појасот Газа од оган отворен од страна на израелските војници ранети се 82 демонстранти кои се приближувале до граничната ограда, соопштиле палестински медицински извори. Израелската армија соопшти дека во одвоен инцидент застрелале еден маж кој се обидувал да постави бомба во близина на границата.Израелскиот премиер Бенјамин Нетанјаху изјави дека се надева оти судирите нема да ескалираат .„Се надеваме дека мирот и спокојството брзо ќе се вратат. Но никој нека не се залажува. Ние сме решителни да ги браниме нашите граници и суверенитетот“, нагласува Нетанјаху.Претседателот на Палестинската самоуправа, Махмуд Абас во неговото обраќање преку телевизијата по повод годишнината рекол дека во неделата се убиени маченици за палестинската кауза„Нивната драгоцена крв нема да биде попусто пролиена, Таа е пролиена за слободата ана нашата нација“, рече Абас. Палестинците во неделата ја одбележуваат ткн. „накба“ (катастрофата), односно годишнината од прогонот на 760 илјади Палестинци од израелските подрачја во 1948 г. кога е формирана израелската држава. Според процените на Обединетите нации бројот на прогонетите и нивните потомци изнесува околу 4,8 милиони. Резолуцијата на 194 на Обединетите нации наложува на сите прогонети кои тоа го сакаат да им се овозможи што побрзо враќање.