Шест луѓе загинаа во двата бомбашки напада во средата во авганистанската престолнина Кабул, неколку часа по заминувањето на американскиот претседател Барак Обама кој допатува во ненајавена посета на Авганистан.

Петмина авганистански цивили и припадник на обезбедувањето се убиени а околу 15 се ранети во самоубиствениот бомбашки напад врз куќа во којашто се сместени странски работници од Европската Унија и Обединетите нации, потврди авганистанското министерство за внатрешни работи. „Денеска достоинствен борец изведе напад со автобомба врз странска воена база во Кабул, а го следеа други борци кои влегоа во базата“, изјави портпаролот на талибаните, Забиулах Муџахид во смс порака испратена до агенцијата AFP.Талибаните соопштија дека го извеле самоубиствениот напад како знак на протест против посетата на американскиот претседател Барак Обама и потпишување на стратешкиот договор меѓу ДАС и Авганистан, пренесува Reuters, исто така, повикувајќи се на талибанскиот портпарол. Во средата наутро во центарот на авганистанскиот главен град Кабул одекнала една па потоа уште една експлозија којашто ја слушнале новинарите на AFP чиишто канцеларии се во близина на американската амбасада. Американската амбасада веднаш извела забрана за пристап кон зградата и прогласила тревога испраќајќи го својот персонал кон скривницата и повикувајќи ги да се тргнат од прозорците.Експлозиите коишто се случија набрзо по заминувањето на Обама, сведочат за новото јакнење на талибанското дејствување повеќе од десет години откако меѓународната коалиција предводена од НАТО влегоа во Авганистан и го симнаа од власт талибанското движење и во моментот кога меѓународната коалиција прави планови до 2014 година да се повлече од земјата и безбедноста да ја предаде на авганистанските безбедносни сили.Американскиот претседател Барак Обама во Кабул мина шест часа ноќта кон средата по средноевропско време. Тој допатува во авганистанската престолнина Кабул ненадејно и тајно, ноќта кон 2-ри мај,токму на годишнината од ликвидацијата на Осама бин Ладен, водачот на глобалната терористичка мрежа Ал Каеда којашто одржува тесни врски со талибанското движење. По потпишувањето на договорот со авганистанскиот претседател Хамид Карзаи со кој се исцртуваат идните американско-авганистански односи по завршувањето на борбената амисија на НАТО во 2014 година и со кој на Авганистанците им се даваат гаранциите дека Американците нема да ги напуштат во поддршката и по заминувањето од земјата, американскиот претседател имаше обраќање во американската воена база во Баграм.„Драги мои Американци, зад нас останува повеќе од една деценија минати под темниот облак на војната. А сега тука во Авганистан, во оваа вечерна темнина пред зората, можеме да го видиме светлото на новиот ден на повидок. Тука војанта започна, тука и ќе заврши“, рече Обама. „Не само што успеавме да ја исфрлиме Ал Каеда од Авганистан, туку полека и систематски ја ослабувавме и пред една година успеавме да го изведеме Осама бин Ладен пред правдата“, додаде Обама што беше проследено со одобрувачки извици на американските војници. Повеќе од три илјади американски војници и припадници на другите странски контингенти под команда на НАТО загинаа во Авганистан од почетокот на инвазијата во 2001 година. Иако американскиот претседател нагласи дека целосната победа над Ал Каеда е поблиска како никогаш досега, потенцираше дека пред Американците се наоѓаат уште тешки пречки. „Знам дека многу Американци се заморени од војната. Но мораме да ја завршиме војната којашто ја почнавме, тоа е нашата одговорност“, додаде Обама. „И додека излегуваме од деценијата на судири во странство и заздравуваме од економската криза дома, време е да ја обновиме Америка“, изјавил Обама на крајот од својот говор, кој е во рамките на кампањата за претседателските избори на коишто Обама се труди да биде повторно избран на претседателската функција во којашто се труди својата надворешна политика да ја прикаже како успешна. Пред посетата на базата во Баграм, Обама имаше средба со својот авганистански колега Карзаи, во добро обезбедуваната претседателска палата во Кабул, каде што двајцата државници го потпишаа стратешкиот договор за партнерство. „Потпишувајќи го овој документ, го затвораме десетгодишното поглавје и отвораме ново, на еднакви и партнерски односи“, изјави авганистанскиот претседател Хамид Карзаи по потпишувањето на договорот. Со ова потпишување требаше да им се испрати порака на авганистанските власти дека не треба да чекаат американските и другите странски сили да ја напуштат нивната земја за да ја преземат власта. Документот не прецизира колку американски војници, можно е и специјални сили и советници, ќе останат во Авганистан и по 2014 година. Како што е најавено, тоа ќе биде договорено со документот на кој сé уште се работи./крај/мф/сн