Упадот во дискотеката „Процес“ на поголема група маскирани и вооружени лица и мегаскандалот со запленувањето на армиското оружје, иако помпезно беа најавувани во јавноста, се’ уште немаат судска разрешница.

ЉУБИША СТАНКОВИЌ

Упадот во дискотеката „Процес“ на поголема група маскирани и вооружени лица и мегаскандалот со запленувањето на армиското оружје, иако помпезно беа најавувани во јавноста, се’ уште немаат судска разрешница. И двата скандала се’ уште се во фаза во кривична истражна постапка и нема конкретни најави дали ќе се прошируваат на нови актери, вмешани во нив. Ставот на Обвинителството е дека се постапува согласно со законот, исклучувајќи ги притоа можностите за каква и да е нивна опструкција или забошотување. Тие од МВР бараат разоткривање на идентитетот на сите актери во упадот во дискотеката „Процес“, чии ликови јасно можеле да се видат на видеоснимките.

Претепувањето на обезбедувањето на „Процес“, за кој како единствени виновници беа посочени педесетина маскирани припадници на Единицата за брзо распоредување, се’ уште е во фаза на кривична истрага. За она што се случи кон средината на декември, кога во преполната дискотека упаднаа маскирани лица кои оставија пустош зад себе, досега се осомничени 20 припадници на ЕБР, кои доброволно се јавија пред истражните органи. Со оглед на тоа што постојат релевантни сознанија дека во дискотеката имало двојно повеќе маскирани лица, се јавува доза на сомневање дека МВР како да не сака докрај да ја истурка целата афера на виделина.

Од Основниот суд Скопје 1 каде што се води постапка за насилство, односно за бруталноста што ја манифестираа маскираните полицајци, потврдуваат дека судијата редовно постапува по предметот.

„Она што засега можам да го кажам е дека колешката која работи на овој случај постапува редовно и за овој месец е предвидено да се изврши распит на предложените сведоци и на оштетените. Точно е дека со предметот се опфатени 20 лица обвинети за насилство, но дали ќе дојде до проширување не можам да кажам, бидејќи Јавното обвинителство и натаму го претресува целиот случај“, вели Седат Реџепагиќ, раководител на Истражното одделение во Основниот суд Скопје 1. Тој вели дека засега не може да изнесува други детали за „Процес“, бидејќи кривичната истрага се’ уште не е комплетирана.

Дека бројот на доброволно пријавените полицајци не одговара со оној за кој говорат сведоците и снимките од камерите најдобро се потврдува и со дополнителните дејства на кои инсистира скопското Јавно обвинителство.

„Ние во Обвинителството ги прегледавме видеоснимките. На некои од нив се гледаат ликови и затоа побаравме од МВР да изврши дополнителни проверки, односно да го утврди нивниот точен идентитет“, вели скопскиот основен јавен обвинител Стерјо Зиков. Ставот на Обвинителството е дека се постапува согласно со законот, исклучувајќи ги притоа можностите за каква и да е опструкција или забошотување на случајот.

И мегаскандалот со запленувањето на армиското оружје е во фаза на кривична истражна постапка. Од Основниот суд Скопје 1 потврдуваат дека истрагата се одвива непречено. Оттаму и потврда дека покрај веќе осомничените, истрагата, барем засега, нема да се проширува и на други лица. Во наредниве денови ќе треба да бидат распитани предвидените сведоци, а потребно е да се реализираат и некои стручни вештачења.

Контингентот армиско оружје кое го заплени МВР, а потоа и го најави како еден од поголемите коруптивни случаи, најверојатно требаше да послужи за политичка дискредитација, бидејќи за целиот товар беа осомничени четворицата бугарски возачи на камионите во кои беа натоварени 300 парчиња митралези и исто толку постаменти, како и 33 минофрлачи. На листата на осомничени се најдоа и проценителите на оружјето, но и покрај тоа Министерството за одбрана и МВР не дадоа одговор на прашањата зошто кога веќе постоеле сомневања за организиран шверц на оружје, односно кога се знаело за пратките од мај, јуни и август минатата година, шверцот не бил спречено на време. Целата приказна поврзана со мегаскандалот заврши со неколку разрешувања во Армијата, со неколку кривични пријави, со незакажување на собраниската Комисија за одбрана и безбедност и со упорно одбивање за проблемот да се проговори на седница на Советот за безбедност. Само една недела по отворањето на двата големи скандала, кои се случија за само еден викенд, министерката Гордана Јанкуловска рече дека Министерство ги расчисти двата случаја и дека со тоа се „покажува определеноста на Владата за борба против криминалот и корупцијата“. Како што стојат сега работите, случаите се’ уште не се затворени, а борбата против криминалот и корупцијата допрва претстои.