Во два наврата, и како премиер и како претседател на државата, Бранко Црвенковски во анкетниот лист за неговата имотна состојба заборавил да го пријави авансот за деловниот простор што неговата сопруга Јасмина Црвенковска, со партнерите од компјутерската фирма „Семос“, го купила во зградата „Тифани“ на нивниот довчерашен сопартиец Љупчо Палевски.

ЉУПЧО ПАЛЕВСКИ ГИ ОТВОРА КАРТИТЕ

Во два наврата, и како премиер и како претседател на државата, Бранко Црвенковски во анкетниот лист за неговата имотна состојба заборавил да го пријави авансот за деловниот простор што неговата сопруга Јасмина Црвенковска, со партнерите од компјутерската фирма „Семос“, го купила во зградата „Тифани“ на нивниот довчерашен сопартиец Љупчо Палевски.

Пред 15 септември 2002 година (по изборите на кои Црвенковски се врати на премиерската функција), во јуни 2002 година четворицата партнери во „Семос“ уплаќаат 160 илјади евра во кеш како аванс за купување деловен простор од 550 квадратни метри на првиот кат, локал и гаражи во деловно-станбената зграда „Тифани“. Авансот гласи на имињата, а не на фирмата „Семос“. Значи платија Јасмина Црвенковска, Илија Секуловски, Герасим Ванчев и Сашко Наумов.

Тоа беше авансно плаќање или повеќе од 30 отсто од вредноста на просторот (447.000 евра).

И покрај неколкуте дописи од страна на инвеститорот Палевски да се доплати просторот според договорот, ниту еден од сопствениците на „Семос“ не дошол да се договорат. Палевски вели дека од негова страна им била понудена можноста за раскинување на договорот и во рок од 6 месеци да им го врати авансот. И на тоа не добива одговор, а парите останале до денес кај него.

Во меѓувреме истиот тој простор Палевски и го продава на Управата за јавни приходи, во периодот кога директорка беше Петра Митева. За ревизорите токму овој договор на УЈП бил спорен. Деловниот простор е завршен, но УЈП се уште не ги зела клучевите за да го всели поради нерешени имотни прашања.

Инвеститорот Палевски финансирањето на објектот го затвора со револвинг-кредит од еден милион евра. Но никој не го дополнил, променил или избришал анкетниот лист на Бранко Црвенковски.

Во 2004 година дотогашниот премиер Црвенковски е избран за претседател на Република Македонија. Законот е јасен во делот на обврската дека функционерите треба да го пријават и имотот на семејството. Според Законот за спречување на корупцијата, избран или именуван функционер е должен во рок од 30 дена да достави анкетен лист за недвижен имот и подвижни предмети во поголема вредност, во негова сопственост или во сопственост на неговото семејство. Законот прецизирал дека под семејно домаќинство се подразбираат брачен другар, деца, родители, браќа, сестри, посвоители или посвоеници, со кои функционерот живеел во заедница. Антикорупциската комисија по стапувањето на претседателската функција на Бранко Црвенковски, во мај 2004 година соопшти дека тој нема обврска повторно да даде отчет за својата имотна состојба. Тие тогаш одлучија дека во согласност со Законот за спречување на корупцијата станува збор за континуитет во вршење јавна функција и во случајот претседателот не треба да пополни нов анкетен лист.

И откако стана претседател, кабинетот на Црвенковски соопшти дека нема промени во неговата имотна состојба откако ја смени функцијата и стана претседател. Од кабинетот тогаш порачаа дека претседателот бил подготвен повторно да го објави анкетниот лист.

Авансното уплаќање за деловен простор во „Тифани“ го нема никаде во неговиот анкетен лист. И пред и потоа.

(Продолжува)

A. Д.

Што пријавил Црвенковски?

Во неговиот стар анкетен лист пишува дека семејството Црвенковски поседува стан од 61 квадрат во Скопје, дека неговата сопруга Јасмина има автомобил „фолксваген поло“ од 1995 година и дека поседува 27 проценти од акциите во „Семос компјутери“ и 33 отсто акции во „Семос-компјутерски образовен центар“. Ова Бранко Црвенковски го пријавил во анкетниот лист до антикорупциската комисија, кој го пополнил во 2002 година, кога се врати на премиерската функција. Тогаш тој и неговата сопруга пријавиле тековни сметки во Комерцијална банка со салда од 619 илјади и од 357 илјади денари.