Шестиот самит Америка заврши во неделата во Колумбија без завршна декларација, поради спорот со САД околу исклучувањето на Куба, што ја доведува во опасност иднината на ваквите состаноци на врвот на Организацијата на американските држави.

„Нема декларација бидејќи не е постигнат договор“, изјави колумбискиот претседател Хуан Мануел Сантос, по средбата на триесеттината челници од земјите членки на Организацијата на американските држави којашто се одржа во колумбиското карипско пристаниште Картахена, пренесува AFP.

Претседателот Сантос нагласил дека повеќето држави го поддржува учеството на Куба и нејзиното исклучување од организацијата го оценил како „анахронизам“, повикувајќи на покренување процез за учество на Куба на следниот самит.

Освен САД и Канада, сите други учесници на самитот сакаат на Куба да и’ биде дозволено присуството на самитот, иако не е членка на Организацијата на американските држави од 1962 година, а овие две земји се спротиставуваат и на барањете за суверенитет над Фолкландските острови од страна на Аргентина, триесет години по војната со Велика Британија.

Земјите од блокот во кој се наоѓа и Куба и нејзините сојузници со левичарски водачи, како Венецуела, Еквадор и Боливија, упатија ултиматум и се заканија со бојкот доколку и натаму Куба биде исклучувана од учество на самитите.

Американскиот став воопшто не е изменет, а претседателот Барак Обама викендов пред почетокот на самитот објасни дека Куба не покажала ни најмал интерес за промена на односите со САД.

Лидерите од Латинска Америка, исто така, ја критикуваа и ефикасноста на програмата за борба против трговијата со дроги којашто од 2000 година ја финансираат САД со осум милијарди долари./крај/афп/сн