Група на терористи кои дејствуваат против владата на Сирија, поседува хемиско оружје кое и’ било доставено од територијата на Либија, пишува во неделата иранската новинска агенција Fars, повикувајќи се на сириски извори.

Според агенцијата, сега терористите коишто се борат на страната на бунтовниците против владата на сирискиот претседател Баша ал-Асад, наводно, се обучуваат за употреба на боеви отрови во кампови на територијата на Турција. Како што пишува Fars, екстремистите планираат да изведат напад со боев отров, за што ќе биде обвинета сириската армија дека го употребува против цивили.

„Секое објавување, во моментов или во иднина, на соопштение за можна употреба од сириската (владина -з.р.) армија на хемиско оружје. Ќе значи дека терористите ќе го користат ова оружја против цивилното население и за тоа ќе ги обвинат сириските вооружени сили и владата“, пишуваат сириските медиуми, пренесува Fars.

Во Сирија, 15 месеци траат судирите меѓу вооружената опозиција и владините безбедносни сили, откако во февруари 2011 година во земјата започнаа протести против претседателот Башар ал-Асад инспирирани од ткн Арапска пролет, и обидот тие насилно да бидат сопрени.

Според податоците коишто во неделата ги објави опозициската Сириска опсерваторија за човекови права со седиште во Лондон (OSDH), досега загинале најмалку 14.115 луѓе, од кои 9.862 цивили, 3.470 војници и 783 воени дезертери кои минале на страната на вооружената опозиција. Според меѓународни процени, бројката на жртви надминува 12 илјади, додека според официјален Дамаск станува збор за повеќе од 7.000 загинати, од коишто најголемиот број се припадници на безбедносните сили коишто водат борби со „терористички групи поддржани и оркестрирани од странство“.

Од средината на април годинава во Сирија престојува мисија невооружени воени набљудувачи со мандат на Обединетите нации, коишто треба да го следат почитувањето на прекинот на огнот и спроведувањето на мировниот план од шест точки на специјалниот претставник на Он и Арапската лига за Сирија, Кофи Анан. Меѓутоа, и двете страни во конфликтот редовно известуваат за нови вооружени инциденти и жртви.

Неодамна, во Сирија имаше два случаи на масовни убиства на цивили, во градот Хула во покраината Хомс, како и во близина на градот Хама. Опозицијата ја обвини војската и милицијата на локалното население коешто го поддржува претседателот Асад, додека официјален Дамаск тврди дека масакрите ги вршат „терористите“ за да предизвикаат меѓународна осуда на сириските власти./крај/мф/сн