Британската влада им забрани на домашните телекомуникациски оператори да купуваат антени и опрема за 5Г мрежа произведена од кинеската компанија „Хуавеј“, пренесе „Би-би-си“.

Одлуката важи од 31 декември натаму, а покрај тоа, операторите мора да ја отстранат целата опрема на оваа кинеска компанија од нивните мрежи до 2027 година.

Секретарот за дигитални работи, Оливер Дауден, денеска ја објави одлуката во британскиот парламент.

Минатата година САД воведоа санкции кон „Хуавеј“, тврдејќи дека компанијата претставува закана за националната безбедност, што пак кинеската компанија децидно го негира.

Дауден рече дека одлуката ќе го забави воведувањето на 5Г мрежата за околу една година.

„Оваа одлука не беше лесна, но е најсоодветна за нашите мрежи и за националната безбедност и економијата, сега, но исто така и на долг рок“, нагласи тој.

Со ова, британската влада на крајот сепак одлучи да се дистанцира од „Хуавеј“ како производител на мрежната опрема за 5Г во таа земја.

Дауден исто така објасни дека крајниот рок за отстранување е поставен до 2027 година затоа што земјата не сака да се потпира само на „Нокија“ како единствен производител на опрема.

Американскиот фармацевтски концерн „Модерна“ објави дека завршните клинички испитувања за вакцината против Ковид-19 ќе почнат на или околу 27 јули.

Станува збор за третата, клучна фаза на тестирање кај луѓе, на вакцината позната како mRNA-1273.

Клиничкото испитување го води Националниот институт за здравство (NIH), а американската влада инвестира речиси половина милијарда долари во проектот на концернот „Модерна“.

Завршните клинички испитувања ќе бидат спроведени на 87 локации, сите во САД. Ќе бидат вклучени околу 30.000 возрасни луѓе за кои има голема веројатност да бидат заразени со коронавирус. Во текот на студијата ќе се спореди бројот на новозаразени меѓу оние што ја примиле новата вакцина и оние што примиле плацебо.

Експерименталната вакцина ќе биде тестирана во 30 држави и во градот Вашингтон. Половина од нив се сојузни држави тешко погодени од епидемијата, како Тексас, Калифорнија, Флорида, Џорџија, Аризона и Северна и Јужна Каролина.

САД во последните денови бележат рекорден број новозаразени лица, особено од споменатите држави.

Акциите на „Модерна“ кон средината на денот пораснаа 2,5 процента на американската технолошка берза.

Во САД е извршена првата смртна казна на сојузно ниво по 17 години, а егзекутиран е човек осуден за тројно убиство, соопшти Министерството за правда.

Даниел Ли (47) беше погубен во 8.07 по локално време со смртоносна инјекција во сојузниот затвор во Индијана, се наведува во соопштението доставено до агенцијата „Франс прес“.

„Убивате невин човек“, биле последните зборови на овој осуденик, објави новинар од Индијанаполис, кој присуствувал на егзекуцијата.

Во 1999 година Даниел Ли беше прогласен за виновен за убиство на брачна двојка и нивната осумгодишна ќерка во Арканзас за време на грабеж.

Според американскиот правосуден систем, кривичните дела може да се судат или во сојузните судови на национално ниво или во државните судови на регионално ниво.

За одредени кривични дела, како што се фалсификување валути или кражба на пошта, автоматски се суди на сојузно ниво, како и во случаи во кои САД се странка или, пак, ситуации што вклучуваат уставни прекршувања.

За другите може да се суди и во федералните судови врз основа на сериозноста на злосторствата.

Според американските медиуми, семејствата на жртвите се спротивставиле на егзекуцијата, па затоа поднеле тужба за запирање наведувајќи дака поради ризикот од коронавирусот, нема да може да присуствуваат на извршувањето на смртната казна.

Ерлин Петерсон (81), чија ќерка, внука и зет биле убиени од Ли, пак, изјавила дека сакала на 47-годишникот да му биде изречена доживотна затворска казна, како што било случај со неговиот соучесник.

Уште две егзекуции на сојузно ниво се закажани за подоцна оваа недела, а четвртата егзекуција е планирана за август.