Горниот дом на францускиот парламент во понеделник треба да расправа и да гласа за предлог-законот со кој во Франција ќе стане незаконски да се негира геноцидот кој отоманска Турција го извршила врз Ерменците во 1915 година.

Горниот дом на францускиот парламент во понеделник треба да расправа и да гласа за предлог-законот со кој во Франција ќе стане незаконски да се негира геноцидот кој отоманска Турција го извршила врз Ерменците во 1915 година.

Досега во Франција таков закон е воведен само за геноцидот врз Евреите во Втората светска војна.

Француските сенатори ќе го разгледуваат предлог-законот еден месец откако истиот беше изгласан во Долниот дом на парламентот со огромно мнозинство.

Против гласањето во сенатот во саботата во париз демонстрираа преку 15.000 Турци кои живеат во Франција и во околните држави.

Закажаната дебата повторно предизвика бесна реакција од официјална Анкара, која се закани со казни со „трајни“ санкции, ако предлог-законот биде изгласан и стане закон. Турција веднаш по изгласувањето во Долниот дом ги замрзна политичките и воени врски со Франција и најави натамошни мерки, но ги стави во мирување во очекување на резултатите од гласањето во сенатот и ратификација од страна на претседателот Никола Саркози, чија десничарска партија УМП го предложи овој закон.

„Ќе следуваат додатни санкции и овој пат тие санкции ќе бидат трајни, се додека Франција не го смени ставот. Сега е време француските интелектуалци, француските сенатори да ги одбранат заедничките вредности, слободата на говорот, кои се и европски и француски вредности. Овој закон е против тие вредности“, изјави турскиот министер за надворешни работи Ахмет Давутоглу во саботата и додаде дека законот нема да помогне во подобрувањето на турско-ерменските односи.

Давутоглу, исто така, ја откажа својата посета а Брисел во понеделник, на која требаше да ги брифира своите колеги од ЕУ за неговата посета на Техеран, пред тие да ги гласаат најавените нови санкции против Иран.

Во обид да ја смири кризата, Саркози во петокот испрати помирувачко писмо до турскиот премиер Таип Реџеп Ердоган, во кое ја изразува својата надеж дека „ќе надвладее разумот и ќе продолжи дијалогот што ги обединува и двете држави и двата народа“, што е од најголема корист „и за двете пријателски и сојузнички држави“. Тој во писмото истакна дека законот не е насочен посебно кон ниту една држава или народ.

Во средата сенатската комисија надлежна за прашањето го отфрли предлог-законот, со образложение дека може да ги прекрши уставните заштити, вклучувајќи ја и слободата на говорот,но не се очекува нивната одлука да влијае врз конечното гласање во сенатот.

Дури и сенатот да го отфрли предлог-законот, помоќното народно собрание може повторно да го изгласа, по што би следела ратификација од претседателот.

Предлог-законот ја подели и француската влада, во која повеќе министри стравуваат дека ваквиот потег ќе им наштети на дипломатските и економските односи со сојузникот од НАТО и еден од најголемите трговски партнери на Франција. И шефот на француската дипломатија, Ален Жупе, призна дека потегот е „во лошо време“.

Франција ги призна масовните убиства на Ерменците во 2001 година, но со новиот закон ќе се казнува секој кој ќе се обиде да го негира тој факт, а казната е една година затвор и парична казна во висина од 45.000 евра.

Ерменија тврди дека најмалку 1,5 милиони Ерменци умреле кога отоманските Турци во 1915 и 1916 година ги депортирале од источна Анадолија во сириските пустини и на други оддалечени места во тогашната империја.

Турција, пак, тврди дека вкупниот број на умрените Ерменци на недминал 300.000. Анкара признава дека биле сторени злосторства, но жестоко негира дека имало смислен план да се уништи ерменскиот народ, туку дека во текот на Првата светска војна многу луѓе умреле и на двете страни и дека во тој период страдале сите. /крај/Aljazeera/сс/