Свет
Британската полиција ослободи 24 луѓе држени како робови

Британската полиција уапси пет лица под обвинение дека држеле 24 мажи против нивната волја и ги присилувале да работат како робови, некои од нив дури 15 години.
Британската полиција уапси пет лица под обвинение дека држеле 24 мажи против нивната волја и ги присилувале да работат како робови, некои од нив дури 15 години.
Полицијата од Бедфордшајр, северозападно од Лондон, ги уапси петмината според новиот антиробовски закон, усвоен минатата година, под обвинение дека ги примамувале луѓето во камп со приколки, со ветувања дека ќе им дадат храна и засолниште, а потоа ги третирале насилно и ги присилувале да работат исклучително тешки работи.
Жртвите, кои се и од Англија и од повеќе делови на Источна Европа живееле во ужасни услови и кога ги пронашла полицијата, повеќето биле на работ на изгладнетост.
„Нема струја, нема питка вода, луѓето не се потстрижани и се облечени во ужасно валкани облеки. Згора, тие биле присилувани да работат тешки работи, без при тоа да добијат ниту храна, ниту, пак, нормална плата за нивниот труд“, изјави главниот инспектор Шон О’нил од полицијата на Бедфордшајр.
Полицијата дознала од информациите кои ги добила од неколкуте жртви на оваа организација кои успеале да избегаат. Тие покренале обемна истрага, а во неделата извршиле и рација, при што се уапсени сторителите. Четворица од нив се задржани во полиција заради испрашување, а петтото лице, жена, е ослободена со кауција бидејќи е пред породување. Тројца од уапсените, кои се на возраст од 19 до 33 години, се браќа, а четвртиот е нивни зет.
Деветмина од ослободените веднаш си заминале и одбиле да и помогнат на полицијата во истрагата.
Според новиот антиробовски закон на Британија, кој беше усвоен минатата година, секој кој држи друг човек во заложништво против нивната волја, се соочува со казна до 14 години затвор.
Според Центарот за трговија со луѓе на Велика Британија, кои и помагаше на полицијата при овој случај, во изминативе две години во земјата се пријавени речиси 1.500 случаи на трговија со луѓе. /крај/cnn/сс/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелски војници забележани во градот Газа

Палестински очевидци тврдат дека во градот Газа забележани се израелски војници.
Според нив израелските војници биле забележани во населбата Сабра, во близина на зграда во која порано се наоѓало училиште.
Израелските војници наводно се заблежани во градот Газа откако израелскиот премиер Бенјамин Нетанјаху одобри план за преземање на градот, во кој живеат околу еден милион луѓе.
Израелската армија не ги коментираше палестинските наводи, истакнувајќи оти не ги открива позициите на своите војници.
Претходно Израел соопшти дека планира да евакуира околу еден милион жители од градот пред офанзивата, која се очекува да почне најрано во септември.
Свет
Зеленски вели дека постои вистинска можност да заврши војната во Украина

Претседателот на Украина, Володимир Зеленски синоќа најави дека следните денови ќе бидат готови безбедносните гаранции за неговата земја.
Тој, по телефонскиот разговор со премиерот на Холандија, Дик Шуф, на платформата Икс објави дека „во моментот тимови на Украина, САД и европските партнери работат на решение“.
Според Зеленски постои „вистинска можност да се заврши оваа војна“, додавајќи дека Украина е „подготвена за конструктивни чекори што можат да доведат до вистинскиот мир“.
– Русија од своја страна не покажува намера за мир и продолжува да ги гранатира нашите градови. Сите сигнали што доаѓаат од Москва овие денови ги толкуваме на ист начин. Ни треба притисок за промена на нивниот став, како и состанок на највисоко ниво за да се разговара за сите прашања, посочи Зеленски.
Свет
Северна Кореја тестираше нови ракети

Северна Кореја вчера истрела два нови противвоздушни проектили за уништување на различни воздушни цели, меѓу кои дронови и крстосувачки ракети. Тестирањето на новото оружје го надгледуваше севернокорејскиот лидер Ким Џонг-ун.
Како што јави Корејската централна новинска агенција (КЦНА) новото оружје има „супериорна борбена способност“ и користи „единствена технологија“.
Тестирањето на ново оружје се одвива во време на зголемени тензии со Јужна Кореја. Официјален Сеул вчера соопшти дека на 19 август јужнокорејски војници отвориле предупредувачки оган кон припадници на севернокорејската армија, кои накратко навлегле во Демилитаризираната зона.
Исто така во регионот се одржува заедничка воена вежба помеѓу Јужна Кореја и САД, а за утре е предвидена средба на американскиот претседател Доналд Трамп со новоизбраниот јужнокорејски претседател Ли Џае-мунг.