Министерството за внатрешни работи на Украина соопшти дека одобрило полицијата да употреби огнено оружје за самоодбрана и им порача на граѓаните на Киев да не излегуваат од своите домови.

„Од прозорците на Киевскиот конзерваториум непознати лица отворија оган врз полицијата. Со цел да ги заштитат животите на припадниците на полицијата беше донесена одлука тие да се повлечат на безбедни локации и согласно законот одобрена им е употреба на огнено оружје за самоодбрана“, се вели во соопштението на Министерството за внатрешни работи на Украина.

Припадниците на специјалните единици вооружени се со офанзивно огнено оружје.

„Ситуацијата е комплицирана. Врз специјалните сили се пука од снајпери и автоматско оружје“, истакнал за медиумите Сергеј Бурлаков.

Украинското министерство за внатрешни работи ги советувало становниците на Киев да не излегуваат надор од своите домови, по што почнаа најновите крвави пресметки меѓу демонстрантите и полицијата во срцето на градот, во кој беа убиени најмалку 26 лица.

„Најдобро е доколку моментално се ограничи движењето на моторните возила или едноставно едноставно останете во затворен простор. Овие мерки за безбедност се неопходни, бидејќи улиците на Киев се заземени од страна на вооружени и агресивни луѓе“, се вели во соопштението од министерството, пренесува агенцијата AFP.

Украинската полиција тврди дека изминатите денови користела исклучиво гумени куршуми. Поради тоа полицијата наведува дека за смртта на жртвите кои настрадаа за време на протестите одговорни се демонстрантите, бидејќи на телата на поголемиот број на загинати лица регистрирани се рани од огнено оружје.

Министерството за внатрешни работи соопшти и дека само за време на денешните немири загинале тројца полициски службеници.

Полицијата наведува и дека радикалните демонстранти низ целата земја од полициските станици одзеле 1.500 парчиња огнено оружје, како и околу 100 илјади парчиња боева муниција поради што покрената е антитерористичка акција./крај/мф/ап