Либериската претседателка Елен Џонсон Серлиф, либериската мировна активистка Лејмах Гбови и јеменската новинарка и активистка Тавакол Карман се добитнички на годинешнава Нобелов награда за мир „за нивната борба за правата на жените и нивната безбедност“

Либериската претседателка Елен Џонсон Серлиф, либериската мировна активистка Лејмах Гбови и јеменската новинарка и активистка Тавакол Карман се добитнички на годинешнава Нобелов награда за мир „за нивната борба за правата на жените и нивната безбедност“, соопшти во петокот Комитетот за доделување на Нобеловата награда за мир во Осло. „Не можеме да оствариме демократија и траен мир во светот сé додека жените не добија исти можности како мажите, за да влијаат врз развојот на сите нивоа на општеството“, изјави за новинарите, претседателот на комитетот, Тхорбјорн Јагланд. „Нобеловата награда за мир за 2011 година, ќе биде доделена на три еднакви дела меѓу Елен Џонсон Серлиф, Лејмах Гбови и Тавакол Карман, за нивната ненасилна борба за безбедност и за правата на жените на целосно учество за изградба на мир“, истакна Јагланд. Комитетот за доделување на Нобеловата за мир во Осло соопшти дека се надева оти наградата за трите жени „ќе помогне да се заврши гушењето на правата на жените, што сé уште се случува во многу земји, и дека ќе се реализира големиот потенцијал на жените во изградбата на демократијата и мирот“. Норвешкиот премиер Јенс Столтенберг изјави дека Нобеловата награда за мир доделена на трите заштитнички на човековите права е признание на борбата на сите жени во светот за нивните права. „Ја гледам оваа награда како признание за активностите на сите жени во светот кои се борат за правата на жените и кои се борат за демократија и човекови права“, рече Столтенберг, како што пренесува интернет страницата на весникот VG. Седумдесет и двегодишната Џонсон Серлиф е првата претседателка на некоја африканска држава којашто е избрана на слободни избори. Гбови ги мобилизираше и организираше жените бе оглед на етничката и верската поделеност, за да се стави крај на војната во Либерија и за да се обезбеди учество на жените на изборите. Карман, пак, ја одигра водечката улога во борбата за правата на жените и демократијата и мирот во Јемен.Со стапувањето на должноста претседателка на Либерија на 23-ти ноември 2005 година, Елен Џонсон Серлиф, стана првата жена која е избрана за шеф на држава во историјата на африканскиот континент. Таа е втората црна претседателка на држава во светот. Ја нарекуваат „Челичната леди“, разведена е, има четири деца и шест внуци. Лејмах Гбови е родена во централна Либерија, На 17-годишна возраст се преселила во Монровија во времето кога изби првата либериска граѓанска војна. Ја минала обуката за психолошка советничка во текот на граѓанската војна и работела со децата на поранешните војници од силите на Чарлс Тејлор. Окружена со сликите на војната, како што вели, сфатила дека „мајките мораат да ги спроведат промените во општеството“. Има шест деца Гбови е главниот лик во документарецот снимен 2008 година со наслов „ Pray the Devil Back to Hell“.Тавакол Карман ја основаше групата за човекови права Жени новинари без пранги (WJWC) во 2005 година, за унапредување на човековите права „особено за слободат ана мислењето и изразувањето и демократските права“. Таа добивала „закани понуди“ од властите поради тоа што не сакала да го прифати одбивањето на министерството за информирање  да му дозволи на WJWC да основа весник и радио станица. Од 2007 до 2010 година редовно ги предводеше протестите пред влада во Сана“а. Ги предводеше и протестите во текот на бунтот во Јемен од оваа година, а нејзините напори се документирани во една емисија на програмата на англиски јазик на катарската сателитска телевизија Al Jazeera со наслов „People and Power“.Карман изјави во петокот дека добивањето на Нобеловата награда за мир претставува победа за јеменските демократски активисти коишто нема да отстапат додека не добијат целосни права во „демократскиот модерен Јемен“.„Тоа е, пред сé, победа на младите. Ние сме овде да ја извојуваме нашата слобода и достоинство. Нашата млада револуција ги сака нашите целосни права“, изјави Карман за Al Jazeera. Таа наградата ја посвети на сите „арапски пролети“ Добитничките рамноправно ќе поделат награда од милион евра. Церемонијата на врачувањето на признанијата ќе се одржи на 10-ти декември во Осло на денот на смртта на основачот на Алфред Нобел, шведскиот мислите, научник, иноватор и претприемач. Истиот ден, во Стокхолм ќе бидат врачени другите четири награди завештани од Нобел, чии лауреати беа објавени претходната седмица, како и наградата за економија./крај/ро/рн/сн