Наместо свикување итна седница на Синодот, поглаварот Стефан замина на одмор во манастир во Романската црква!

Наместо свикување итна седница на Синодот, поглаварот Стефан замина на одмор во манастир во Романската црква!

Навидум мирно и полупразно, селото Говрлево, сместено во близина на јужната страна на Водно, жилаво ќе се бори да го врати земјиштето, манастирите и црквата лоцирани на светиот рид. Купопродажниот договор склучен на 6 октомври минатата година меѓу Скопската митрополија на Македонската православна црква и главниот извршен директор на Цементарницата „Усје" (потпишан од протојереј Коста Станоевски и Константинос Дердемезис) за продажба на црковен имот за нив е неважечки и скандалозен, зашто, како што велат, распродажбата на свети места е надвор од умот.

Па, сепак, фрапантно но вистинито – она што на Скопската епархија со која раководи поглаварот г.г. Стефан не ч претставува светост, зашто го отуѓи без око да ч трепне, на говрлевци им е важно. Исто како и на светските археолози, кои поради пронајдоците од овој локалитет Говрлево го ставија на светската археолошка карта, а наодите ги вброија меѓу десетте светски археолошки чуда. Пред сж, скулптурата на маж позната како Адам од Говрлево која нашиот археолог Милош Билбија ја откопа во слој земја каде што завршува неолитот и почнува железното време како и Големата Божица Мајка. Артефакти кои буквално ги возбудија светските археолози и не случајно останаа забележани и на „Јаху". За жал, а богами и срам, само пет-шест години подоцна, светиот рид на кој се ископани овие фигури првиот духовник на Македонската православна црква го багателисува. Наспроти Билбија, кој по важните откритија (Адам и Големата Божица Мајка) изјавуваше дека „Бог не можел да ни подари поречовито парче од оваа човеколика земја: ни ги подари оние нејзини делови кои директно ни ја предочуваат духовноста и него", г.г. Стефан ги закити со продажна цена од 204.516 евра! Толку грчкиот бизнисмен, непосредно по потпишувањето на купопродажниот договор, ч исплатил на Скопската епархија за црковниот имот од 17. 776 квадрати на кои се наоѓаат пет манастири и една црква. И сето тоа, како што налага редот, двете страни, уредно го завериле кај нотар во март годинава. За секој случај.

Денес, за говрлевци ова е срамно парче хартија за кое некој треба да си ја плати вината. Да одговара за леснотијата со која, наспроти древните канони, отуѓил сакрални објекти стари 600 години. И тоа како да не било доволно, па продавачот, односно Македонската православна црква, во договорот со кој светиот рид сосе петте манастири и црква му ги даде на грчкиот бизнисмен, дополнително се нагрби. Како што пишува во договорот: „Во случајот на смеќавање на сопственоста на земјиштето и неговото користење, продавачот се обврзува да го застапува купувачот и да го штити од вознемирување од трети лица, бидејќи изјавува дека врз земјиштето што му го продава на купувачот нема никакви товари, ниту, пак, други сопственици". Со нотарскиот договор, исто така, прецизирано е дека „се врши предавање-отстапување на земјиштето и објектот од продавачот на купувачот и тие не можат да бидат во иднина предмет на каква било облигациона или друга постапка од страна на продавачот, а се утврдува Цементарницата „Усје", без дополнителна согласност на продавачот да изврши укнижување на земјиштето во земјишните книги на свое име и во своја сопственост". Небаре не го знае договореното, преку јавниот сервис г.г. Стефан на јавноста и „појасни" дека државата стопанисува со земјиштето, дека таа а не МПЦ го дала на експлоатација!

За ова некој ќе мора да одговара на суд, вели Санде Јовановски од Говрлево. Никој, па и стопати да е владика и архиепископ, не може на своја рака да распродава или дислоцира светости. Работата ќе ја тераме до крај, зашто вакво расфрлање со свети места е невидена работа, смета нашиот соговорник, кој во знак на протест деновиве јавно го искина скандалозниот договор.

Станува збор за парче света земја, на која, според преданијата, спас од болеста уште во шестиот век нашол и Јустинијан Први, ама и неброено многу наши современици, кои секојдневно го посетуваат лекувачкиот извор лоциран во црквата „Св. Кузман и Дамјан". А сега и таа е дел од пакетот кој Скопската епархија молчешкум го отуѓи. „Деновиве ќе побараме прием кај г.г. Стефан, да ни го објасни својот потег, а доколку не нж прими, на протест ќе ги повикаме граѓаните на Македонија и верниците да ни се придружат", објаснува д-р Виолета Толевска, која е подготвена да стори сж за зачувување на парчето земја од кое потекнува. Не е доцна, вели, да го вратиме културното наследство и имотот на кој е лоциран светиот рид, зашто за негово отуѓување не е доволен нечиј лекомислено ставен потпис. Се прашуваме каде со ваква погубна политика МПЦ, во догледно време, ќе ги продаде или дислоцира другите свои цркви и манастири? Затоа очекуваме помош и апелираме на сите здраворазумни членови на Светиот синод, да го поништат договореното и да ја вратат вербата на верниците, порачува д-р Толевска.

Поглаварот Стефан, покрај тоа што се обиде со изјавата преку јавниот сервис да посее магла и да ја пренасочи вината за стореното, денес, како ништо да не се случило, замина на одмор во некој од манастирите на Романската црква. Таму ќе остане во наредните седум-осум дена, надевајќи се во онаа народната: секое чудо за три дена. Но, дали ќе биде така? Говрлевци имаат трпение и нема да отстапат од барањето смена и расчинување на архиепископот Стефан. Трпението ќе мора да ги послужи и владиците на МПЦ, кои затечени од тајната и невидена распродажба на црковниот имот, се подготвени да побараат одговори од првиот меѓу еднаквите. Дали, „случајот Говрлево" ќе помине со бегли одговори од првиот духовник или со санкции адекватни за стореното, на потег ќе бидат архијереите. Говрлевци и стручната јавност немаат дилеми.