Свет
Талибаните извеле шест синхронизирани напади во Авганистан
Талибаните во неделата извеле шест синхронизирани самоубиствени напади за да го одбележат почетокот на традиционалната пролетна офанзива, од кои три во самиот центар на авганистанската престолнина Кабул, врз паралементот, странски амбасади и командата на НАТО.
Во текот на многу студените авганистански зими, исламистичките бунтовници од радикалното исламски движење Талибан, се одмараат а со првите затоплувања ги интензивираат нападите во ткн „пролетни офанзиви“.
Во неделните напади загинаа 19 бунтовници, додека ранети се 14 полицајци и девет цивили, пренесува AFP повикувајќи се на податоци објавени од авганистанското министерство за внатрешни работи.
И во почетокот на ноќта низ централните населби на Кабул одекнуваат експлозии и истрели, јавува агенцијата.
Нападите започнаа околу 12 часот по локално време, 14 часот по средноевропско, со експлозии и пукотници од автоматско оружје во добро обезбедуваниот кварт каде што се лоцирани дипломатските резиденции и амбасадата на САД.
Истовремено бомбаши самоубијци вооружени со ткн „самоубиствени елеци“ се обиделе да продрат во зградата на авганистанскиот парламент, но биле запрени од безбедносните сили.
Авганистанската разузнавачка служба наведува дека еден од двајцата заменици претседатели, Мохамед Карим Калили бил цел на нападот, како што признал еден од уапсените напаѓачи.
Во исто време бомбашите самоубијци заземале објекти на владата, полицијата и една американска база во покраината Логар јужно од Кабул, соопшти авганистанската полиција ненаведувајќи други детали.
Неколку минуту подоцна биле ранети неколку луѓе во нападите на тројца бомбаши самоубијци на влезот на аеродромот во Џалалабад.
Во Гардез талибаните нападнале центар за обука на авганистанската полиција и раниле најмалку четири цивили, потврдила локалната полиција.
Американскиот амбасадор во Авганистан, Рајан Крокер, оцени дека одговорот на авганистанските безбедносни сили на бранот синхронизирани напади на талбаните во неделата во Кабул и уште две покраини претставува „јасен знак за нивното напредување“.
Авганистанските талибани објавија дека синхронизираните напади во неделата во неколку покраини и во главниот град Кабул, претставуваат почеток на нивната пролетна офанзива.
Во неделата во Кабул беа нападнати седум локации, меѓу кои и командата на НАТО, авганистанскиот парламент и неколку амбасади на странски земји, како и во покраините Пактија и Логар.
„Овие напади се почеток на пролетната офанзива којашто ја планираме со месеци“, изјави за Reuters портпаролот на радикалното исламско движење Талибан, Забиулах Муџахид.
Тој додаде дека во нападите коишто почнаа околу пладне, учествуваат „десетици талибански борци“, вооружени со лесно и тешко вооружување, а некои и со моќни експлозиви.
Од НАТО потврдија дека во Кабул се нападнати седум различни локации.
Вооружените судири со талибаните во неделата се водеа и околу седиштето на локалната управа во Ул-е-Алем, главниот град на покраината Когар и во Гардез, главниот град на покраината Пактија.
Штабот на НАТО, „Кемп Вејрхаус“, во предградието на Кабул заедно го бранеа од нападот на талибаните турски и грчки војници.
Истрелите се слушале од разни правци, а од неколку локации во Кабул се издигнуваат столбови од чад. Очевидци изјавија дека низ градот се слушале алармните уреди во странските амбасади, а пукотници имало во близината на амбасадите на САД и на Велика Британија.
Портпаролот на авганистанскиот парламент изјави дека биле нападнати и зградата на парламентот и руската амбасада. Меѓутоа, од руската амбасада ниту потврдиле ниту ја демантирале оваа информација, велејќи само дека ситуацијата е „нормална“ и оти се „преземаат сите потребни безбедносни мерки“, пренесува РИА Новости.
Талибаните ја преземаа одговорноста за овие напади во Каубул, пренесува американската телевизиска мрежа CNN, а во нивното соопштение испратено до агенциите се вели дека истовремено вршат напади и во покраините Пактија и Логар.
Според Reuters кој се повикува на неименувани претставници на НАТО, биле нападнати седум различни локации во Кабул.
„Авганистанските безбедносни сили (ANSF) и меѓународните сили за помош во Авганистан (ИСАФ) одговорија соодветно“, соопшти портпаролот на мисијата ИСАФ преку својот профил на микроблогот Твитер.
Американската администрација соопшти дека целиот персонал во амбасадата на САД во Кабул е на безбедно место, и меѓу нив нема повредени.
Во септември 2011 година беше изведе сличен напад во Кабул, кога талибаните заземаа неколку згради во изградба во центарот на градот ги користеа за ракетни напади и митролески оган./крај/мф/сн
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Блинкен пристигнува во Израел, седми пат од почетокот на војната
Американскиот државен секретар во вторник ќе го посети Израел, седми пат по нападот на палестински Хамас на 7 октомври врз јужен Израел и војната што следеше со израелскиот одговор во Појасот Газа.
Јавниот сервис Кан објави дека Блинкен ќе дојде во Израел за да разговара за најавената операција на израелската армија во Рафах, како и за напорите да се обезбеди пауза во борбите и да се ослободат повеќе од 100 заложници кои ги држеше Хамас.
Блинкен моментално е во посета на Кина.
Регион
Ана Брнабиќ за 2 јуни распиша локални избори во 66 единици на локалната самоуправа
Претседателката на српското собрание Ана Брнабиќ распиша избори за 2 јуни во 66 единици на локалната самоуправа, бидејќи Националното собрание неодамна со две третини ги усвои измените на Законот за локални избори.
Изборите во овие локални самоуправи ќе се одржат на ист ден со изборите за советници во Градското собрание на Белград, односно на 2 јуни годинава.
„Среќна сум што испративме силна порака од парламентот до сите наши граѓани дека како нивни избрани сме способни да разговараме и да постигнеме договор и покрај сите наши разлики“, рече Брнабиќ по објавата.
Европа
Уапсен украински министер
Украинските антикорупциски тела денеска го уапсија министерот за земјоделство Микола Солски. Судот на министерот му изрече превентивна мерка притвор во траење од 60 дена, до 24 јуни. Сепак, Солски ќе биде ослободен од притвор доколку плати кауција од 75,7 милиони гривни (околу 1,7 милиони евра).
Обвинителството побара притвор поради ризик од попречување на истрагата, влијание врз сведоци и бегство. Тие истакнаа дека Солски во текот на вонредната состојба неколку пати ја минувал границата.
Адвокатот одговори дека Солски ја преминал границата поради службени патувања, освен во еден случај кога заминал на договорено отсуство. Тој се осврна и на тоа дека Солски како функционер може да патува во странство само со согласност на премиерот. Тој исто така изјави дека нема докази дека Солски би можел да се меша во истрагата или да влијае на сведоците.
Солски вчера понуди оставка откако беше осомничен за вмешаност во незаконско стекнување државно земјиште. Обвинителите тврдат дека Солски бил фатен дека поседува државно земјиште во вредност од 291 милион гривни и дека се обидел да добие друго земјиште во вредност од 190 милиони гривни.
Солски ги негира обвиненијата, за кои обвинителите велат дека се однесуваат на настани од 2017 до 2021 година, пред да стане министер за земјоделство во март 2022 година. Солски е еден од најбогатите функционери во администрацијата на претседателот Володимир Зеленски.
Ако плати кауција, ќе мора да ја предаде својата обврзница на властите и нема да му биде дозволено да разговара со други осомничени и сведоци во случајот.