Агенцијата за вработување не добила ниту денар од 650-те илјади евра предвидени за преквалификација на 755-те железничари што беа отпуштени минатата година по одлуката за трансформација на „Македонски железници“.

Агенцијата за вработување не добила ниту денар од 650-те илјади евра предвидени за преквалификација на 755-те железничари што беа отпуштени минатата година по одлуката за трансформација на „Македонски железници“. Програмата за преквалификација предвидува Владата да обезбеди 400.000 евра од буџетот и Светската банка околу 250.000 евра со намена да се покријат трошоците за обука и повторно вработување на железничарите.

Во Светската банка велат дека тие веќе обезбедиле 250.000 евра за реализација на овој проект. Оттаму додаваат дека според правилата во Светската банка, носителите на проектот најпрво треба да ги извршат предвидените обуки и преквалификации на отпуштените работници за потоа банката да ги покрие нивните трошоци. „Време“ пишуваше дека во програмата за преквалификација се предвидува 50. 000 евра да се потрошат за компјутери и за мебел во Агенцијата за вработување. Во банката потврдија дека била оставена алтернатива доколку е потребно да се одвојат пари за компјутери и опрема, со намена да се искористат за курсеви на работниците што беа прогласени за технолошки вишок.

Отпуштените железничари реагираат бидејќи и по цела година откако заработија откази, ниту еден од нив не добил понуда за обука, преквалификација или за ново работно место. Во Центарот за вработување во Скопје велат дека веќе анкетирале мнозинство од отпуштените железничари за да ги испитаат нивните квалификации и интерес за нова работа. Оттаму додаваат дека голем дел железничари не ги сфатиле сериозно овие прашалници и дека поради тоа анкетата била повторувана.

Борче Божиновски, раководител на центарот, вели дека проектот мирувал и поради одредени законски пречки и најавува продолжување на активностите за преквалификација на железничарите во септември.

– Проектот беше ставен во мирување поради одредени законски пречки. Имено, Агенцијата за вработување може да врши обуки и преквалификации само за познат работодавец. Меѓутоа, и оваа пречка е надмината и во почетокот од септември ќе продолжат активностите за реализација на проектот – вели Божиновски.

Според програмата за социјално ублажување, отпуштените железничари требаше да добијат можност за обука преку курсеви во Агенцијата за вработување и во други институции. Поради ограничените можности на агенцијата, во програмата беше предвидено до 10 мај годинава агенцијата да подготви листа од даватели на услуги, организации, фирми, здруженија што се квалификувани и имаат капацитет да одржуваат обуки и курсеви. Според планот, службите во Агенцијата за вработување имале рок до 25 мај да проценат какви се потребите и можностите на отпуштените железничари и врз база на тоа да донесат план за видот и за трошоците за обуката на работниците.