Антикорупциската комисија ќе испитува на каков начин и зошто Агрон Бајрами, поранешен сопственик на струшката пилана „Караорман“, пред две недели преку судски извршител наплатил 800.000 евра од буџетот.

АНТИКОРУПЦИСКАТА ЌЕ ИСПИТУВА

Александра К. Мишовска

Антикорупциската комисија ќе испитува на каков начин и зошто Агрон Бајрами, поранешен сопственик на струшката пилана „Караорман“, пред две недели преку судски извршител наплатил 800.000 евра од буџетот. Антикорупционерите ќе треба да утврдат има ли злоупотреба и дали Министерството за економија и Јавното правобранителство направиле се за да ги заштитат државните пари. Бајрами доби 800.000 евра, пари што барал државата да му ги врати бидејќи во 1995 година Агенцијата за приватизација му ја продала „Караорман“ со нерешени имотноправни односи.

– Случајот ќе го испитуваме откако ќе ги комплетираме сите документи од Министерството за економија, од правобранителството и од Народната банка. Првичните наоди можат да се очекуваат многу брзо – изјави Михајло Маневски, претседател на комисијата. Според нашите информации, високи претставници на Министерството за економија веќе контактирале со членови на комисијата. Сите сознанија со документите за случајот веќе се испратени до антикорупционерите. Во Министерството тврдат дека не станува збор за криминал и дека тие не можеле да сторат ништо за да спречат парите од нивната сметка да се префрлат на сметката на бизнисменот.

Извори од Народната банка за „Време“ тврдат дека во случајов најголемата одговорност треба да се бара во Јавното правобранителство. Според нивните изјави, реакцијата на правобранителството била задоцнета и во време кога никој не можел да спречи парите да ги земе Бајрами. Тој уште во јануари годинава писмено се обратил до Министерството за економија (еден од правните наследници на Агенцијата за приватизација) и предложил надлежните доброволно да му ги исплатат парите. Правобранителството испратило реакција за ревизија на случајот до Врховниот суд дури три месеци подоцна, односно на 10 април годинава. Тогаш ниту Народната банка ниту налогот од Основниот суд Скопје 1 не можеле да ја запрат трансакцијата.

Случајот „Караорман“ е еден од трите поголеми во кои огромни суми државни пари се излеаја во касата на едно лице. Иако Бајрами ја купил пиланата во 1996 година, по пет години ја тужел Агенцијата за приватизација оти му продала фабрика на општината Струга. Бајрами тогаш за пиланата платил 1,5 милион германски марки и сега си ги врати парите.

Годинава државата го обесштети и овчарот Иснифарис Џемаили, и тоа со 730.000 евра, а на бизнисменот-сопственик на „Упа ентерпрајс“ му исплати повеќе од милион евра.

Антикорупционерите и бизнисмените веќе се сомневаат дека причината за тоа што државните пари не се заштитени е неажурноста на Јавното правобранителство.