Нема непотизам во назначувањето на Сашо Мијалков, братучед на премиерот Никола Груевски, за директор на Управата за безбедност и контраразузнавање

Нема непотизам во назначувањето на Сашо Мијалков, братучед на премиерот Никола Груевски, за директор на Управата за безбедност и контраразузнавање

Нема непотизам во назначувањето на Сашо Мијалков, братучед на премиерот Никола Груевски, за директор на Управата за безбедност и контраразузнавање. Тој и пред да стане Груевски премиер извршуваше функции во безбедноста, а беше и државен советник за безбедност.

Ова е објаснувањето на Владата по реакциите што ги предизвика назначувањето на Мијалков на првата седница на кабинетот на Груевски. Љупчо Тодоровски е назначен за директор на Бирото за јавна безбедност, директор на Службата за општи и заеднички работи е Васил Доневски, на Царинската управа – Томе Тасевски, на Агенцијата за вработување е назначен Стојче Тапанџиевски, а на Дирекцијата за слободни економски зони – Ивица Георгиевски.

На седницата помногубројни биле разрешувањата. Стотина вршители на јавни функции ја изгубија фотелјата. Разрешени се јавната правобранителка Зоја Лега, директорите и членовите на управните одбори на јавните претпријатија, агенциите и на фондовите што се надлежност на Владата.

Објаснувањето за Лега било дека таа не си ја извршувала добро својата функција и оти нејзиното име било замешано во повеќе големи корупциски скандали, пред се’, во аферите „Бачило“ и „УПА“, во кои таа не ги презела сите законски мерки за да ги заштити интересите на државата. И Петра Митева, која сегашната власт ја обвини како главен актер во аферата „УПА“ од вчера не е веќе директорка на Управата за јавни приходи.

Разрешени се директорот на Казнено-поправниот дом „Идризово“ Јовица Стојановиќ, на струшкиот отворен затвор – Андрија Мечкаровски, но и на сите други затвори во градовите од внатрешноста. Сменет е и Костадинчо Ефремов, директорот на Управата за извршување санкции.

Слободен Чокревски не е веќе директор на Ветеринарната управа, како и Илир Мехмети во Управата за цивилна и воздушна пловидба, Фјодор Доброхотов во Управата за наменско производство и Никола Колевски во Државниот пазарен инспекторат.

Комисијата за односи со верските заедници нема да ја предводи Цане Мојановски. Разрешен е и директорот на Агенцијата за млади и спорт Георги Трајчев.

Во Владата не знаат кога ќе бидат назначени нови вршители на овие функции, но објаснуваат дека дотогаш должноста ќе ја извршуваат старите.

(С.К.)