Претседателот на Основниот суд во Кочани, Зоран Трајанов, од прексиноќа е во притвор во штипскиот затвор, поради основано сомнение дека ги злоупотребил службената положба и овластувања.

Кочани

Претседателот на Основниот суд во Кочани, Зоран Трајанов, од прексиноќа е во притвор во штипскиот затвор, поради основано сомнение дека ги злоупотребил службената положба и овластувања. Тој прво бил приведен во кочанската полиција, а потоа истражен судија му определил мерка притвор од 30 дена. Трајанов е еден од судиите за кои Судскиот совет завчера поведе постапка за оценување на нивната работа.

Трајанов е осомничен за судски предмет во врска со сопственоста на бензинската пумпа „Еко оил“. Тој и’ овозможил на кочанската фирма „Ледер“ да стане сопственик на таа бензинска пумпа, иако не ја платила целата договорена сума на претходниот сопственик на пумпата, кочанската фирма „Мак оил“ и нејзиниот сопственик Мите Јованов. Претходно друг судија донел пресуда во полза на Јованов.

Но, по неколку жалби, делото лани го презел Трајанов и во текот на август, кога судиите обично користат ферија, под итна постапка пресудил во корист на „Ледер“. Газдата на „Ледер“ потоа експресно бензинската пумпа ја префрлил на име на неговата мајка, а таа, пак, ја продала на бугарската фирма.

Трајанов првпат беше претседател на Основниот суд во Кочани пред десетина години. Повторно беше избран на 19 мај 2005 година. Основниот суд во Штип вчера го посети претседателот на Судскиот совет, Бекир Исеини, кој потоа замина и во кочанскиот суд.

– Ќе одам во Кочани да ги охрабрам колегите судии да продолжат со работа и да се договориме со заменик-претседателот и со судиите кој да биде в.д. претседател на судот – изјави Исеини.

Тој најави дека ќе продолжи строгата контрола во судството.

– Сите судови и судии се под лупа. Особено ќе се интересираме за старите заостанати предмети, чиј број во Македонија е околу 160.000. Ќе докажеме дека тоа не е корумпирано, туку само некои судии – рече Исеини.

(Љ.Ш.

)