Афтершок со магнитуда од 8,2 степени по Рихтер во средата го погоди крајбрежјето на индонезискиот остров Суматра, соопшти интернет страницата на Геолошката служба на САД – USGS.

Според последните податоци на службата, подземниот удар бил регистриран во 16,43 часот по локално време. Хипоцентарот на земјотресот е фиксиран на длабочина 16,4 километри. Епицентарот на потресот бил на 615 километри југозападно од градот Банда Ачех. Во целата област нема електрична енергија а во градовите се слушаат сирени за предупредување од опасност, пренесуваат агенциите.

Претходно американската геолошка служба јави дека првиот земјотрес што го погоди истата област бил со магнитуда од 8,7 степени според Рихтер. Потресот беше регистриран на длабочина од 33 километри. И натаму нема информации за евентуални жртви или материјални штети.

Силните потреси во индонезиското крајбрежје поради што е прогласена опасност од појава на цунами во Индискиот Океан, ги натера во средата жителите на регионот во панично бегство од своите домови и канцеларии и криење кон повисоките области во регионот.

На Тајланд во две покраини е прогласена опасност од цунами, во Пукета и Пангне во Адаманското Море каде што покраинските власти наредија евакуација.

Индискиот центар за тревожење најави дека се очекуваат бранови со височина од шест метри покрај деловите од источниот брег на земјата, а дека помали бранови ќе достигнат до Андамаските и Никбраските острови.

Предупредување од цунами е издадено за сите земи во Индискиот Океан.

Земјата се тресела и во Сингапур, Тајланд, Малезија и Индија. На повисоките катови во Малезија потресот се чувствувал цела минута, а на некои места почвата се тресела дури пет минути а уште не е воспоставен контакт со населението од областите близу епицентарот на земјотресот.

Земјотресот ја погоди речиси истата област како и земјотресот од 26-ти декември 2004 година, со магнитуда од 9,1 степени по Рихтер, а цунамито коишто потоа ја погоди Суматра однесе 170 илјади човечки животи. Вкупно од тоа цунами во 2004 година загинаа 230 илјади луѓе во 13 држави од Индискиот Океан, од Тајланд преку Индонезија до Шриланка и Индија.

Земјотресот од 24-ти декември 2004 година се случи на длабочина од 30 километри на раседлината којашто под Индискиот Океан се протега од западна Индонезија до Бенгалскиот залив./крај/мф/сн